26-Dec-2025

ବଲାଙ୍ଗୀର(ପ୍ରେରଣା ଖବର): ଆଗାମୀ ପୀଢ଼ିକୁ ଗଢିବାକୁ, ସେମାନଙ୍କ ଭିତରେ ସୃଜନ ଭାବ, ସଚେତନତା ସୃଷ୍ଟି ପାଇଁ ସାହିତ୍ୟ ଏକ ବଳିଷ୍ଠ ମାଧ୍ୟମ। ଦ୍ୱନ୍ଦ୍ୱାତ୍ମକ  ଜୀବନରେ ଉଚିତ ମାର୍ଗ ଅନ୍ୱେଷଣ ପାଇଁ ମଧ୍ୟ ସାହିତ୍ୟ  ଆମକୁ ପ୍ରେରଣାଦିଏ ବୋଲି ମତ ଦେଇଛନ୍ତି  ବହୁ ବିଶିଷ୍ଟ ବକ୍ତା। ବଲାଙ୍ଗୀର ବ୍ଲକ ର ସଭାଗୃହ ଠାରେ କବୟିତ୍ରୀ ତଥା ଶିକ୍ଷୟତ୍ରୀ ଶ୍ରୀମତୀ ଜ୍ୟୋତିରାଣୀ ମିଶ୍ରଙ୍କ ଦୁଇଟି କବିତା ସଂକଳନର ପାଠକର୍ପଣ ଅବସରରେ ଏହି ମତ ପ୍ରକାଶ ପାଇଛି। ଅବସରପ୍ରାପ୍ତ ପ୍ରଧାନ ଶିକ୍ଷକ ପ୍ରେମାନନ୍ଦ ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ସାରସ୍ୱତ ସମାରୋହରେ ବଲାଙ୍ଗୀର ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗ ମୁଖ୍ୟ ଅତିଥି ଭାବେ ଯୋଗଦେଇ ଥିବା ବେଳେ ବଲାଙ୍ଗୀର ଗୋଷ୍ଠୀ ଉନ୍ନୟନ ଅଧିକାରୀ ହୃଷିକେଶ ଗଣ୍ଡ, ବଲାଙ୍ଗୀର ଗୋଷ୍ଠୀ ଶିକ୍ଷା ଅଧିକାରୀ ନୀଳମଣି ପଟେଲ, ସମ୍ମାବିତ ଅତିଥି, ଶ୍ରୀମତୀ ବିନୋଦିନୀମିଶ୍ର ସ୍ୱତନ୍ତ୍ର ଅତିଥି, ତଥା କବି ଅଧ୍ୟାପକ ସନ୍ଦୀପ କୁମାର କୁଅଁର ମୁଖ୍ୟବକ୍ତା ଭାବରେ ଯୋଗ ଦେଇ କବୟିତ୍ରୀ ତଥା ଶିକ୍ଷୟତ୍ରୀ ଶ୍ରୀମତୀ ଜ୍ୟୋତିରାଣୀ ମିଶ୍ର ଙ୍କ ଦୁଇଟି କବିତା ସଂକଳନ  ମନ ମନ୍ଦିର ଓ ଶିଶୁ ରତନ କୁ ଲୋକାର୍ପିତ କରି ଶ୍ରୀମତୀ ଜ୍ୟୋତିରାଣୀ ମିଶ୍ର ଙ୍କ କାବ୍ୟ ପ୍ରତିଭାର ବିଭିନ୍ନ ଦିଗ ସମ୍ପର୍କରେ ମତ ଦେଇ ଥିଲେ। କବୟିତ୍ରୀ ଶ୍ରୀମତୀ ମିଶ୍ର ନିଜ ଭାବ ସମ୍ବେଦନଶୀଳତା କୁ ପ୍ରଭୁ ଜଗନ୍ନାଥଙ୍କ ପାଖରେ  ସମର୍ପିତ କରି ବକ୍ତବ୍ୟ  ଦେଇ ଥିଲେ।ପ୍ରାରମ୍ଭରେ ଅତିଥି ମାନେ ସମଲେଶ୍ୱରୀଙ୍କ ପୂଜାର୍ଚନା କରିଥିବା ବେଳେ ପ୍ରିୟା ପରିମିତା ମିଶ୍ର ଓ ସୁଶ୍ରୀ ସଂପୂର୍ଣ୍ଣା ଅଗସ୍ତି ପ୍ରାରମ୍ଭିକ ସଂଗୀତ ଗାନ କରିଥିଲେ। କବି ଦିଲ୍ଲୀପ ମିଶ୍ର ସଭା ସଂଯୋଜନା କରିଥିବା ବେଳେ କବୟିତ୍ରୀ କବିତା ମିଶ୍ର ସମସ୍ତଙ୍କୁ ସ୍ୱାଗତ ସହ ଅତିଥି ପରିଚୟ ପ୍ରଦାନ କରିଥିଲେ। କବି ରତ୍ନମୟ ତ୍ରିପାଠୀ ଭକ୍ତି କବିତା ସଂକଳନ ମନମନ୍ଦିରକୁ ସମୀକ୍ଷା କରିଥିବାବେଳେ କବି ମଦନ ମୋହନ ରଥ  ଶିଶୁ କବିତା ସଂକଳନ ଶିଶୁ ରତନ କୁ ସମୀକ୍ଷା କରିଥିଲେ। ଅନ୍ୟ ମାନଙ୍କ ମଧ୍ୟରେ କବି କଣ୍ଡୁରୀ ଚରଣ ରାଉତ ଓ ଡ଼ ଧର୍ମେନ୍ଦ୍ର ପଧାନ  ବକ୍ତବ୍ୟ ପ୍ରଦାନ କରି ଥିଲେ।ସଦାଇପାଲି  ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରୀ ପ୍ରିୟା ସେଠ, ସ୍ବାତୀ ସେଠ, ରୀତିକା ସାଏ ଓ ସୋନପରି ନୃତ୍ୟ ପରିବେଷଣ କରିଥିଲେ। ଶେଷରେ ଶ୍ରୀମତୀ ପୂଜା ଆରାଧନା ମିଶ୍ର ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ସଦାଇପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରୁ ଅନେକ ଛାତ୍ରୀ ମଧ୍ୟ ସଭା ଶେଷ ପର୍ଯ୍ୟନ୍ତ ରହିଥିଲେ।