03-Feb-2026

ବଲାଙ୍ଗିର(ପ୍ରେରଣା ଖବର):ସାରା ଦେଶରେ ୟୁଜିସି ବିଲକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଛି। ସମାଜରୁ ଜାତିଭେଦ ଦୂରେଇ ଥିବା ବେଳେ ନିଜେ କେନ୍ଦ୍ରସରକାର ଜାତିଭେଦପ୍ରଥାକୁ ପ୍ରୋତ୍ସାହିତ କରୁଛନ୍ତି । ବିଲରେ ଯେଭଳି ବ୍ୟବସ୍ଥା ରହିଛି କେବଳ ବ୍ରାହ୍ମଣ ମାନେ ଦୋଷି ବୋଲି ସିଧାସଳଖ ସରକାର ବିଚାରକରି କରିଛନ୍ତି ଯାହାକି ସଂପୂର୍ଣ୍ଣ ମିଥ୍ୟା ଓ ତୃଟିପୂର୍ଣ୍ଣ ବୋଲି କହି ଆଜି ବଲାଙ୍ଗୀର ଜିଲ୍ଲା ବ୍ରାହ୍ମଣମହାସଭା ପକ୍ଷରୁ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲା ପ୍ରଶାସନକୁ ଦାବିପତ୍ର ପ୍ରଦାନ କରାଯାଇଛି । ବ୍ରାହ୍ମଣ ମହାସଭାର ଜିଲ୍ଲା ସଭାପତି ପ୍ରଣାଵଲ୍ଲଭ ତ୍ରିପାଠୀ, 

ଉପସଭାପତି କିଶୋର କୁମାର ପୁରୋହିତ ଓ ସଂପାଦକ ନରେନ୍ଦ୍ରକୁମାର ଆଚାର୍ଯ୍ୟଙ୍କ ନେତୃତ୍ୱରେ ଶତାଧିକ ସଭ୍ୟ/ସଭ୍ୟା ଆସି ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ୟୁଜିସି ବିଲକୁ କେନ୍ଦ୍ରସରକାର ତୁରନ୍ତ ସଂପୂର୍ଣ୍ଣ ରୂପେ ପ୍ରତ୍ୟାହାର ଦାବିରେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପ୍ରଶାସନକୁ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଉଲ୍ଲେଖ କରାଯାଇଛି ଯେ, ୟୁଜିସି କେବଳ ଭୋଟବ୍ୟାଙ୍କ ସୃଷ୍ଟି ପାଇଁ କରାଯାଇଛି। ବିଲରେ ଜାତିଗତ ବିଦ୍ୱେଶ ସୃଷ୍ଟି କରା ଯାଇ ଦେଶକୁ ଭୁଲରାସ୍ତାରେ ନେବାକୁ ଉଦ୍ୟମ ହେଉଛି । ଆଜି ପର୍ଯ୍ୟନ୍ତ

ଏସସି/ଏସଟି ଆଟ୍ରୋସିଟିର ବହୁଳ ମାତ୍ରାରେ ଅପବ୍ୟବହାର ହେଉଛି ଓ ଏହି ବିଲ ଆସିଲେ ବିଶ୍ୱବିଦ୍ୟାଳୟ ମାନଙ୍କରେ ଛାତ୍ରଛାତ୍ରୀଙ୍କ ମଧ୍ୟରେ ଆହୁରି ବିଭେଦ ସୃଷ୍ଟିହେବାକୁ ଯାଉଛି । ବିଲରେ ଏସ/ଏସଟି.ଓବିସି ବର୍ଗର ସଭ୍ୟ ଇକ୍ୟୁଟି କମିଟିରେ ରଖାଯାଇଥିବା ବେଳେ ସାଧାରଣବର୍ଗର ସଭ୍ୟ ରଖିବାର ପ୍ରାବଧାନ ନାହିଁ । ଠିକ ସେହିପରି ଯେଉଁମାନେ ଅଭିଯୋଗ କରିଥିବେ ସେମାନଙ୍କ ଅଭିଯୋଗ ମିଥ୍ୟା ପ୍ରମାଣିତ ହେଲେ ସେମାନେ ବିଲର ଅପବ୍ୟବହାର କରିଥିବା ଅଭିଯୋଗରେ ଦଣ୍ଡିତ ହେବାର ବ୍ୟବସ୍ଥା ମଧ୍ୟ ରଖାଯାଇ ନାହିଁ । ଫଳରେ କେବଳ ସାଧାରଣବର୍ଗର ଛାତ୍ରଛାତ୍ରୀ ସବୁବେଳେ ଭୟର ବାତାବରଣ ମଧ୍ୟ ରହି ମାନିସକଚାପରେ ପାଠ ମଧ୍ୟ ପଢି ପାରିବେ ନାହିଁ । ଏହା ସମ୍ବିଧାନର ଧାରା ୧୪ର ସଂପୂର୍ଣ୍ଣ ଉଲଂଘନ ହେଉଛି ଓ ବ୍ରାହ୍ମଣମାନଙ୍କର ବଞ୍ଚିବାର ଅଧିକାରର ହନନ ହେବ ବୋଲି କୁହାଯାଇଛି । ସମ୍ବିଧାନରେ କୌଣସି ଜାତି,ବର୍ଣ୍ଣ ଓ ଧର୍ମକୁ ନେଇ ବିଭେଦ କରାଯାଇ ପାରିବ ନାହିଁ ବୋଲି ନୀୟମ ରହିଥିବା ବେଳେ ଏହି ୟୁଜିସି ବିଲ ଏହି ନୀୟମକୁ ବିରୁଦ୍ଧାଚରଣ କରୁଛି ତେଣୁ ତୁରନ୍ତ ଏଭଳି ବିବାଦୀୟ ବିଲକୁ ପ୍ରତ୍ୟାହାର କରାଯାଉ ବୋଲି ବ୍ରାହ୍ମଣ ମହାସଭା ଦାବି କରିଛି । ଆଜିର ଏହି କାର୍ଯ୍ୟକ୍ରମରେ କୋଷାଧ୍ୟକ୍ଷ ସଂକିର୍ତ୍ତନ ମିଶ୍ର, ଯୁଗ୍ମସଂପାଦକ ସୋମନାଥ ମିଶ୍ର, ରାକେଶ ପଣ୍ଡା,କାହ୍ନା ଶତପଥି,ବିଜୟଲକ୍ଷ୍ମୀ ମିଶ୍ରଙ୍କ ସମେତ ଶତାଧିକ ସଭ୍ୟ/ସଭ୍ୟା ସାମିଲ ହୋଇଥିଲେ ।