29-Jan-2026

ପୂର୍ଣ୍ଣ ଚନ୍ଦ୍ର ପଣ୍ଡା

ଖୁସିର କଥା ଫେବୃୟାରୀ ୧ ତାରିଖରେ ପବିତ୍ର ମାଘମେଳା ଅବସରରେ ସୁବର୍ଣ୍ଣପୁର ଜିଲ୍ଲାର ଖଲିଆପାଲି ସ୍ଥିତ ସନ୍ଥକବି ଭୀମଭୋଇଙ୍କ ସାଧନା,ସିଦ୍ଧି ଓ ସମାଧିପୀଠକୁ ପ୍ରଥମଥର ପାଇଁ ଓଡିଶାର ମୁଖ୍ୟମନ୍ତ୍ରୀ ମୋହନଚରଣ ମାଝୀ ଦର୍ଶନ ପାଇଁ ଆସୁଛନ୍ତି । ଏହା ସହିତ ସୋନପୁରର ପ୍ରସିଦ୍ଧ ଗୋପାଳଜୀ ମନ୍ଦିରର ବିଗ୍ରହ ପୁନଃସ୍ଥାପନ କାର୍ଯ୍ୟକ୍ରମରେ ମଧ୍ୟ ସାମିଲ ହେଉଛନ୍ତି । ତାଙ୍କର ଏହି  ଗୁରୁତ୍ୱପୂର୍ଣ୍ଣ ଓ ଐତିହାସିକ ଗସ୍ତକୁ ଆମେ ସ୍ୱାଗତ କରୁଛୁ ।

ମହିମାଧର୍ମରେ ଯୋରନ୍ଦାର ମୁଖ୍ୟପୀଠ ପରେ ଖଲିଆପାଲି ହେଉଛି ଦ୍ୱିତୀୟ ପ୍ରମୁଖପୀଠ । ଏହି ପୀଠରୁ ସନ୍ଥକବି ବିଶ୍ୱ କଲ୍ୟାଣ ପାଇଁ ମହିମା ଅଲେଖ ଡାକଦେଇ  ତାଙ୍କର ମହାନପଙ୍କତି “ପ୍ରାଣୀଙ୍କ ଆରତ ଦୁଃଖ ଅପ୍ରମିତ ଦେଖୁଦେଖୁ କେବା ସହୁ..ମୋଜୀବନ ପଛେ ନର୍କେ ପଡିଥାଉ ଜଗତ ଉଦ୍ଧାର ହେଉ”(ସ୍ତୁତିଚିନ୍ତାମଣୀ) ରଚନା କରିଥିଲେ । ୧୮୭୭ ମସିହାରୁ ଏହିପୀଠଟି ସ୍ଥାପନ ହୋଇଥିବା ବେଳେ ଅନେକ ସମୟରେ ଭାରତର କୋଣଅନୁକୋଣ ତଥା ବିଦେଶରୁ ଗବେଷକ, ପର୍ଯ୍ୟଟକ, ବୁଦ୍ଧିଜୀଵୀ,ସାମ୍ବାଦିକ, ରାଜନେତା ଆସି ଏହିପୀଠରେ ଦର୍ଶନ କରିଯାଇଛନ୍ତି । ଦୁଇଜଣ ରାଜ୍ୟପାଳ ମୂରଲୀଧର ଚନ୍ଦ୍ରକାନ୍ତ ଭଣ୍ଡାରେ ଓ ପ୍ରଫେସର ଗଣେଶୀଲାଲ ଏହି ପୀଠକୁ ଆସି ଦର୍ଶନ କରିଥିଲେ । କିନ୍ତୁ ଆଜି ପର୍ଯ୍ୟନ୍ତ କୌଣସି ମୁଖ୍ୟମନ୍ତ୍ରୀ ଆସି ପରିଦର୍ଶନ କରିନଥିଲେ । ୧୮୯୭ ମସିହାରେ କୌଣସି ରାଜାଙ୍କ ପୃଷ୍ଠପୋଷକତା ବିନା ଏଠାରେ ଭକ୍ତଙ୍କ ଦାନରେ ସନ୍ଥକବିଙ୍କ ସମାଧିମନ୍ଦିର ନିର୍ମାଣ  ହୋଇଥିଲା । ପୂର୍ବରୁ ମହିମା ସାଧୁସନ୍ଥଙ୍କ ଦ୍ୱାରା କେବଳ ଏହି ପୀଠଟି ପରିଚାଳିତ ହେଉଥିବା ବେଳେ ୧୯୯୯ ମସିହାରେ ସମାଧି ପୀଠ ଟ୍ରଷ୍ଟ ଗଠନ ହୋଇ ଜିଲ୍ଲାପ୍ରଶାସନ ଓ ଟ୍ରଷ୍ଟପରିଚାଳନା କମିଟି ଦ୍ୱାରା ପରିଚାଳିତ ହେଉଛି । ହଜାର ହଜାର ମହିମା ଧର୍ମି, ସାଧୁସନ୍ଥଙ୍କ ଆଗମନ ହେଉଛି । ଟ୍ରଷ୍ଟଗଠନ ପରେ ପୀଠର ଅନେକଗୁଡିଏ ବିକାଶ ହୋଇଛି । କିନ୍ତୁ ଜଣେ ସନ୍ଥଙ୍କ ପୀଠକୁ ସରକାରମାନେ ଯେତେ ଗୁରୁତ୍ୱଦେବା କଥା ସେଥିରୁ କମ ଗୁରୁତ୍ୱ ମିଳିଥିବା ଆଲୋଚନା ହୁଏ । ପୀଠଟି ପଶ୍ଚିମାଞ୍ଚଳ ରେ ଥିବା କାରଣରୁ ସରକାରମାନେ କମ୍ ଗୁରୁତ୍ୱ ଦେଉଥିବା ମଧ୍ୟ ଅଭିଯୋଗ ହୁଏ । ମହିମା ଧର୍ମ ହେଉଛି ଓଡିଶାର ନିଜସ୍ଵ ଧର୍ମ l ଓଡିଶା ମାଟିରୁ ଏହି ଧର୍ମ ସମଗ୍ର ବିଶ୍ୱରେ ପ୍ରଚାରିତ ହୋଇ ଚାଲିଛି l ତେଣୁ ଓଡ଼ିଆ ଅସ୍ମିତାକୁ ନେଇ ଏହି ପୀଠର ସୁରକ୍ଷା ପାଇଁ ଆଗକୁ ମୁଖ୍ୟମନ୍ତ୍ରୀ ମୋହନଚରଣ ମାଝିଙ୍କ ଗସ୍ତ ପରେ କିଛି ଅଧିକ ଉନ୍ନୟନ ପ୍ରକଲ୍ପ ନିଶ୍ଚୟ ଆସିବ ବୋଲି ଆଶା କରାଯାଉଛି । ସୁବର୍ଣ୍ଣପୁର ଜିଲ୍ଲାର ଭବିଷ୍ୟତ ପର୍ଯ୍ୟଟନ, ଜଳସେଚନ ଓ ନୂତନ ପ୍ରତିଷ୍ଠାନ ସ୍ଥାପନ ଉପରେ ନିର୍ଭର କରୁଛି । ଐତିହ୍ୟଭରା ସୋନପୁର ସହରକୁ ମନ୍ଦିରମାଳିନୀ ଦ୍ୱିତୀୟବାରାଣସି ବୋଲି ଅଭିହିତ କରାଯାଏ । ଠିକ ସେହିପରି ସନ୍ଥକବିଙ୍କର ଖଲିଆପାଲି ପୀଠ, ପାତାଳୀ ଶ୍ରୀକ୍ଷେତ୍ର, ବିନିକାର ପାପକ୍ଷୟ ଘାଟ,ଚରଦାର ଚରଦେଇ ପୀଠ,ରାମପୁର ନିକଟସ୍ଥ ପୂଜାଡୁଙ୍ଗୁରୀ, ତରଭା ନିକଟସ୍ଥ ଚୁଡାଖାଇ ପାହାଡ ଇତ୍ୟାଦି ଅନେକ ପର୍ଯ୍ୟଟନ କ୍ଷେତ୍ର 

