26-Aug-2025

ଭୁବନେଶ୍ବର(ପ୍ରେରଣା ଖବର): ପ୍ରାଚୀନ କାଳରୁ ଓଡ଼ିଶାରେ ବୌଦ୍ଧଧର୍ମର ବ୍ୟାପକ ପ୍ରସାର ଲାଭ କରିଥିଲା । ଏପରିକି ବୁଦ୍ଧଦେବଙ୍କ ସଂବୋଧିପ୍ରାପ୍ତି ସମୟରୁ ବୌଦ୍ଧଧର୍ମ ଓଡ଼ିଶାର ସାଂସ୍କୃତିକ ପରିମଣ୍ଡଳରୁ ଆସିଛି, ତାହା ବୌଦ୍ଧ ସାହିତ୍ୟ , ଦର୍ଶନ ଓ ପ୍ରତ୍ନତାତ୍ତ୍ଵିକ ଅନୁସନ୍ଧାନରୁ ଆମେ ଜାଣିବାକୁ ପାଉ । ସମ୍ରାଟ ଅଶୋକଙ୍କ ରାଜତ୍ଵକଳରୁ ନିରବଛିନ୍ନ ଭାବରେ ଓଡ଼ିଶାରେ ବୌଦ୍ଧଧର୍ମ ଚିନ୍ତା ଓ ଚେତନାରେ , କଳା ଓ ସ୍ଥାପତ୍ୟରେ ଉଜ୍ଜୀବିତ ଓ ପରିସ୍ଫୁଟିତ । ଖ୍ୟାତି ସମ୍ପନ୍ନ ବିଦ୍ୱାନଙ୍କ ମତରେ 'ଓଡ଼ିଶା ହେଉଛି ବୌଦ୍ଧ ଧର୍ମର ଲାଳନ ପାଳନ ଭୂମି ' । ସମଗ୍ର ବିଶ୍ୱର ବୌଦ୍ଧମାନଙ୍କ ଉପାସନାର କେନ୍ଦ୍ରସ୍ଥଳ ମହାବୋଧି ମହାବିହାରକୁ ଅଣବୌଦ୍ଧାଙ୍କ କରାୟତରୁ ମୁକ୍ତ କରିବା ପାଇଁ ଗତ ଫେବୃୟାରୀ ୧୨ ତାରିଖ ଠାରୁ ଅନିର୍ଦ୍ଦିଷ୍ଟ କାଳୀନ ଧାରଣା ଚାଲୁଅଛି । ସେହି ଆନ୍ଦୋଳନକୁ ସମଗ୍ର ଦେଶରେ ବ୍ୟାପକ କରିବା ପାଇଁ ଅଗଷ୍ଟ ୧୦ ତାରିଖରେ ନାଗପୁର ଠାରୁ ମଶାଲ ଯାତ୍ରା ଆରମ୍ଭ ହୋଇଛି ଏହି କ୍ରମରେ ଓଡ଼ିଶାରେ ମଧ୍ୟ ଗତକାଲି ଭୁବନେଶ୍ୱର ସ୍ଥିତ ବୁଦ୍ଧ

ମନ୍ଦିର ଠାରେ ମଶାଲ ଯାତ୍ରାର ଶୁଭାରମ୍ଭ କରାଯାଇଥିଲା । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଡ଼. ଆକାଶ ଲାମା (ବୋଧଗୟା ମୁକ୍ତି ଆନ୍ଦୋଳନର ମୁଖ୍ୟ ଉଦ୍ୟକ୍ତା ତଥା ସାଧାରଣ ସମ୍ପାଦକ, ଅଲ ଇଣ୍ଡିଆ ବୁଦ୍ଧିଷ୍ଟ ଫୋରମ) , ସମ୍ମାନିତ ଅତିଥି ଭାବେ ଭନ୍ତେ ଚନ୍ଦ୍ରକ୍ରୀତି, ଭନ୍ତେ ଧମ୍ମତପ୍ , ଧିମାନ ଚନ୍ଦ୍ରବୋଧି ପାଟିଲ ଓ ଧୀମତୀ ସବିନା ଲାମା ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ ଓଡ଼ିଶାର ସମସ୍ତ ଜିଲ୍ଲାରୁ ବହୁସଂଖ୍ୟାରେ ବୁଦ୍ଧିଜୀବୀ ଯୋଗ ଦେଇଥିଲେ l ବୋଧଗୟା ମୁକ୍ତି ଆନ୍ଦୋଳନ ପାଇଁ ଓଡ଼ିଶା ପକ୍ଷରୁ ଅତିଥିମାନଙ୍କୁ ୧ଲକ୍ଷ ଟଙ୍କା ସହଯୋଗ ରାଶି ପ୍ରଦାନ କରାଯାଇଥିଲା l