25-Aug-2025

କୃଷିବିଶ୍ୱବିଦ୍ୟାଳୟ ସ୍ଥାପନ ଦାବିରେ ବିଜେଡିର ଜିଲ୍ଲାପାଳ କାର୍ଯ୍ୟାଳୟ ଘେରାଉ

ବଲାଙ୍ଗୀର, ବଲାଙ୍ଗୀର ଜିଲ୍ଲାରୁ ଉପମୁଖ୍ୟମନ୍ତ୍ରୀ ତଥା ରାଜ୍ୟସରକାରଙ୍କ କୃଷିମନ୍ତ୍ରୀ କନକବର୍ଦ୍ଧନ ସିଂଦେଓ ପ୍ରତିନିଧିତ୍ୱ କରୁଛନ୍ତି । ଏହା ସହିତ ବଲାଙ୍ଗୀରବାସୀଙ୍କ ଭୋଟପାଇ ତାଙ୍କ ପତ୍ନୀ ସଂଗୀତାକୁମାରୀ ସିଂଦେଓ ସାଂସଦ ହୋଇଛନ୍ତି । ତଥାପି ବିଜେପିସରକାର ବଲାଙ୍ଗୀରର ନ୍ୟାର୍ଯ୍ୟଦାବିକୁ ଅଣଦେଖା କରିଛି । ବଲାଙ୍ଗୀରର ବିଜେଡି ବିଧାୟକ କଳିକେଶନାରାୟଣ ସିଂଦେଓ ବଲାଙ୍ଗୀର ଜିଲ୍ଲାବାସୀଙ୍କ ଦାବିକୁ ବିଧାନସଭାରେ ଉପସ୍ଥାପନ କରିବା ସହିତ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦୃଷ୍ଟି ଆକର୍ଷଣ କରିଥିଲେ । କିନ୍ତୁ ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ ନିଜ ଜିଲ୍ଲାବାସୀଙ୍କୁ ଧୋକାଦେଲେ ବୋଲି ଆଜି କୃଷିବିଶ୍ୱବିଦ୍ୟାଳୟ ସ୍ଥାପନ ପ୍ରସଙ୍ଗରେ ଜିଲ୍ଲାପାଳ କାର୍ଯ୍ୟାଳୟ ଘେରାଉକରି ବିଜେଡିଦଳ ଗର୍ଜିଛି । ବିଜେଡି ନେତାମାନେ ଅଭିଯୋଗ କରିଛନ୍ତି ଯେ,ଗତ ଏକ ଦଶନ୍ଧୀଧରି ବଲାଙ୍ଗୀରରେ କୃଷିବିଶ୍ୱବିଦ୍ୟାଳୟ ସ୍ଥାପନ ପାଇଁ ଜନଅନ୍ଦୋଳନ ଜରିଆରେ ଦାବି ହୋଇଆସୁଛି । କିନ୍ତୁ ଏବେ ସରକାର ବଲାଙ୍ଗୀର ବଦଳରେ ସମ୍ବଲପୁରରେ ଏହାକୁ କରିବାକୁ ନିସ୍ପତ୍ତି ନେଇଛନ୍ତି । ବଲାଙ୍ଗୀର ଜିଲ୍ଲା ବାରମ୍ବାର ଉପେକ୍ଷିତ ହୋଇଚାଲିଛି । ବିଗତ ନବୀନ ପଟ୍ଟନାୟକ ସରକାର ଅମଳରେ ବଲାଙ୍ଗୀର ଜିଲ୍ଲାରେ ଲୋୟରସୁକତେଲ ଜଳସେଚନପ୍ରକଲ୍ପ,ଭୀମଭୋଇ ମେଡିକାଲ କଲେଜ ଓ ରାଜେନ୍ଦ୍ର ବିଶ୍ୱବିଦ୍ୟାଳୟ ଭଳି ଅନୁଷ୍ଠାନ ସ୍ଥାପନ କରାଯାଇଥିଲା । କିନ୍ତୁ ରାଜ୍ୟରେ ସରକାର ବଦଳି ବିଜେପି ସରକାର ଆସିଲା ପରେ ବଲାଙ୍ଗୀର ଜିଲ୍ଲାରୁ ଦୁଇଜଣମନ୍ତ୍ରୀ ଥାଇସୁଦ୍ଧା କୌଣସି ପ୍ରକଲ୍ପ ଆସିପାରୁନାହିଁ ବୋଲି ବିଜେଡି ଅଭିଯୋଗ କରିଛି । ବଲାଙ୍ଗୀର ବିଜେଡି ନଗର ସଭାପତି ଶମ୍ଭୁପ୍ରସାଦ ନାଗଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବଲାଙ୍ଗୀର ଜିଲ୍ଲାପରିଷଦ ସଭାପତି ଦେବକୀ ସାହୁ,ପୌରାଧ୍ୟକ୍ଷା ଲିକା ସାହୁ,ବରିଷ୍ଠନେତା ଲକ୍ଷ୍ମଣ ମେହେର,ପ୍ରଭାସ ପାଣିଗ୍ରାହୀ,ଭଗବାନ ବଗର୍ତ୍ତି,ପାଣ୍ଡବ କୁମ୍ଭାର,ମହିଳା ସଭାନେତ୍ରୀ ଦମୟନ୍ତି ବାଘ,ଏଡଭୋକେଟ ଜୟରାମ ମିଶ୍ର,ଅମରେଶ ତ୍ରୀପାଠୀ,କୈଳାଶ ମହାନ୍ତି, ବିଧୁଭୂଷଣ ତ୍ରୀପାଠୀ, ଗୁଲାବ ବାଗ,ସୁଶୀଳ ଚାନ୍ଦ,ଜିଲ୍ଲା ଯୁବବିଜେଡି ସଭାପତି ରାଜେନ୍ଦ୍ର ହୋତା,ପ୍ରଦ୍ୟୁମ୍ନ ହୋତା, ଛାତ୍ର ବିଜେଡି ନେତା ସୁମନ ନନ୍ଦ,ଆଇଟିସେଲର ବିଭୁତିଭୁଷଣ ମିଶ୍ର ପ୍ରମୁଖ ବିଜେପିସରକାରଙ୍କୁ ତୀବ୍ରସମାଲୋଚନା କରିଥିଲେ । ପ୍ରଭାସ ପାଣିଗ୍ରାହୀ ତାଙ୍କ ବକ୍ତବ୍ୟରେ ଉପମୁଖ୍ୟମନ୍ତ୍ରୀ ଓ ସାଂସଦ କୃଷିବିଶ୍ୱବିଦ୍ୟାଳୟ ବଦଳରେ ରାଇସମିଲ ପ୍ରିତିରେ ପଡିଛନ୍ତି ବୋଲି କଟାକ୍ଷ କରିଥିବା ବେଳେ ଯୁବବିଜେଡି ସଭାପତି କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଘ ଜଣେ ଦାଦନସର୍ଦ୍ଦାର ହୋଇଥିବା ଯୋଗୁଁ ଦାଦନଶ୍ରମିକଙ୍କ ସମସ୍ୟାପ୍ରତି ସରକାର ଦୃଷ୍ଟିପାତ କରୁନଥିବା ଅଭିଯୋଗ ଉଠାଇଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଦେବଦତ୍ତ ବେହେରା,ଲେଙ୍କା ସାହୁ,ପ୍ରମୋଦ ବହିଦାର, ସାଗରସଙ୍ଗମ ଶତପଥି, ସନ୍ତୋଷ ଦନ୍ତା, ନରସିଂହ ବାଘ, ଗୁଞ୍ଜ ଖାନ, ମହେନ୍ଦ୍ର ବାଘ, ମୁନା ଖାନ,ମୁନୁ ପୋଢ,ଗଙ୍ଗାଧର ଚାନ୍ଦ, ସୁଦାମ ସାହୁ,ପବିତ୍ର ନେପାକ,ଅନ୍ତର୍ଯ୍ୟାମୀ ଭୋଇ,ଗୋପାଳ ମିଶ୍ର, ଟିଟୁ ସାହୁ ପ୍ରମୁଖଙ୍କ ସହିତ ଶତାଧିକ ସଂଖ୍ୟାରେ ପୁରୁଷ/ମହିଳା ଯୋଗ ଦେଇଥିଲେ । ଏହି ଅବସରରେ ବଲାଙ୍ଗୀରରେ କୃଷିବିଶ୍ୱବିଦ୍ୟାଳୟ ସ୍ଥାପନ କରିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉଦ୍ଦେଶ୍ୟରେ ଜିଲ୍ଲାପ୍ରଶାସନ ଜରିଆରେ ଏକ ଦାବିପତ୍ର ପ୍ରେରଣ କରାଯାଇଥିଲା । ସଭା ଶେଷରେ ବିଜେଡି ନେତାମାନେ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଚାଲିଥିବା ରାଜସ୍ୱ ଅମଲା ସଂଘର ଧାରଣାସ୍ଥଳୁକୁ ଯାଇ ସମର୍ଥନ ଜଣାଇ ଥିଲେ । ବିଜେଡିନେତାଗଣ କହିଥିଲେ ଯେ, ପୂର୍ବ ସରକାର ଅମଳରେ କର୍ମଚାରୀମାନେ ଆନ୍ଦୋଳନ କଲେ ଆଲୋଚନା କରାଯାଉଥିଲା । କିନ୍ତୁ  ଗତ ୧୫ଦିନ ହେଲା ଆନ୍ଦୋଳନ ଚାଲିଥିଲେ ହେଁ ଏହି ସରକାରର କେହି ମଧ୍ୟ ଆଲୋଚନା କରୁନାହାଁନ୍ତି ବୋଲି ଅଭିଯୋଗ କରିଥିଲେ ।