ରହିଛି। ବାରପାହାଡ ଦେବୀପୀଠ ସମେତ ଦେଉଳଝରି, ସିଙ୍ଗଜୁରୀକଟା ଓ ଆଉ ଅନେକ ଇକୋଟୁରିଜମର ସମ୍ଭାବନା ରହିଛି । ଏହାର ବିକାଶ କରାଗଲେ ସୁବର୍ଣ୍ଣପୁର ଜିଲ୍ଲାର ସ୍ୱର୍ଣ୍ଣିମ ଅଧ୍ୟାୟ ପୁଣିଥରେ ଯୋଡିହେବ । ଠିକ ସେହିପରି ମହାନଦୀ ରେ ମହାବ୍ୟାରେଜର ନିର୍ମାଣ ଓ ପ୍ରସ୍ତାବିତ ମତ୍ସ୍ୟ ମହାବିଦ୍ୟାଳୟ ସ୍ଥାପନ ବାସ୍ତବରୂପ ପାଇଲେ ସୁବର୍ଣ୍ଣପୁରର ଭବିଷ୍ୟତ ଉଜ୍ଜଳମୟ ହେବ । ଧାନଉତ୍ପାଦନରେ ସୋନପୁର ଏକ ଆଗଧାଡିର ଜିଲ୍ଲା । ଏହା ସହିତ ବୟନଶୀଳ୍ପର ବିକାଶ ମଧ୍ୟ ଆବଶ୍ୟକ । ସେହିଦୃଷ୍ଟିରୁ ସରକାର କେତେ ଆଗଭର ଓ କଣ ଯୋଜନା କରୁଛନ୍ତି ତାହା ସମୟ କହିବ । କିନ୍ତୁ ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କର ବିଗତ ୧୮ମାସର ଶାସନ ସମୟରେ ତାଙ୍କର ଏହା ଦ୍ୱିତୀୟ ଗସ୍ତ । ସୁବର୍ଣ୍ଣପୁର ଜିଲ୍ଲାବାସୀ ନିହାତି ବଡକିଛି ଆଶା କରିବା ବାଞ୍ଛନୀୟ । ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କର ଏହି ଗସ୍ତକୁ ସ୍ୱାଗତ କରିବା ସହ ଓ ଜିଲ୍ଲାବାସୀ ସମସ୍ତେ ତାଙ୍କର ଗସ୍ତକୁ ସ୍ୱାଗତ କରିବାକୁ ଅନୁରୋଧ କରାଯାଇଛି । ମନେ ପକାଇ ଦେଉଛୁ ନିର୍ବାଚନ ପୂର୍ବରୁ ଗୃହମନ୍ତ୍ରୀ ଅମିତ ଶାହା ଆସି ଯେଉଁ ପ୍ରତିଶୃତି ଦେଇଯାଇଥିଲେ ତାହାକୁ ରାଜ୍ୟସରକାର ନିଶ୍ଚୟ ପୂରଣ କରିବେ ବୋଲି ଆଶା ଓ ବିଶ୍ୱାସ ।