30-Jan-2026

ବଲାଙ୍ଗିର(ଦେବାଶିଷ ବହିଦାର):  ରୋଜଗାର ଏବଂ ଜୀବିକା ପାଇଁ ଗ୍ୟାରେଣ୍ଟି ମିଶନ (ଗ୍ରାମୀଣ) ବିକଶିତ ଭାରତ ଜୀ ରାମ ଜୀ ବିଲ୍-୨୦୨୫ ଆଇନ ଉପରେ ଏକ କର୍ମଶାଳା ଭୀମଭୋଇ ମେଡିକାଲ ଅଡିଟୋରିୟମ୍ ହଲରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ମାନ୍ୟବର ମନ୍ତ୍ରୀ, ପଞ୍ଚାୟତରାଜ ଏବଂ ପାନୀୟ ଜଳ ବିଭାଗ, ଓଡିଶା ସରକାର ରବି ନାରାୟଣ ନାଏକ ମୁଖ୍ୟ ଅତିଥି ଭାବେ ଉପସ୍ଥିତ ଥିଲେ । ସମ୍ମାନିତ ଅତିଥି ଭାବେ ଲୋକସଭା ସାଂସଦ ସଙ୍ଗୀତା କୁମାରୀ ସିଂହଦେଓ, ଟିଟିଲାଗଡ ବିଧାୟକ ନବୀନ ଜୈନ, ଜିଲ୍ଲାପାଳ ଗୌରୱ ଶିୱାଜୀ ଇସଲୱାର ଏବଂ  ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀ ତରଣୀ ସୁନା ପ୍ରମୁଖ ମଞ୍ଚାସିନ ଥିଲେ । ଏହି ନୂଆ ଆଇନ ଗ୍ରାମୀଣ ପରିବାର ପାଇଁ ପ୍ରତି ଆର୍ଥିକ ବର୍ଷରେ ବୈଧାନିକ ମଜୁରି ଭିତ୍ତିକ ନିଯୁକ୍ତି ଗ୍ୟାରେଣ୍ଟିକୁ ୧୨୫  ଦିନକୁ ବୃଦ୍ଧି କରିଛି । ଏହା ସଶକ୍ତିକରଣ ଓ ସମାବେଶୀ ଅଭିବୃଦ୍ଧି ସୁନିଶ୍ଚିତ କରିବା ସହ ଏକ ସମୃଦ୍ଧ, ସ୍ଥିର ଏବଂ ଆତ୍ମନିର୍ଭରଶୀଳ ଗ୍ରାମୀଣ ଭାରତ ପାଇଁ ମୂଳଦୁଆକୁ ମଜବୁତ କରିବ । ଏହା ଆଧୁନିକ ବୈଧାନିକ ଢାଞ୍ଚା ପ୍ରଦାନ କରିବ ଏବଂ ବିକଶିତ ଭାରତ ୨୦୪୭ର ଜାତୀୟ ଲକ୍ଷ୍ୟକୁ ସାକାର କରିବା ଲାଗି ଜୀବିକା ସୁରକ୍ଷାକୁ ବୃଦ୍ଧି କରିବ । ଏହା ମଜୁରି ସୁରକ୍ଷାକୁ ସୁଦୃଢ଼ କରିବ ଏବଂ ଶ୍ରମିକମାନଙ୍କୁ ବିଳମ୍ବରେ ପାଉଣା ପାଇବାରୁ ରକ୍ଷା କରିବ । ଏହା ରୋଜଗାର ତଥା ବେକାରୀ ଭତ୍ତା ପାଇଁ ବୈଧାନିକ ଅଧିକାରକୁ ସମ୍ପୂର୍ଣ୍ଣ ସଂରକ୍ଷିତ କରିବ। ବିକଶିତ ଭାରତ ଜୀ ରାମ ଜୀ ଆଇନର ଦ୍ଵାରା ଆମେ ବଲାଙ୍ଗିର ଜିଲ୍ଲାକୁ ଦାଦନ ମୁକ୍ତ କରାଯିବ, ଏହା ଲୋକଙ୍କୁ ସେମାନଙ୍କ ଅଞ୍ଚଳରେ ଗ୍ୟାରେଣ୍ଟି କାମ ଯୋଗାଇବ ଏବଂ ସେମାନଙ୍କ ଆର୍ଥିକ ସ୍ଥିତିକୁ ସୁଦୃଢ କରିବ । ଏହି ଯୋଜନା ଗ୍ରାମୀଣ ନିଯୁକ୍ତି ଏବଂ ବିକାଶ ପାଇଁ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ବଲାଙ୍ଗିର ଭଳି ଦାଦନ ପ୍ରବଣ ଅଞ୍ଚଳରେ ଏହି କଲ୍ୟାଣକାରୀ ଯୋଜନାକୁ ସୂଚାରୁ ରୂପେ କାର୍ଯ୍ୟକାରୀ କରାଯିବ; ଯଦ୍ଵାରା ତୃଣମୂଳସ୍ତରରେ ଲୋକ ଉପକୃତ ହୋଇପାରିବେ ଏବଂ ବଲାଙ୍ଗିର ଜିଲ୍ଲା ଦାଦନ ମୁକ୍ତ ହୋଇପାରିବ । ଏହା ସହ ବିକଶିତ ଭାରତ ଜୀ ରାମ ଜୀ ଭଳି କଲ୍ୟାଣକାରୀ ଯୋଜନାର ଲକ୍ଷ୍ୟ ଓ ଉପକାରିତା ସମ୍ପର୍କରେ ଲୋକଙ୍କୁ ଅବଗତ କରାଯିବା ସହ ପ୍ରଧାନମନ୍ତ୍ରୀଙ୍କ ବାର୍ତ୍ତା ଅତିଥି ବୃନ୍ଦ ଲୋକଙ୍କୁ ଦେଇଥିଲେ । ଆଜିର ଏହି କାର୍ଯ୍ୟକ୍ରମରେ ଜିଲ୍ଲାର ସମସ୍ତ ଗୋଷ୍ଠୀ ଉନ୍ନୟନ ଅଧିକାରୀ, ଜିଆରଏସ, ପିଇଓ ପ୍ରମୁଖ ଉପସ୍ଥିତ ଥିଲେ ।