15-Jun-2025

ନବରଙ୍ଗପୁର :(ମିହିର ଶଙ୍କର ପାତ୍ର) ଜଳ ସଂରକ୍ଷଣ, ଚାଷ ଜମିକୁ ଜଳସେଚନ ଓ ଗ୍ରୀଷ୍ମ କାଳରେ ଲୋକଙ୍କ ଜଳ ଆବଶ୍ୟକତାକୁ ପୂରଣ କରିବା ଲକ୍ଷ୍ୟରେ ସରକାରଙ୍କ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା ପକ୍ଷରୁ ବିଭିନ୍ନ ଜଳଉତ୍ସରେ ନିର୍ମାଣ କରାଯାଉଛି ଚେକ୍ ଡ୍ୟାମ । ମାତ୍ର ଏହି ଚେକ୍ ଡ୍ୟାମ ନିର୍ମାଣ କାର୍ଯ୍ୟରେ ବିଭାଗୀୟ ଯନ୍ତ୍ରୀ ଓ ଠିକାଦାର ଏବଂ ସ୍ଥାନୀୟ ସରପଞ୍ଚ ମିଶି ବ୍ୟାପକ ଦୁର୍ନୀତି କରି ଅନୁଦାନ ହଡପ କରି ନେଉଥିବା ଅଭିଯୋଗ ହୋଇଛି । ଫଳରେ ସରକାରଙ୍କ ଏହି ଲୋକାଭିମୁଖୀ ଯୋଜନା ଲକ୍ଷ୍ୟଚ୍ୟୁତ ହେବା ଭଳି ମନେହେଉଛି । ଏଭଳି ଅଭିଯୋଗ ଆଣିଛନ୍ତି ନବରଙ୍ଗପୁର ଜିଲ୍ଲା ତେନ୍ତୁଳୀଖୁଣ୍ଟି ବ୍ଲକ ଅଞ୍ଚଳଗୁମ୍ମା ପଞ୍ଚାୟତ ଅନ୍ତର୍ଗତ ଭରଣପୁର ଗ୍ରାମବାସୀ । ନିର୍ମାଣାଧୀନ ଚେକ୍ ଡ୍ୟାମରେ ଦୁର୍ନୀତି ଗନ୍ଧ ବାରି ହୋଇ ପଡିଛି ।ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା ମାଧ୍ୟମରେ ତେନ୍ତୁଳୀଖୁଣ୍ଟି ବ୍ଲକ ଅଞ୍ଚଳଗୁମ୍ମା ପଞ୍ଚାୟତ ଅନ୍ତର୍ଗତ ଭରଣପୁର ଗାଁ ନିକଟସ୍ଥ ନାଳ ଉପରେ ଏକ ଚେକ୍ ଡ୍ୟାମ ନିର୍ମାଣ ପାଇଁ ଗତ ୨୦୨୩-୨୪ ଆର୍ଥିକ ବର୍ଷ ରେ ୧୦ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଛି| |  ମାତ୍ର କାର୍ଯ୍ୟ ଆରମ୍ଭ ହେବା ପର ଠାରୁ ସମ୍ପୃକ୍ତ ଠିକାଦାର ଓ ସ୍ଥାନୀୟ ସରପଞ୍ଚ ସମସ୍ତ ସରକାରୀ ନୀତି ନିୟମ ଉଲ୍ଲଙ୍ଘନ କରି ଓ ଏଷ୍ଟିମେଟ ଅନୁଯାୟୀ କାର୍ଯ୍ୟ ନକରି ଅତ୍ୟନ୍ତ ନିମ୍ନମାନର କାର୍ଯ୍ୟ କରି ଆସୁଥିବା ଅଭିଯୋଗ ହେଉଛି । କଂକ୍ରିଟ କାର୍ଯ୍ୟରେ ନାମକୁ ମାତ୍ର ସିମେଣ୍ଟ ବ୍ୟବହାର