17-Sep-2025

କଣ୍ଟାମାଳ, (ଜୟ କୁମାର ମହାରଣା)
 କଣ୍ଟାମାଳ କୁ ସବଡ଼ିଭିଜନ,ଏନଏସି ମାନ୍ୟତା ଦାବି ସହ ଏକ ସବଜେଲ ପ୍ରତିଷ୍ଠା ଦାବିରେ କଣ୍ଟାମାଳ ସଚେତନ ନାଗରିକ ମଞ୍ଚ ପକ୍ଷରୁ ଆସନ୍ତା ୧୯ତାରିଖ ଶୁକ୍ରବାର ଦିନ ସକାଳ ୬ଘଣ୍ଟା ଠାରୁ ସଂଧ୍ୟା ୬ଘଣ୍ଟା ପର୍ଯ୍ୟନ୍ତ ବାର ଘଣ୍ଟିଆ କଣ୍ଟାମାଳ ବନ୍ଦ ଡାକରା ନେଇ କଣ୍ଟାମାଳ ଓକିଲ ସଂଘ ସଭାପତି ଦୂତିଆ ଚରଣ ସାହୁ ଙ୍କ ଅଧ୍ୟକ୍ଷତାରେ କଣ୍ଟାମାଳ ବାର ଆସୋସିଏସନ ଠାରେ ଅନୁଷ୍ଠିତ ଏକ ବୈଠକରେ ନିଷ୍ପତ୍ତି ହୋଇଛି  l  ବୈଠକରେ ଓକିଲ ସଂଘ,ବଣିକ ସଂଘ, ବରିଷ୍ଠ ନାଗରିକ, ଅବସରପ୍ରାପ୍ତ କର୍ମଚାରୀ ସଂଘ ସମେତ ଅଂଚଳର ସଚେତନ ନାଗରିକ ଏବଂ ବିଭିନ୍ନ ସଂଗଠନ ର ସଦସ୍ୟ ଯୋଗଦେଇଥିଲେ  l   ବୌଦ୍ଧ ଜିଲ୍ଲାର ସର୍ବାଧିକ ପଞ୍ଚାୟତ ଓ ଲୋକସଂଖ୍ୟା ଥିବା କଣ୍ଟାମାଳ ବ୍ଲକ କୁ ସବଡ଼ିଭିଜନ ଓ ଏନ୍ଏସି ମାନ୍ୟତା ସହ ଏକ ସବଜେଲ ପ୍ରତିଷ୍ଠା ପାଇଁ ଦୀର୍ଘ ଦିନରୁ ଦାବି ହୋଇ ଆସୁଛି l ସମସ୍ତ ପାରିପାର୍ଶ୍ଵିକ ଦୃଷ୍ଟିରୁ ସବଡ଼ିଭିଜନ, ନୂତନ ଏନଏସି ଓ ସବଜେଲ ନିମନ୍ତେ ଜିଲ୍ଲାର କଣ୍ଟାମାଳ ହିଁ ଏକମାତ୍ର ଦାବିଦାର ରହିଆସିଛି  l  ନୂତନ ଏନଏସି ପାଇଁ ଆବଶ୍ୟକ ସମସ୍ତ ଭିତ୍ତିଭୂମିକୁ ଦୃଷ୍ଟିରେ ରଖି କଣ୍ଟାମାଳ ଓକିଲ ସଂଘ ଓ ଜନସାଧାରଣ ବିଭିନ୍ନ ସମୟରେ ଆନ୍ଦୋଳନ ମାଧ୍ୟମରେ ସରକାରଙ୍କ ନିକଟରେ ଦାବି ରଖି ଆସିଛନ୍ତି  ।  ରାଜ୍ୟରେ ନୂଆ ଏନଏସି ପାଇଁ ଗତ  ଅଗଷ୍ଟ ୩୧ତାରିଖରେ ଡ୍ରାଫ୍ଟ ନୋଟିସ ପ୍ରକାଶ ପାଇଥିଲା। ଏଥିରେ ୧୦ ଜିଲାରେ ୧୬ଏନ୍‌ଏସି ଓ ୩ଜିଲ୍ଲାରେ ୭ଟି ଏନଏସି କୁ ମ୍ୟୁନିସିପାଲିଟି ଗଠନ ହେବା ନେଇ ନଗର ଉନ୍ନୟନ ବିଭାଗ ପକ୍ଷରୁ ବିଜ୍ଞପ୍ତି ଜାରି କରାଯାଇଥିଲା। ହେଲେ ଏହି ବିଜ୍ଞପ୍ତିରେ ବୌଦ୍ଧ ଜିଲ୍ଲାର କଣ୍ଟାମାଳର  କୌଣସି ନାମ ନ ଥିଲା, ଯାହାକୁ ନେଇ କଣ୍ଟାମାଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା। ଯାହାକୁନେଇ କଣ୍ଟାମାଳ ସଚେତନ ନାଗରିକ ମଞ୍ଚ ପକ୍ଷରୁ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଙ୍କ ଉଦ୍ଦେଶ୍ୟରେ ଏକ ଦାବି ପତ୍ର ଗତ ୪ସେପ୍ଟେମ୍ବର ୨୦୨୫ରେ ପ୍ରଦାନ କରାଯାଇଥିଲା   l  ଦାବି ପୂରଣ ସମ୍ପର୍କରେ ସରକାରଙ୍କ ଟାଳଟୁଳ ନୀତି ଯୋଗୁଁ କଣ୍ଟାମାଳ ସଚେତନ ନାଗରିକ ମଞ୍ଚ ବାର ଘଣ୍ଟିଆ କଣ୍ଟାମାଳ ବନ୍ଦ ଡାକରା  ସହ ଆନ୍ଦୋଳନକୁ ଓହ୍ଲାଇଛି   l