06-Aug-2025

ବିନିକା(ହିମାଂଶୁ ଶେଖର ପୁଟେଲ): ଭାରତର ମହାମହିମ ରାଷ୍ଟ୍ରପତିଙ୍କ ଠାରୁ ନିମନ୍ତ୍ରଣ ଆସିବା ପରେ ବିନିକା ସହର ମନହରି ପଡ଼ାର ଅସହାୟ ମହିଳା ସୁଲେଖାଙ୍କ ପରିବାରରେ ନାହିଁ ନଥିବା ଖୁସିର ଲହରୀ ଖେଳିଯାଇଛି।ଚଳିତ ମାସ ଅଗଷ୍ଟ ୧୫ତାରିଖ ସ୍ବାଧୀନତା ଦିବସରେ ସୁଲେଖା ମଲ୍ଲିକ ଦିଲ୍ଲୀ ଗସ୍ତ କରି ରାଷ୍ଟ୍ରପତି ଭବନକୁ ଯିବେ। ସେଠାରେ ମହାମହିମ ରାଷ୍ଟ୍ରପତିଙ୍କ ରାତ୍ରି ଭୋଜନ ସମୟରେ ସୁଳେଖା ତାଙ୍କ ସହିତ ବସି ଏକାଠି ଭୋଜନ କରିବାର କାର୍ଯ୍ୟକ୍ରମ ରହିଛି।ଏନେଇ ଭାରତୀୟ ଡାକ ବିଭାଗ ତରଫରୁ କର୍ମଚାରୀ ତାଙ୍କ ଘରକୁ ଆସି ରାଷ୍ଟ୍ରପତିଙ୍କ ନିମନ୍ତ୍ରଣ ପତ୍ର ଦେଇଛନ୍ତି । ସୂଚନାଯୋଗ୍ୟ ଯେ ଗତ ଏକ ବର୍ଷ ତଳେ ସୂଲେଖାଙ୍କ ସ୍ଵାମୀଙ୍କ ନାଁରେ ଏକ ଆବାସ ଗୃହ ମଞ୍ଜୁର ହୋଇଥିଲା ।ସେ ଘର ନିର୍ମାଣ କାର୍ଯ୍ୟ ଆରମ୍ଭ କରିଥିଲେ ।ହେଲେ ତାଙ୍କ ସ୍ବାମୀଙ୍କ ସ୍ୱାସ୍ଥ୍ୟରେ ଅବନତି ଘଟିବାରୁ ଦଇବ ତାଙ୍କ ସ୍ବାମୀଙ୍କୁ ନେଇ ଯାଇଥିଲେ । ତଥାପି ବି ମହିଳା ସୁଲେଖା ଏଭଳି ଦୁଃଖଦ ଘଟଣାରେ ଭାଙ୍ଗି ନଯାଇ ନିଜର ଧର୍ଯ୍ୟ ବଳରେ ଅଧାପନ୍ତରିଆ ଆବାସ ଗୃହର ନିର୍ମାଣ କାର୍ଯ୍ୟକୁ ନିର୍ଦ୍ଧାରିତ ସମୟ ମଧ୍ୟରେ ସଂପୂର୍ଣ୍ଣ କରିଥିଲେ। ବିଭିନ୍ନ ବଜାର ମାନଙ୍କୁ ଯାଇ ଚୁଡ଼ି ବିକ୍ରି କରି ପରିବାର ପରିପୋଷଣ ସହିତ ଘର କାର୍ଯ୍ୟରେ କଷ୍ଟପାର୍ଜିତ ଟଙ୍କାକୁ ବିନିଯୋଗ କରି ଥିଲେ । ଠିକ ଏହି ସମୟରେ ରାଜ୍ୟ ଗୃହ କମିଟି ବିନିକା ଗସ୍ତରେ ଆସି ଅସହାୟ ମହିଳାଙ୍କ ଦୟନୀୟ  ପରିସ୍ଥିତି ଉପରେ ବୁଝିବା ସହିତ ନିର୍ଦ୍ଧାରିତ ସମୟରେ ଘର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିଥିବାରୁ କେନ୍ଦ୍ରକୁ ଜଣାଇଥିଲେ। ତେବେ ଏହି ଘଟଣା ଜାଣିବା ପରେ ମହାମହିମ ରାଷ୍ଟ୍ରପତି ଅଗଷ୍ଟ ୧୫ସ୍ବାଧୀନତା ଦିବସରେ ରାତ୍ରି ଭୋଜନ ପାଇଁ ନିମନ୍ତ୍ରଣ କରିଛନ୍ତି। ଏହି ଘଟଣା ପ୍ରଘଟ ହେବାପରେ ସାରା ବିନିକା ଅଞ୍ଚଳରେ ଖୁସିର ଲହରୀ ଖେଳିଯାଇଛି।ଆଜି ସକାଳେ ବିନିକା ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟନିର୍ବାହୀ ଅଧିକାରୀ ମାନସ କୁମାର ଭୋଇ ସୁଲେଖା ଙ୍କ ଘରେ ପହଞ୍ଚି ଶୁଭେଚ୍ଛା ଜଣାଇବା ସହିତ ରାଷ୍ଟ୍ରପତି ଭବନକୁ ପହଞ୍ଚେଇବାର ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ।