01-Aug-2025

ସୋନପୁର, (ମନୋରଞ୍ଜନ ତ୍ରିପାଠୀ) ଜନ୍ମମାଟି 
ସୁବର୍ଣ୍ଣପୁରରେ ନିଆରା ଢଙ୍ଗରେ ଗୁରୁ ଶ୍ରୀ ସତ୍ୟନାରାୟଣ ବହିଦାରଙ୍କ ଜନ୍ମ ଜୟନ୍ତୀ ପାଳିତ ହୋଇଛି । ଏହି ଅବସରରେ ଜନ୍ମଭୂମି ସୁବର୍ଣ୍ଣପୁରରୁ କର୍ମଭୂମି ସମ୍ବଲପୁରକୁ ଏକ ମଶାଲ ଶୋଭାଯାତ୍ରା ଅନୁଷ୍ଠିତ ହୋଇଛି ।  ପଶ୍ଚିମ ଓଡିଶାର ପ୍ରଥମ ଓଟିଟି ପ୍ଲାଟଫର୍ମ  'ପଶ୍ଚିମ' ପକ୍ଷରୁ ଏହି ମଶାଲ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ଏହି ଯାତ୍ରାକୁ ମା ସୁରେଶ୍ବରୀଙ୍କ ମନ୍ଦିର ପ୍ରାଙ୍ଗଣରେ ସୁବର୍ଣ୍ଣପୁର ଜିଲ୍ଲାପାଳ ଡ଼ ନୃପରାଜ ସାହୁ ଶୁଭାରମ୍ଭ କରିଥିଲେ । ସତ୍ୟନାରାୟଣ ବହିଦାରଙ୍କ ନାତି ତରୁଣ ବହିଦାରଙ୍କୁ ମଶାଲ ପ୍ରଦାନ କରି ଏହି ଯାତ୍ରାର ସଫଳତା କାମନା କରିଥିଲେ । ଏହା ଦ୍ବାରା ଜନ୍ମ ଭୂମି ସହ କର୍ମ ଭୂମିକୁ ଯୋଡ଼ା ଯାଇ ସୁ ସମ୍ପର୍କ ସ୍ଥାପନ ହୋଇ ପାରିବ ବୋଲି ଜିଲ୍ଲାପାଳ କହିଛନ୍ତି । ମଶାଲ ଯାତ୍ରାରେ ପଶ୍ଚିମ ମିଡିଆ ନେଟୱାର୍କ ପ୍ରାଇଭେଟ ଲିମିଟେଡର ଅଧ୍ୟକ୍ଷ ଶୁଭାଶିଷ ରଥଙ୍କ ସହ ନିର୍ଦ୍ଦେଶକ ଗଣପତି ବାଘ, ଶିବରାମ ମହାପାତ୍ର ଏବଂ  ଧରଣୀଧର ମିଶ୍ର ସାମିଲ ହୋଇଥିଲେ । ନାଟ୍ୟ ନିର୍ଦ୍ଦେଶକ ମନୋଜ ବାରିକଙ୍କ ସହ, କୌଶିକ ଜାଲ, ଗୋପାଳ ମହାକୁଡ, ଦୁଃଶାସନ ମହାନନ୍ଦିଆ ପ୍ରମୁଖ ମଶାଲ ଯାତ୍ରାରେ ସହଯୋଗ କରିଥିଲେ ।  ସୋନପୁର ସହରର ବିଭିନ୍ନ ସ୍ଥାନରେ ସ୍ବଚ୍ଛ ଭାରତ ସଂଗଠନ, ମହାନଦୀ ସାହିତ୍ୟ ସଂସଦ, ରାମଧୂନ କ୍ଲବ ପକ୍ଷରୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଶ୍ରୀବତ୍ସ ମଲ୍ଲିକ, ଅନନ୍ତ ରାମ ପାଣିଗ୍ରାହି, ସୌରଭ ରଞ୍ଜନ ଖମାରୀ, ଦିଲ୍ଲୀପ ପାତ୍ର, ସୈଳେନ୍ଦ୍ର ସାହୁ, ପ୍ରମୋଦ ସାହୁ, ରାମ ଅଗ୍ରୱାଲା, ମନୋରଞ୍ଜନ ତ୍ରିପାଠୀ, ଲଡୁ କିଶୋର ମଲ୍ଲିକ, ପୀୟୂଷ ପଣ୍ଡା, ମହାଦେବ ମଲ୍ଲିକ, ମନୋଜ ପଣ୍ଡା ପ୍ରମୁଖ ଉପସ୍ଥିତ ରହି ଯାତ୍ରାର ସଫଳତା କାମନା କରିଥିଲେ । ତେବେ ଉଲୁଣ୍ଡା କଲେଜ, ସିଣ୍ଢୋଲ କଲେଜ ଆଦି ଶିକ୍ଷାନୁଷ୍ଠାନ ତରଫରୁ ସ୍ବାଗତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ସମ୍ବଲପୁରସ୍ଥିତ ଗୁରୁଶ୍ରୀ ସତ୍ୟନାରାୟଣ ସମ୍ବଲପୁରୀ ଡେରାଠାରେ ଆୟୋଜିତ ସମ୍ବଲପୁରୀ ଦିନ୍ ସମାରୋହରେ ତରୁଣ ବହିଦାର ଉତ୍ସବର କର୍ମକର୍ତ୍ତାଙ୍କୁ ମଶାଲ ପ୍ରଦାନ କରିଥିଲେ । ଆୟୋଜକ ମାନେ ଏହି ଉଦ୍ୟମକୁ ଭୂୟସୀ ପ୍ରଶଂସା କରିଥିଲେ । ସଂସ୍ଥା ତରଫରୁ ଗୁରୁ ସତ୍ୟନାରାୟଣ ବହିଦାରଙ୍କ ଜୀବନୀ ଉପରେ ଏକ ସିନେମା ଏବଂ ବୀର ସୁରେନ୍ଦ୍ର ସାଏଙ୍କ ଉପରେ ଏକ ମେଗା ୱେବ୍‌ସିରିଜ୍ ନିର୍ମାଣ ପାଇଁ ଯୋଜନା କରାଯାଉଥିବା ନେଇ  ଏହି ଅବସରରେ 'ପଶ୍ଚିମ'ର ଅଧ୍ୟକ୍ଷ ଶୁଭାଶିଷ ରଥ ଘୋଷଣା କରିଥିଲେ ।