15-Jun-2025

ବଲାଙ୍ଗୀର (ଚିତ୍ରସେନ ବେହେରା):  ସରକାରୀ ସ୍ତରରେ ଇଚ୍ଛାଶକ୍ତି ଅଭାବ ଯୋଗୁଁ ବଲାଙ୍ଗୀରର  ଦେଓଗାଁ ଚିନିକଳ ବର୍ତ୍ତମାନ ମୃତବତ ପଡିରହିଛି l କାରଖାନା ବନ୍ଦ ହୋଇଯିବା ଦ୍ଵାରା ଜିଲ୍ଲାରେ ଆଖୁଚାଷ କମିଯିବା ସହିତ ଯେତେ ଉତ୍ପାଦନ ହେଉଛି ତାହା ଅଭାବୀ ବିକ୍ରି ର ଶିକାର ହେଉଛି  l ଚାଷୀକୁଳ ଙ୍କ ଜୀବନ ରେଖା କୁହାଯାଉଥିବା ଏହି ଚିନିକଳ ବନ୍ଦ ହୋଇ ପଡିବା ଚାଷୀ ମାନଙ୍କ ପ୍ରତି ଉପହାସ ବୋଲି ଦେଓଗାଁ ଚିନିକଳ ସଂଘର୍ଷ ସମିତି ନିଜ ପ୍ରତିକ୍ରିୟାରେ କହିଛି l ଆଜି ସ୍ଥାନୀୟ ଯାଦବ ଭବନ ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ  କୁହାଯାଇଛି ଯେ ଏହି ଚିନିକଳକୁ  ନେଇ ବିଗତ ଦିନରେ ଆନେକ ଆନ୍ଦୋଳନ,ଧାରଣା ଓ ବିକ୍ଷୋଭ ପ୍ରଦର୍ଶନ ଆଦି କରାଯାଇଛି କିନ୍ତୁ ସରକାରୀ ଉଦାସୀନତାର ଶିକାର ହୋଇଛି ଦେଓଗାଁ ଚିନିକଳ l  ବଲାଙ୍ଗୀର ପରି ଏକ ଦାଦନ ପ୍ରବଣ ଜିଲ୍ଲାରେ ଦେଓଗାଁ ଚିନିକଳ କାର୍ଯ୍ୟକ୍ଷମ ହେବା ଜରୁରୀ ବୋଲି ସଂଘର୍ଷ ସମିତି ପକ୍ଷରୁ ସ୍ପଷ୍ଟ କରାଯାଇଛି l ଆସନ୍ତା ୧୭ ତାରିଖରେ ବଲାଙ୍ଗୀରରେ କୃଷକ ସଶକ୍ତୀକରଣ ସମ୍ମିଳନୀରେ ମାନ୍ୟବର

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗ ଦେବାର କାର୍ଯ୍ୟକ୍ରମ ରହିଛି l ଏଥିରେ ମାନ୍ୟବର କୃଷି ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ମୁକେଶ ମହାଲିଙ୍ଗ ଯୋଗ ଦେବାର କାର୍ଯ୍ୟକ୍ରମ ରହିଛି l ତେବେ ଏହି ସମ୍ମିଳନୀରେ ମୁଖମନ୍ତ୍ରୀ ଦେଓଗାଁ ଚିନିକଳର ପୁନରୁଦ୍ଧାର ପାଇଁ ଘୋଷଣା କରିବାକୁ ଦେଓଗାଁ ଚିନିକଳ ସଂଘର୍ଷ କମିଟି ଦାବି କରିଛି l ଦେଓଗାଁ ଚିନିକଳ ସଂଘର୍ଷ ସମିତିର ମୁଖ୍ୟ ସଂଯୋଜକ ବିଭୂଦତ୍ତ ମିଶ୍ରଙ୍କ ଆବାହକତ୍ବରେ ଅନୁଷ୍ଠିତ ଆଜିର ସାମ୍ବାଦିକ ସମ୍ମିଳନୀରେ ଆପ ନେତା ଆଶିଷ ପାଣ୍ଡେ, ସନ୍ଦୀପ ବାଗ, ସାମଜିକ କର୍ମୀ ଡ. ବିପିନ କୁଶଲିଆ, ରାଜେଶ ବଗର୍ତ୍ତୀ  ପୂର୍ଣ୍ଣ ଚନ୍ଦ୍ର ବିଶ୍ଵାଳ, ସୂଚନା ଅଧିକାର କର୍ମୀ ନୀଳମଣି ଯୋଶୀ ପ୍ରମୁଖ ଉପସ୍ଥିତ ଥିଲେ