15-Nov-2025

ବରପାଲି (ସୁଦାମ ଦୀପ)
ବରଗଡ ଜିଲ୍ଲା ବରପାଲି ସ୍ଥିତ ଲିଟିଲ୍  ଏଞ୍ଜେଲସ୍ ପବ୍ଲିକ୍ ସ୍କୁଲ ପରିସରରେ ବିଦ୍ୟାଳୟର ୨୫ବର୍ଷ ପୂର୍ତ୍ତି ଅବସରରେ ଉଡାନ୍‌-ମହୋତ୍ସବ ୨୦୨୫ ଓ ଶିଶୁ ଦିବସ ପାଳିତ ହୋଇଯାଇଛି । ବିଦ୍ୟାଳୟ ପରିଚାଳନା ନିର୍ଦ୍ଦେଶିକା ଶ୍ରୀମତୀ ସୁନିତା ମୁଣ୍ଡ ଓ ସଭାପତି ଡ଼ା.ସୁବ୍ରତ ମୁଣ୍ଡ ବିଦ୍ୟାଳୟ ପ୍ରତିଷ୍ଠାତା ସର୍ଗତଃ ଡା.ଧୀରେନ୍ଦ୍ର ନାଥ ମୁଣ୍ଡଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ମାଧ୍ଯମରେ କାର୍ଯ୍ଯକ୍ରମକୁ ଉଦ୍‌ଘାଟନ କରିଥିଲେ। ପରେ ଆୟୋଜିତ କ୍ଲବ ପ୍ରଦର୍ଶନୀ, ଗେମ୍ ଓ ଫୁଡ୍ ଷ୍ଟଲ ଗୁଡିକର ଶୁଭାରମ୍ଭ କରାଯାଇଥିଲା। ଉଡାନ୍ କାର୍ଯ୍ୟକ୍ରମରେ ବିଶିଷ୍ଟ ଅତିଥି ରୂପେ ବହୁମୁଖୀ ପ୍ରତିଭାର ଅଧିକାରିଣୀ ସୁଶ୍ରୀ ବୈଷ୍ଣବୀ ରଣା ଯୋଗଦେଇ ପ୍ରଦୀପ ପ୍ରଜ୍ଜ୍ଵଳନ କରିଥିଲେ।  ବିଦ୍ୟାଳୟର ପରିଚାଳନା ନିର୍ଦ୍ଦେଶିକାଙ୍କ ସହ ବିଦ୍ୟାଳୟ ପ୍ରମୁଖଗଣ ଯୋଗଦେଇ ମଞ୍ଚ କାର୍ଯ୍ୟକ୍ରମକୁ ଉଦ୍‌ଘାଟନ କରିଥିଲେ । ଛାତ୍ରୀ ଶ୍ରଦ୍ଧା ସୁମନ ଦୀପଙ୍କ ସଂଯୋଜନାରେ ଅନୁଷ୍ଠିତ ସଭାରେ ସ୍ୱାଗତ ସମ୍ଭାଷଣ ଓ ଅତିଥିଙ୍କ ପରିଚୟ ପ୍ରଦାନ କଲା ପରେ ପ୍ରିୟାଂଶୁ ପ୍ରୀତମ ତ୍ରିପାଠୀ ଚାଚା ନେହେରୁଙ୍କ ସଂପର୍କରେ ସଂକ୍ଷିପ୍ତ ବକ୍ତବ୍ୟ ପ୍ରଦାନ କରିଥିଲେ । ବିଦ୍ୟାଳୟର ପରିଚାଳନା ନିର୍ଦ୍ଦେଶିକା ବିଶିଷ୍ଟ ଅତିଥିଙ୍କୁ ମାନପତ୍ର ଓ ଉପହାର ପ୍ରଦାନ କଲା ପରେ ଅତିଥି ଶ୍ରୀମଦ ଭଗବତ୍ ଗୀତାର ଦ୍ଵାଦଶ ଅଧ୍ୟାୟ ପାଠ କରିବା ସହ ଶିବସ୍ତୁତି ଜଗନ୍ନାଥ ଅଷ୍ଟକମ ଶ୍ଳୋକ ଆବୃତ୍ତି   କରିଥିଲେ । ପରେ ବିଦ୍ୟାଳୟର ପ୍ରି ନର୍ସରୀରୁ ପଞ୍ଚମ ଶ୍ରେଣୀର ଛାତ୍ରଛାତ୍ରୀ ମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ବିଦ୍ୟାଳୟର କଳା, ବିଜ୍ଞାନ, ସାହିତ୍ୟ ଓ ଇକୋ କ୍ଳବ୍ ଦ୍ୱାରା ପ୍ରଦର୍ଶନୀର ଆୟୋଜନ କରାଯାଇଥିବା ବେଳେ ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀଙ୍କ ମିଳିତ ଉଦ୍ୟମରେ ମନୋରଞ୍ଜନ ଭିତ୍ତିକ  କାର୍ଯ୍ୟକ୍ରମ ଫନ୍ ଫେୟାର ଅନୁଷ୍ଠିତ ହୋଇଥିଲା । ଗତ ଦୁଇବର୍ଷ ଧରି ବିଦ୍ୟାଳୟର ପୁରାତନ ଛାତ୍ର କୁଲଦୀପ ଆନନ୍ଦଙ୍କ ଆବିଷ୍କାର ଉଡାନ୍ ପେ ମାଧ୍ୟମରେ ବିଦ୍ୟାଳୟର ଛାତ୍ରଛାତ୍ରୀ କ୍ରେତା ଓ ବିକ୍ରେତା ସାଜି ସୁରୁଖୁରୁରେ ନିଜ କାର୍ଯ୍ୟ କରିପାରୁଛନ୍ତି । ବିଦ୍ୟାଳୟରେ ପାଠପଢ଼ା ବ୍ୟତୀତ ସୁସଂପର୍କ, ଆନନ୍ଦ ଓ ସୃଜନଶୀଳ ଭାବର ସଂସ୍ଥାପକ- ଏହା ଏହି କାର୍ଯ୍ୟକ୍ରମ ମାଧ୍ଯମରେ ବୁଝି ହେଉଥିଲା | ଏହି କାର୍ଯ୍ୟକ୍ରମକୁ ଶ୍ରୀମତୀ ମଧୁସ୍ମିତା ମୁଣ୍ଡ, ସୁଶୀଳ କୁମାର ରଥ, ମିନତି ପ୍ରଧାନ, ମୃତ୍ୟୁଞ୍ଜୟ ସାହୁ, ରୋହିତ୍ ରୟଙ୍କ ନେତୃତ୍ଵରେ ଛାତ୍ରଛାତ୍ରୀମାନେ ଉତ୍ସାହିତ ହୋଇ ସଫଳ କରିଥିଲେ । ସରୋଜ ଥନାପତି, ତୃଷ୍ଣାମୟୀ ଡନସନା, ସସ୍ମିତା ଗହିର, ରାନୀ ଦଲାଇ, ଗୋପାଳ ନାଗ, ଇତିସ୍ମିତା ମହାଣା, ସଞ୍ଜୁ ସାହୁ, ବଶିଷ୍ଠ ବନ୍ଧୁକୀଙ୍କ ନିର୍ଦ୍ଦେଶନାରେ ସାଂସ୍କୃତିକ କାର୍ଯ୍ୟକ୍ରମ ପ୍ରସ୍ତୁତ ଓ ପରିବେଷଣ କରାଯାଇଥିଲା । ପରିଶେଷରେ ପରିଚାଳନା ନିର୍ଦ୍ଦେଶିକାଙ୍କ ଦ୍ୱାରା ରାଫେଲ ଉଠାଣ ହୋଇ ବିଜୟୀ ବିଜୟିନୀଙ୍କୁ ପୁରସ୍କୃତ କରାଯାଇଥିଲା । ଅଭିଭାବକ ଅଭିଭାବିକା ଓ ଶିକ୍ଷକ ଶିକ୍ଷୟିତ୍ରୀଗଣଙ୍କ ସହଯୋଗିତାରେ ଏହି କାର୍ଯ୍ୟକ୍ରମଟି ସଫଳ ହୋଇ ପାରିଥିଲା ।