କରାଯାଉଛି । ଫଳରେ ଏହାର ସ୍ଥାୟୀତ୍ବ ନେଇ ପ୍ରଶ୍ନବାଚୀ ସୃଷ୍ଟି ହଇଛି । ଆଗାମୀ ଗୋଟିଏ ଦୁଇଟି ବର୍ଷାରେ ଚେକ୍ ଡ୍ୟାମଟି ଧୋଇଯିବାର ଯଥେଷ୍ଟ ସମ୍ଭାବନା ରହିଛି । ଚେକ୍ ଡ୍ୟାମ ନିର୍ମାଣ ବେଳେ କାର୍ଯ୍ୟସ୍ଥଳରେ ବିଭାଗୀୟ ଯନ୍ତ୍ରୀ କିମ୍ବା ବିଭାଗୀୟ ଅଧିକାରୀ ଉପସ୍ଥିତ ରହି କାର୍ଯ୍ୟ ତଦାରଖ କରିବାର ନିୟମ ରହିଥିଲେ ସୁଦ୍ଧା ଯନ୍ତ୍ରୀ କିମ୍ବା ଅଧିକାରୀ କାର୍ଯ୍ୟସ୍ଥଳକୁ ଆସୁନଥିବା ଦେଖିବାକୁ ମିଳିଛି । ଠିକାଦାର ଓ ସରପଞ୍ଚ ନିଜକୁ ସୁହାଇଲା ଭଳି କାର୍ଯ୍ୟ କରି ଚାଲିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।ଏପରିକି ଚେକ୍ ଡ୍ୟାମଟି ନିର୍ମାଣ କରାଯିବା ପୂର୍ବରୁ ଉପଯୁକ୍ତ ସ୍ଥାନ ନିରୂପଣ ନେଇ ଗ୍ରାମବାସୀଙ୍କ ସହିତ ବିଭାଗୀୟ ଅଧିକାରୀ ଆଲୋଚନା କରିବା କଥା । ଗ୍ରାମବାସୀଙ୍କ ମତାମତ ନେଇ ଚେକ୍ ଡ୍ୟାମ ପାଇଁ ଉପଯୁକ୍ତ ସ୍ଥାନ ନିରୂପଣ କରାଯିବା ପରିବର୍ତ୍ତେ ଗ୍ରାମବାସୀଙ୍କ ଅଜ୍ଞାତରେ ବିଭାଗୀୟ ଯନ୍ତ୍ରୀ,ଠିକାଦାର ଓ ସରପଞ୍ଚ ମିଶି ନିଜକୁ ସୁହାଇଲା ଭଳି ସ୍ଥାନରେ ଚେକ୍ ଡ୍ୟାମଟି ନିର୍ମାଣ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି ।ଉପଯୁକ୍ତ ସ୍ଥାନରେ ଚେକ୍ ଡ୍ୟାମଟି ନିର୍ମାଣ ହୋଇନଥିବାରୁ ଏହା ଯେଉଁ ଲକ୍ଷରେ ନିର୍ମାଣ କରାଯାଇଛି, ତାହା କେବେ ପୂରଣ ହୋଇପାରିବ ନାହିଁ , ବୋଲି ଗ୍ରାମବାସୀ ପ୍ରକାଶ କରିଛନ୍ତି । ତେବେ ଲକ୍ଷାଧିକ ଟଙ୍କା ବ୍ୟୟରେ ଏହି ଚେକ୍ ଡ୍ୟାମଟି କାହା ସ୍ବାର୍ଥରେ ନିର୍ମାଣ କରାଯାଉଛି ବୋଲି ପ୍ରଶ୍ନ ଉଠିଛି । ଏ ସମ୍ପର୍କରେ ବ୍ଲକ ଏ.ଇ ଙ୍କୁ ଯୋଗାଯୋଗ କରିଥିଲେ ସୁଦ୍ଧା ତାହା ସମ୍ଭବପର ହୋଇପାରିନାହିଁ ।