03-Sep-2025

ସଂପୃକ୍ତ ବିଭିନ୍ନ ବିଭାଗ ଏବଂ  ଜିଲ୍ଲାପାଳମାନଙ୍କ ସହିତ ଆଲୋଚନା 

ଭୁବନେଶ୍ୱର(ପ୍ରେରଣା ଖବର): “ଏକ ପେଡ଼ ମା’ କେ  ନାମ”- ଅଭିଯାନ ମାଧ୍ୟମରେ ଏକ କାଳୀନ ୭୫ ଲକ୍ଷ ବୃକ୍ଷଚାରା ରୋପଣ ପାଇଁ ପ୍ରସ୍ତୁତି ସଂପର୍କରେ ମୁଖ୍ୟ ଶାସନ ସଚିବ ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଆଜି ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ଗୃହ, ଜଙ୍ଗଲ , ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ସତ୍ୟବ୍ରତ ସାହୁ,  ରାଜସ୍ୱ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ  ଦେଓରଂଜନ କୁମାର ସିଂହ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ କମିଶନର ତଥା ଶାସନ ସଚିବ ଗିରୀଶ ଏସ ଏନ୍‌ଙ୍କ ସମେତ ସଂପୃକ୍ତ ବିଭିନ୍ନ  ବିଭାଗର ବରିଷ୍ଠ  ପଦାଧିକାରୀମାନେ ଉପସ୍ଥିତ ଥିଲେ ।  ବୈଠକରେ ଜିଳ୍ଲାପାଳମାନେ ଆଭାସୀ ମାଧ୍ୟମରେ ଯୋଗ ଦେଇଥିଲେ । 
 ଆଗାମୀ ସେପ୍ଟେମ୍ବର ୧୭ ତାରିଖରେ ମାନ୍ୟବର ପ୍ରଧାନ ମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦୀଙ୍କ ଜନ୍ମ ଦିନରେ ‘ଏକ ପେଡ୍ ମା’ କେ ନାମ’ -୨.୦ ଅଭିଯାନ ରେ  ଗୋଟିଏ ଦିନରେ ଓଡ଼ିଶାରେ ୭୫ ଲକ୍ଷ ବୃକ୍ଷ ଚାରା ରୋପଣ ପାଇଁ ମୁଖ୍ୟମନ୍ତ୍ରୀ ମୋହନ ଚରଣ  ମାଝି ଆହ୍ୱାନ ଦେଇଛନ୍ତି ।  ଏଥିପାଇଁ ପୂର୍ବ ନିର୍ଦ୍ଦେଶିତ ଅନୁସାରେ ପ୍ରସ୍ତୁତି ସଂପର୍କରେ ବୈଠକରେ ସମୀକ୍ଷା କରାଯାଇଥିଲା ।  ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ, କୃଷି ଓ କୃଷକ ସଶକ୍ତିକରଣ ବିଭାଗ ତରଫରୁ ବିଭିନ୍ନ ସ୍ଥାନରେ କିପରି ଚାରାରୋପଣ କରାଯିବ , ସେଥିପାଇଁ ଦିଆଯାଇଥିବା ନିର୍ଦ୍ଦେଶନାମା କିପରି କାର୍ଯ୍ୟକାରୀ ହୋଇଛି, ସେ ସଂପର୍କରେ ସମୀକ୍ଷା କରାଯାଇଥିଲା । ମୁଖ୍ୟ ଶାସନ ସଚିବ  କହିଛନ୍ତି ଯେ ଏକକାଳୀନ  ୭୫ ଲକ୍ଷ ବୃକ୍ଷ ଚାରା ଲଗାଯିବା ଏକ ବୃହତ୍  ଅଭିଯାନ ହେବ ।   ବୃକ୍ଷ ଚାରା ରୋପଣ  ସହିତ  ଏହାକୁ ବଂଚାଇ ରଖିବା ପାଇଁ ତଦାରଖ ବ୍ୟବସ୍ଥାକୁ ସୁବ୍ୟସ୍ଥିତ କରା ଯିବାକୁ ସଂପୃ୍କ୍ତ ବିଭାଗ ଓ ସଂସ୍ଥାମାନଙ୍କୁ  ନିର୍ଦ୍ଦେଶ ଦିଆଯାଇଛି ।  ବୃକ୍ଷ ଚାରା  ରୋପଣ କାର୍ଯ୍ୟକ୍ରମରେ ବିଦ୍ୟାଳୟମାନଙ୍କର  ଶିକ୍ଷକ ଶିକ୍ଷୟିତ୍ରୀ, ଛାତ୍ରଛାତ୍ରୀ, ସ୍ୱଚ୍ଛାସେବୀ ସଂଗଠନ ସମସ୍ତଙ୍କୁ  ସାମିଲ କରିବାକୁ ପ୍ରସ୍ତୁତି ଜାରି ରହିଛି । ସେପ୍ଟେମ୍ବର ୧୭ ତାରିଖ ଅଭିଯାନକୁ ସଫଳ କରିବା ପାଇଁ  ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ସାହୁ ସମସ୍ତଙ୍କୁ ଅନୁରୋଧ କରିବା ସହିତ ସୁବିଧା ଥିବା  ସବୁ ସରକାରୀ କାର୍ଯ୍ୟାଳୟରେ ଚାରା  ରୋପଣ ପାଇଁ ପରାମର୍ଶ ଦେଇଛନ୍ତି ।