26-Dec-2025

ବଲାଙ୍ଗିର(ପ୍ରେରଣା ଖବର): ବଲାଙ୍ଗିରର ଅଗ୍ରଣୀ ସାଂସ୍କୃତିକ ଅନୁଷ୍ଠାନ ଭୂମିକା ଓ ମଠଖାଇ ମହୋତ୍ସବ ପାଳନ କମିଟି ପକ୍ଷରୁ କୃଷ୍ଣଚନ୍ଦ୍ର ମହାପାତ୍ର(କେସି)ଙ୍କ ସ୍ମୃତିରେ ଆୟୋଜିତ ୧୭ତମ ସର୍ବଭାରତୀୟ ବହୁଭାଷୀ ନାଟକ ସମାରୋହ ମଠଖାଇ ମହୋତ୍ସବର ଦ୍ଵିତୀୟ ସନ୍ଧ୍ୟା ସ୍ଥାନୀୟ କୋସଲ କଳାମଣ୍ଡଳ ପଡ଼ିଆରେ ହୋଇଯାଇଛି। ଭୂମିକା ସଭାପତି ଶିରୀଶ ଚନ୍ଦ୍ର ହୋତାଙ୍କ ସଭାପତିତ୍ବରେ ଅନୁଷ୍ଠିତ ଉଦଘାଟନୀ ସଭାରେ ମୁଖ୍ୟଅତିଥି ଭାବରେ ପୂର୍ବତନ ମନ୍ତ୍ରୀ ନିରଞ୍ଜନ ପଟନାୟକ ଯୋଗଦେଇ କହିଥିଲେ ଯେ ବହୁଭାଷୀ ସର୍ବଭାରତୀୟ ନାଟ୍ୟ ସମାରୋହ ମଠଖାଇ ମହୋତ୍ସବ ଓଡିଶା ରେ ପ୍ରଥମ ଓ  ଶ୍ରୀ ନରସିଂହ ମିଶ୍ର ଙ୍କ ମାଟି ପ୍ରତି ମମତା ଅଧିକ ବୋଲି ଏହା ସମ୍ଭବ ହୋଇଛି ବୋଲି କହିଥିଲେ। 
ସେହିପରି ସମ୍ମାନିତ ଅତିଥି ଡ଼ ଉମେଶ ଚନ୍ଦ୍ର ଶତପଥୀ କହିଥିଲେ ଯେ ନାଟକ ସବୁବେଳେ ମଣିଷ ଭିତରେ ରହିଥାଏ ଓ ବିଭିନ୍ନ ସମୟ ରେ ପ୍ରଦର୍ଶନ କରିଥାଏ ବୋଲି କହିଥିଲେ । ପରେ ମହୋତ୍ସବ କମିଟି ଅଧ୍ୟକ୍ଷ ନରସିଂହ ମିଶ୍ର କହିଥିଲେ ଯେ ଏହା କୌଣସି ରାଜନୈତିକ ମଞ୍ଚ ନୁଁହେସେ ଓ ଆମେ ବିଭିନ୍ନ ସମୟ ରେ ବିଭିନ୍ନ ରାଜନୈତିକ ଦଳ ବ୍ୟକ୍ତି ବିଶେଷ ଙ୍କୁ ନିମନ୍ତ୍ରଣ କରିଛୁ ଓ ସେମାନେ ଆସି ଆମକୁ ସହଯୋଗ ମଧ୍ୟ କରିଛନ୍ତି ବୋଲି କହିଥିଲେ। ଆଜିର କାର୍ଯ୍ୟକ୍ରମ ମଞ୍ଚକୁ ନାଟ୍ୟକାର ସ୍ଵର୍ଗତ ବିନୋଦ କୁମାର ପାଶାୟତ ଙ୍କ ଉଦ୍ଦେଶ୍ୟରେ ସମର୍ପଣ କରାଯାଇଥିଲା। ଏହି ଅବସରରେ ଜାତୀୟ ପଦକ ବିଜେତା ସୌରଭ ପଟେଲଙ୍କୁ ମଠଖାଇ ସମ୍ମାନରେ ସମ୍ମାନୀତ କରାଯାଇଥିଲା । ଭୂମିକା ସମ୍ପାଦକ ଅଶୋକ ଦାସ ଅତିଥି ପରିଚୟ ପ୍ରଦାନ କରିଥିବା ବେଳେ ନାଟ୍ୟ ନିଦେଶକ ଜମଲା ଖାନ ଧନ୍ୟବାଦ ଦେଇଥିଲେ।  ସଭାପରେ ସୁନ୍ଦରଗଡ଼ ର  ନବଜୀବନ ସାଂସ୍କୃତିକ ଅନୁଷ୍ଠାନ ତରଫରୁ କୋଶଳୀ ନାଟକ ‘କାଉଁର ’ ମଞ୍ଚସ୍ଥ ହୋଇଥିଲା।