17-Aug-2025

(ସୁଦାମ ଦୀପ)
ବରପାଲି ଖଣ୍ଡର କଦଳିପାଳି ଗାଁର ଛାତ୍ରୀ ସ୍ୱୀଟି ଚେର୍କିଆ ନିଜର ମେହନତ ଓ ପ୍ରତିଭାରେ ଆଜି ସମଗ୍ର ଅଞ୍ଚଳର ଗର୍ବର କାରଣ ହୋଇଛନ୍ତି । ସେ ଓଡ଼ିଶା Sub-Junior Girls National Football Championship ପାଇଁ ଚୟନ ହୋଇ, ଗତକାଲି ଆସାମ ପ୍ରସ୍ଥାନ କରିଛନ୍ତି ।

ପରିବାରିକ ପରିଚୟ

ସ୍ୱୀଟିଙ୍କ ବାପା ଦେଶନ୍ତରା ଚେର୍କିଆ ଜଣେ ସରଳ ଚାଷୀ ଓ ମାଆ ପୁଷ୍ପବତୀ ଚେର୍କିଆ । ସାଧାରଣ ପରିବାରରୁ ଆସିଥିବା ସ୍ୱୀଟି ଆଜି ନିଜ ପ୍ରତିଭାରେ ସ୍ଥାନୀୟ ସ୍ତରରୁ ରାଜ୍ୟ ସ୍ତର ପର୍ଯ୍ୟନ୍ତ ପହଞ୍ଚିବାରେ ସଫଳ ହୋଇଛନ୍ତି ।

ଶିକ୍ଷା ଓ ଖେଳାରେ ଆରମ୍ଭ

ସ୍ୱୀଟି ବର୍ତ୍ତମାନ କଦଳିପାଳି ଉଚ୍ଚ ପ୍ରାଥମିକ ବିଦ୍ୟାଳୟର ଅଷ୍ଟମ ଶ୍ରେଣୀରେ ପଢ଼ୁଛନ୍ତି । ସେ ୫ମ ଶ୍ରେଣୀରୁ ଫୁଟବଲ୍ ଖେଳାରେ ଆଗ୍ରହ ଦେଖାଇଥିଲେ । ଦୈନିକ ପ୍ରଶିକ୍ଷଣ, ପରିଶ୍ରମ ଓ ସମର୍ପଣ ତାଙ୍କୁ ଏହି ଉଚ୍ଚ ସ୍ଥାନକୁ ଆଣିଛି ।

କୋଚ୍ ସମ୍ପୂର୍ଣ୍ଣ ଭୋଇଙ୍କ ଅବଦାନ

ସ୍ୱୀଟିଙ୍କ ଏହି ସଫଳତା ପଛରେ ତାଙ୍କର କୋଚ୍ ସମ୍ପୂର୍ଣ୍ଣ ଭୋଇଙ୍କ ମୂଲ୍ୟବାନ୍ ପ୍ରଶିକ୍ଷଣ ଓ ପ୍ରେରଣା ରହିଛି । କୋଚ୍ ସମ୍ପୂର୍ଣ୍ଣ ଭୋଇଙ୍କ ଅଦମ୍ୟ ଚେଷ୍ଟାରେ ବର୍ତ୍ତମାନ ସୁଦ୍ଧା ୬୦ ଜଣ state, ୧୨ ଜଣ national ଓ ୧ ଜଣ international ସ୍ତରରେ ଖେଳିବାର ସୁଯୋଗ ପାଇଛନ୍ତି ।

ଗାଁ ଓ ଅଞ୍ଚଳରେ ଖୁସିର ଲହରୀ

ସ୍ୱୀଟିଙ୍କ ଏହି ସଫଳତାରେ କେବଳ ତାଙ୍କ ପରିବାର ନୁହେଁ, ସମଗ୍ର କଦଳିପାଳି ଗାଁ ଓ ବରପାଲି ଅଞ୍ଚଳ ଗର୍ବିତ ଅନୁଭବ କରୁଛି । ସ୍ଥାନୀୟ ଲୋକେ କହିଛନ୍ତି ଯେ ସ୍ୱୀଟିଙ୍କ ମେହନତ ଆଗାମୀ ଦିନରେ ନିଶ୍ଚୟ ବଡ଼ ସ୍ତରରେ ଓଡ଼ିଶାର ନାମକୁ ଆଲୋକିତ କରିବ ।

ଏତେ ସତ୍ତ୍ୱେ ମଧ୍ୟ କଦଳିପାଲି ଖେଳ ପଡ଼ିଆ ଅବହେଳିତ ହୋଇ ପଡି ରହିଛି । ସରକାରଙ୍କ କୋଚ୍ ଦୃଷ୍ଟି ଆକର୍ଷଣ କରିବା ପରେ ମଧ୍ୟ ପଦକ୍ଷେପ ନିଆଯାଉନାହିଁ । ତେଣୁ ଖେଳାଳି ମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।