30-Jun-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ବ୍ଳକ ବାବୁପାଲି ପଞ୍ଚାୟତ ଅନ୍ତର୍ଗତ ବାବୁପାଲି ହାଇସ୍କୁଲର ସଂସ୍କୃତ ଶିକ୍ଷକ ଯୋଗିନ୍ଦ୍ର ପଣ୍ଡାଙ୍କ ଅବସରକାଳୀନ ବିଦାୟ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି। ପୂରାତନ ଛାତ୍ର ବିଶ୍ଵନାଥ ବଡ଼ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ସଭାରେ ସ୍କୁଲ ପରିଚାଳନା କମିଟି ସଭାପତି ବିଶ୍ଵଦେବ ବଡ଼ପଣ୍ଡା ସଭାପତିତ୍ବ କରିଥିଲେ। ଭାରତୀୟ ଷ୍ଟେଟ ବ୍ୟାଙ୍କର ଅବସରପ୍ରାପ୍ତ ଆଞ୍ଚଳିକ ଶାଖା ପ୍ରବନ୍ଧକ ଜଗଦୀଶ ପ୍ରସାଦ ମହାପାତ୍ର ମୁଖ୍ୟଅତିଥି, ଅବସରପ୍ରାପ୍ତ ପ୍ରଧାନ ଶିକ୍ଷକ ଭଗବତ୍ ପ୍ରସାଦ ପାଢ଼ୀ ଏବଂ ବିଦ୍ୟାଳୟର ପ୍ରଧାନ ଶିକ୍ଷକ ଜଗଦୀଶ ବ୍ରହ୍ମଚାରୀ ବିଦାୟୀ ଶିକ୍ଷକ ଯୋଗିନ୍ଦ୍ର ପଣ୍ଡାଙ୍କ ସହିତ ମଞ୍ଚାସିନ ଥିଲେ। ମାନନୀୟ ମୂଖ୍ୟ ଅତିଥି ଏବଂ ସମ୍ମାନିତ ଅତିଥି ବିଦାୟୀ ଶିକ୍ଷକଙ୍କୁ ମାନପତ୍ର ଓ ଉପଢ଼ୌକନ ଦେଇ ସମ୍ମାନିତ କରିଥିଲେ। ଉକ୍ତ ସଭାରେ ବହୁ ପୂରାତନ ଏବଂ ଅଧୁନା ଅଧ୍ୟୟନ ରତ ଛାତ୍ରଛାତ୍ରୀ ଉପସ୍ଥିତ ରହି ନିଜ ନିଜର ସ୍ମୃତି ଚାରଣ କରିଥିଲେ। ପ୍ରଧାନ ଶିକ୍ଷକ ଜଗଦୀଶ ବ୍ରହ୍ମଚାରୀ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ପୂରାତନ ଛାତ୍ରୀ ସୁଶ୍ରୀରାଣୀ ବଡ଼ପଣ୍ଡା ଧନ୍ୟବାଦ ଅର୍ପଣ କରିଥିଲେ। ବିଦ୍ୟାଳୟର ସମସ୍ତ ଶିକ୍ଷକ ଓ କର୍ମଚାରୀମାନେ ପୁର୍ଣ୍ଣ ମାତ୍ରାରେ ସହଯୋଗ କରିଥିଲେ। ବିଦାୟୀ ଶିକ୍ଷକ ଯୋଗିନ୍ଦ୍ର ପଣ୍ଡାଙ୍କ ଅଭିଭାଷଣରେ ସମସ୍ତେ ଭାବ ବିହ୍ୱଳ ହୋଇ ପଡିଥିଲେ।