27-Jan-2026

ବଲାଙ୍ଗିର(ଦେବାଶିଷ ବହିଦାର): ରାଜ୍ୟ ଆଇନ ସେବା ପ୍ରାଧିକରଣ ର ନିର୍ଦ୍ଦେଶ କ୍ରମେ ତଥା ଜିଲ୍ଲା ଆଇନ ସେବା ପ୍ରାଧିକରଣର ଭାରପ୍ରାପ୍ତ ଅଧ୍ୟକ୍ଷ ମଳୟ ରଂଜନ ଦାସଙ୍କ ଅନୁମତି କ୍ରମେ ବଲାଙ୍ଗୀର ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ବଲାଙ୍ଗୀର ଯୁଧିଷ୍ଠିର ମିଶ୍ର ଆଇନ ମହାବିଦ୍ୟାଳୟ ଠାରେ "କାର୍ଯ୍ୟସ୍ଥଳରେ ମହିଳା ଯୌନ ନିର୍ଯ୍ୟାତନା ରୋକାଥାମ, ନିଷେଧ, ପ୍ରତିକାର ଆଇନ ଓ ସାମ୍ବିଧାନିକ ଅଧିକାର" ଉପରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି । 

ଏହି ଶିବିରରେ ଜିଲ୍ଲା ଆଇନ ସେବା ପ୍ରାଧିକରଣର ଭାରପ୍ରାପ୍ତ ଅଧକ୍ଷ ଶ୍ରୀଯୁକ୍ତ ଦାସ ଯୋଗ ଦେଇ କର୍ମ କ୍ଷେତ୍ରରେ ମହିଳାମାନେ କିଭଳି ଭାବରେ ସୁରକ୍ଷିତ ରହିବା ସହିତ, ମର୍ଯ୍ୟାଦାପୂର୍ଣ୍ଣ ସହିତ କାର୍ଯ୍ୟ ନିରୂପଣ କରିବେ ଓ ନାଗରିକର ସାମ୍ବିଧାନିକ କର୍ତ୍ତବ୍ୟ ମହିଳାମାନଙ୍କ ଉଦ୍ଦେଶ୍ୟରେ ଗୁରୁତ୍ୱାରୋପ କରିଥିଲେ । ଉକ୍ତ ଶିବିରରେ ଶ୍ରୀଯୁକ୍ତ ବିକ୍ରମ କେଶରୀ ପଟ୍ଟନାୟକ ଜଜ୍ ଫ୍ୟାମିଲି କୋର୍ଟ ଯୋଗ ଦେଇ ନାରୀମାନଙ୍କୁ ସମ୍ମାନ ଦେବା ସହିତ ସେମାନଙ୍କର ସୁରକ୍ଷା ଉପରେ ଆଲୋକପାତ କରିଥିଲେ । ଏଥିରେ ପ୍ରାଧିକରଣର ସଚିବ ଶ୍ରୀଯୁକ୍ତ ପବିତ୍ରାନନ୍ଦ ପ୍ରଧାନ PosH ଆଇନର ଉଦ୍ଦେଶ୍ୟ, ଅଭିଯୋଗ ପ୍ରଣାଳୀ, ଅଭିଯୋଗ ନିବାରଣ ସମ୍ପର୍କରେ ସୂଚନା ଦେବାସହିତ ପ୍ରତ୍ୟେକ କାର୍ଯ୍ୟାଳୟରେ ଆନ୍ତରିକ ଅଭିଯୋଗ ସମିତି ଗଠନ ଏବଂ ସକ୍ରିୟତା ସହିତ ଏବଂ ମହିଳାମାନେ ନିର୍ଭୟରେ ତାଙ୍କର ଅଭିଯୋଗ ଦାଖଲ କରିବା ଏବଂ ନିର୍ଦ୍ଧିଷ୍ଟ ସମୟ ବ୍ୟବଧାନରେ ଅଭିଯୋଗର ସମାଧାନ ଉପରେ ଅବଗତ କରାଇଥିଲେ । ଏଥିରେ ବଲାଙ୍ଗୀର ଅତିରିକ୍ତ ଆରକ୍ଷୀ ଅଧିକାରୀ  ଗୁଣନିଧି ମଲ୍ଲିକ ଯୋଗ ଦେଇ ମହିଳାମାନଙ୍କୁ ସୁରକ୍ଷା ଦେବାରେ ପୋଲିସର ଭୂମିକା ଉପରେ ଗୁରୁତ୍ୱାରୋପ କରିଥିଲେ । ମହାବିଦ୍ୟାଳୟର ଭାରପ୍ରାପ୍ତ ଅଧ୍ୟକ୍ଷ  ଚଣ୍ଡିପ୍ରସାଦ ଖମାରୀ ସ୍ୱାଗତ ଭାଷଣ ଦେବା ସହିତ ଆଇନ ଛାତ୍ରଛାତ୍ରୀମାନଙ୍କୁ ସେମାନଙ୍କର ସୁସ୍ଥ ରାଷ୍ଟ୍ର ଗଠନ କରିବାରେ ଭୂମିକା ଉପରେ ଆଲୋକପାତ କରିଥିଲେ । ଏଥିରେ ରେଜିଷ୍ଟର ଶ୍ରୀଦିପ ମିଶ୍ର, ଜେ ଏମ ଏଫ ସି. ବଲାଙ୍ଗିର ସାଧକ କାରର୍ଜୀ, ଗ୍ରାମ ନ୍ୟାୟଧିକାରୀ ଶିଶିର କୁମାର ଭୋଇ ଯୋଗ ଦେଇଥିଲେ । ଅଧ୍ୟାପକ ସାର୍ଥକ କୁମାର ରଥ ପ୍ରାରମ୍ଭ ଭାଷଣ ଦେଇଥିଲେ । ଏଥିସ‌ହିତ ଅଧ୍ୟାପକ  ସୁଶୀଲ କୁମାର ଦୀପ, ମହାବିଦ୍ୟାଳୟର କର୍ମକର୍ତ୍ତା, ଛାତ୍ରଛାତ୍ରୀ ମାନେ ଯୋଗ ଦେଇଥିଲେ ।