17-Jan-2026

ଧର୍ମଗଡ଼ (ଜ୍ୟୋତିରଞ୍ଜନ ବେମାଲ )
କଳାହାଣ୍ଡି ଜିଲ୍ଲା ଧର୍ମଗଡ ବ୍ଲକ ଅନ୍ତର୍ଗତ ବେହେରା ଗ୍ରାମ ପଞ୍ଚାୟତର ପିପଲପଡା ପ୍ରାଥମିକ ବିଦ୍ୟାଳୟରେ ଏକ ଅପ୍ରତ୍ୟାଶିତ ଘଟଣା ଘଟିଛି। ମଧ୍ୟାହ୍ନ ଭୋଜନ (ଏମ୍ ଡି ଏମ୍) ସମୟରେ ପିଲାମାନେ ଖାଦ୍ୟ ଗ୍ରହଣ କରୁଥିବା ବେଳେ, ସେହି ସ୍କୁଲର ରୋଷେଇୟା ମାଧୁରୀ ଙ୍କ ସ୍ୱାମୀ ଭାସ୍କର ବାଗ ସେହି ସ୍କୁଲ ର ଶିକ୍ଷକ ରିଶିରାଜ ମେହେର ଙ୍କ  ଉପରେ  ଟାଙ୍ଗିଆ ରେ ଆକ୍ରମଣ କରିଥିବା ଅଭିଯୋଗ ହୋଇଛି।
ଘଟଣା ସମୟରେ ସ୍କୁଲ ପରିସରରେ ଅଫରାତଫରା ସୃଷ୍ଟି ହୋଇଥିବା ସହ ପିଲାମାନେ ଭୟଭୀତ ହୋଇପଡ଼ିଥିଲେ। ଆକ୍ରମଣର କାରଣ ସ୍ପଷ୍ଟ ନହେଲେ ମଧ୍ୟ, ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଚର୍ଚ୍ଚା ଜୋର ଧରିଛି।
ସୂଚନା ପାଇ ତୁରନ୍ତ ସ୍ଥାନୀୟ କୋକସରା ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡ଼ିଛି। ଆହତ ଶିକ୍ଷକଙ୍କୁ ପ୍ରାଥମିକ ଚିକିତ୍ସା ଯୋଗାଇ ଦିଆଯାଇଛି।ଏହି ଘଟଣାକୁ ନେଇ ଶିକ୍ଷକ ମହଳରେ ଅସନ୍ତୋଷ ପ୍ରକାଶ ପାଇଥିବା ବେଳେ, ସ୍କୁଲ ପରିସରର ସୁରକ୍ଷା ବ୍ୟବସ୍ଥା ନେଇ ପ୍ରଶ୍ନ ଉଠିଛି। ପୋଲିସ ମାମଲାର ତଦନ୍ତ ଜାରି ରଖିଛି।