22-Feb-2026

ସିନାପାଲି (ଚିନ୍ତାମଣି ନେତାମ):
ରବିବାର, ୨୨ ଫେବୃଆରୀ ୨୦୨୬—ସିନାପାଲିବାସୀଙ୍କ ପାଇଁ ଏକ ସ୍ମରଣୀୟ ଓ ଐତିହାସିକ ଦିନ। ଗାୟତ୍ରୀ ଚଉକ ନିକଟରେ ଭାରତୀୟ ଶିକ୍ଷା ଓ ଗବେଷଣା ପ୍ରତିଷ୍ଠାନର ମାର୍ଗଦର୍ଶନରେ ପରିଚାଳିତ ଶିଶୁ ବିକାଶ ବିଦ୍ୟା ମନ୍ଦିରର ନୂତନ ବିଦ୍ୟାଳୟ ଭବନ ଓ ବିଦ୍ୟାମନ୍ଦିର ପ୍ରତିଷ୍ଠା ଉତ୍ସବ ଭକ୍ତି, ଆଡମ୍ବର ଓ ଆନନ୍ଦମୟ ପରିବେଶରେ ଅନୁଷ୍ଠିତ ହୋଇଯାଇଛି।ସାରା ଅଞ୍ଚଳ ଏ ଅବସରରେ ଗର୍ବ ଓ ଖୁସିରେ ଭରିଯାଇଥିଲା।୧୯୭୭ ମସିହାରୁ ଶିକ୍ଷା ସେବାରେ ନିରତ ଫାଉଣ୍ଡର ଏବଂ ବିଦ୍ୟାଳୟ ପରିଚାଳନା କମିଟିର ସଭାପତି ଶ୍ରୀଯୁକ୍ତ ରାଜେଶ କୁମାର ଅଗ୍ରୱାଲଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଶ୍ରୀଯୁକ୍ତ ଲମ୍ବୋଦର ନିଆଲ ମୁଖ୍ୟ ଅତିଥି ଭାବେ ଯୋଗଦେଇ ଫିତା କାଟି ବିଦ୍ୟାଳୟର ଶୁଭାରମ୍ଭ କରିଥିଲେ।
ସମ୍ମାନିତ ଅତିଥି ଭାବେ ସିନାପାଲି ଅଙ୍ଗାନବାଡ଼ି କର୍ମୀ ଶ୍ରୀମତୀ ଜାନ୍ନଭି ମେହେର, ସରସ୍ୱତୀ ଶିଶୁମନ୍ଦିର ସିନାପାଲିର ସିନିୟର ଗୁରୁଜୀ ଶ୍ରୀମତୀ ରଂଜିତା ଠାକୁର, କାପସି ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀଯୁକ୍ତ ବିଜୟ କୁମାର ସାହୁ, ଡ଼ଙ୍ଗରିପାଲି ଓ ବିନିକା ଶିଶୁବିକାଶ ବିଦ୍ୟାମନ୍ଦିରର ସମ୍ପାଦକ ଶ୍ରୀଯୁକ୍ତ ଶୁଧାଂଶୁ ମହାକୁଡ଼ ଓ ଶ୍ରୀଯୁକ୍ତ ସୂର୍ଯ୍ୟନାରାୟଣ ପାଢ଼ୀ, ବିନିକା ସିଦ୍ଧାର୍ଥ ଜୁନିଅର କଲେଜର ଇତିହାସ ଅଧ୍ୟାପକ ଶ୍ରୀଯୁକ୍ତ ଅଭିଳାଷ ମିଶ୍ର, ନୀଳଜି ଉଚ୍ଚ ପ୍ରାଥମିକ ବିଦ୍ୟାଳୟ ର ପ୍ରଧାନ ଶିକ୍ଷକ ଶ୍ରୀଯୁକ୍ତ ସତ୍ୟବ୍ରତ ଗହୀର  ଏବଂ ସିନାପାଲି ଗାୟତ୍ରୀମନ୍ଦିରର ପୂର୍ବତନ ଫାଉଣ୍ଡର ସଭାପତି ଶ୍ରୀଯୁକ୍ତ ନୂନ କରଣ ଅଗ୍ରୱାଲ ମଞ୍ଚାସୀନ ଥିଲେ।
