13-Nov-2025

କାଲିମେଳା(ସନ୍ତୋଷ କୁମାର ପଣ୍ଡା) ମାଲକାନଗିରି ଜିଲ୍ଲା ରେ ବେଆଇନ ଭାବେ କଇଁଛ ଚାଲାଣ ଏବଂ ବିକ୍ରୟ ବୃଦ୍ଧି ହେଉଥିବା ବେଳେ ବନ ବିଭାଗ ଏହାକୁ ଲଗାମ ଲଗାଇବାରେ ସଫଳ ହେଇଛି । ବିଗତ ଗୋଟିଏ ବର୍ଷ ମଧ୍ୟରେ ବନ ବିଭାଗ ବେଆଇନ ଭାବେ ଚାଲାଣ କରୁଥିବା ବ୍ୟବସାୟିଙ୍କୁ ଧରି କଇଁଛ ଚାଲାଣ ଙ୍କୁ ରୋକିବାରେ ସଫଳ ହୋଇଛି । ମାଲକାନଗିରି ଜିଲ୍ଲା ରେ କଇଁଛ ର ଚାହିଦା ଅଧିକ ଥିବାରୁ ବ୍ୟବସାୟୀ ମାନେ ଆଇନ କୁ ଖାତିର ନକରି କଇଁଛ ଚାଲାଣ କରିଥାନ୍ତି।ଆଜି ବନ ବିଭାଗୀୟ ଅଧିକାରୀ ବିଶେଷ ସୂତ୍ର ଖବର ପାଇ  କାଲିମେଳା ବ୍ଲକ ମାଲାଭରମ ପଞ୍ଚାୟତ ଅନ୍ତର୍ଗତ ଅନନ୍ତପାଲ୍ଲୀ ଠାରେ ବ୍ୟବସାୟୀ ଙ୍କ ଠାରୁ ୮୫ ଟି କଇଁଛ ଜବତ କରିଛନ୍ତି । ସୂଚନା ମୁତାବକ ଫୋରେଷ୍ଟର ଦୀପଙ୍କର ଶିଉଳି ଙ୍କ ତତ୍ୱାବଧାନରେ ଫୋରେଷ୍ଟ ଗାର୍ଡ ପାର୍ଥ ସାରଥୀ ରାଉତ,ବନ ବିଭାଗ ଟିମ୍ ଏବଂ ମୋଟୁ ତହସିଲ ରାଜସ୍ୱ ନିରୀକ୍ଷକ ସୁରେଶ କୁମାର ପୂଜାରୀ ଙ୍କ ସହ ଏକ ଟିମ୍ ଗଠନ କରି ଯୋଜନା ବଦ୍ଧ ଭାବେ ଅନନ୍ତପାଲ୍ଲୀ ଗ୍ରାମ ଅଭିମୁଖେ ଯାଇଥିଲେ । ଅନନ୍ତପାଲ୍ଲୀ ରାସ୍ତାରେ ହିଁ କଇଁଛ ବ୍ୟବସାୟିଙ୍କୁ ଧରିବାରେ ସଫଳ ହୋଇଥିଲେ ବନବିଭାଗ । ମୋଟ ୮୫ ଟି କଇଁଛ ସହ ୩ ଅଭିଯୁକ୍ତ ଏବଂ ୨ଟି ମୋଟରସାଇକଲ ଜବତ କରିଥିଲେ । ଅଭିଯୁକ୍ତ ମାନେ ହେଲେ ଏମ ପି ଭି ୮୧ ଗ୍ରାମର ପ୍ରାନ ଗୋପାଳ ଦାସ(୫୧), ହରଧର ମଣ୍ଡଳ(୩୫) ଏବଂ ସୁଧାଂଶୁ ପାଲ୍। କଇଁଛ ଏବଂ ଅଭିଯୁକ୍ତଙ୍କୁ ଏମ୍ ଭି ୭୯ ବନ ବିଭାଗ କାର୍ଯ୍ୟାଳୟ ରେ ଅଣାଯାଇଥିଲା । ୮୫ କଇଁଛ ମଧ୍ୟରୁ ୩୯ ଟି କଇଁଛ ମୃତ ରହିଥିବା ଜଣାପଡିଛି । କଇଁଛ ଗୁଡିକୁ ଓଜନ କରିବା ପରେ ସ୍ଥାନୀୟ ପ୍ରାଣୀ ଚିକିତ୍ସାଳୟ ନିଆଯାଇ ସ୍ୱାସ୍ଥ୍ୟ ପରୀକ୍ଷା କରି ସୁରକ୍ଷିତ ସ୍ଥାନରେ ଛାଡ଼ିଦିଆ ଯିବା ସହ ଅଭିଯୁକ୍ତ ଙ୍କୁ କୋର୍ଟ ଚାଲାଣ କରାଯାଇଥିବା  ଜଣାପଡିଛି।