ବିଦ୍ୟାଳୟ ପକ୍ଷରୁ ସୂଚନା ମିଳିଛି ଯେ ବର୍ତ୍ତମାନ ପ୍ରାରମ୍ଭରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠଦାନ ଚାଲିବ। ଏହି ଶୁଭ ଅବସରରେ ନୂଆପଡା ଜିଲ୍ଲାର ସିନାପାଲି ବ୍ଲକ ଖଳନା ନିବାସୀ ଫଳିନ୍ଦ୍ର ମହାନନ୍ଦ ଓ ତାଙ୍କ ଧର୍ମପତ୍ନୀ ଯଶୋବନ୍ତି ମହାନନ୍ଦଙ୍କ କନ୍ୟା ବନ୍ଦନା ମହାନନ୍ଦ ପ୍ରଥମ ଭର୍ତ୍ତି ହୋଇ ବିଦ୍ୟାଳୟର ଶୁଭାରମ୍ଭ କରିଥିଲେ। ଏ ଦୃଶ୍ୟ ଦେଖି ଅନେକଙ୍କ ଆଖିରେ ଖୁସିର ଲୁହ ଝରିପଡ଼ିଥିଲା।
ସକାଳୁ ଶଙ୍ଖଧ୍ୱନି, ବେଦମନ୍ତ୍ର ଓ ପୂଜାପାଠରେ ସାରା ପରିବେଶ ପବିତ୍ର ହୋଇଯାଇଥିଲା। ଫୁଲରେ ସଜା ମଞ୍ଚ, ରଙ୍ଗୋଳିରେ ଶୋଭିତ ପ୍ରାଙ୍ଗଣ ଓ ଦୀପ ପ୍ରଜ୍ଜ୍ୱଳନ ସହ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଛୁଆମାନଙ୍କ ସଂସ୍କୃତିକ ପ୍ରସ୍ତୁତି ସମସ୍ତଙ୍କ ମନକୁ ମୋହିନେଇଥିଲା।
ବକ୍ତାମାନେ କହିଥିଲେ—
“ଏହି ବିଦ୍ୟାଳୟ କେବଳ ପଢ଼ାଶୁଣାର କେନ୍ଦ୍ର ନୁହେଁ, ଏହା ଭଲ ମଣିଷ ଗଢ଼ିବାର ପବିତ୍ର ତୀର୍ଥ।”
ଆଧୁନିକ ଶିକ୍ଷା ସହ ସଂସ୍କାର, ନୈତିକ ମୂଲ୍ୟବୋଧ ଓ ଦେଶପ୍ରେମର ଶିକ୍ଷା ଦେଇ ଛାତ୍ରଛାତ୍ରୀଙ୍କ ସାର୍ବାଙ୍ଗୀଣ ବିକାଶ ଉପରେ ଗୁରୁତ୍ୱ ଦିଆଯିବ ବୋଲି ସେମାନେ ଆଶ୍ୱାସନ ଦେଇଥିଲେ।
ଏହି ପ୍ରତିଷ୍ଠା ଉତ୍ସବ ସିନାପାଲି ଅଞ୍ଚଳ ପାଇଁ କେବଳ ଗୋଟିଏ କାର୍ଯ୍ୟକ୍ରମ ନୁହେଁ, ବରଂ ନୂଆ ଶିକ୍ଷା ଯୁଗର ଆରମ୍ଭ। ଅଞ୍ଚଳବାସୀଙ୍କ ମନରେ ନୂଆ ସ୍ୱପ୍ନ ଓ ନୂଆ ଆଶା ଜାଗ୍ରତ ହୋଇଛି। ଏହି ବିଦ୍ୟାଳୟ ଆଗାମୀ ଦିନରେ ଜ୍ଞାନର ଦୀପ ଜଳାଇ ସମାଜକୁ ଆଲୋକିତ କରିବ l