25-May-2025

ବିନିକା(ହିମାଂଶୁ ଶେଖର ପୁଟେଲ)କିଛିଦିନ ତଳେ ମାନ୍ୟବର ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝି ମନରେଗା କାମ ମେସିନ ଦ୍ଵାରା ନକରି ଶ୍ରମିକ ନିୟୋଜନ କରି କାମକୁ ତ୍ଵରାନିତ କରିବାକୁ ନିର୍ଦ୍ଦେଶ ଦେବା ସହିତ ଦାଦନ ସମସ୍ୟା ରୋକା ଯାଇପାରିବ ବୋଲି କହିଥିଲେ ଏବଂ ବ୍ଲକ ମାନଙ୍କରେ କିପରି ସରକାରଙ୍କ ବିଭିନ୍ନ ଯୋଜନାର ଅଗ୍ରଗତି ହୋଇପାରିବ ସେନେଇ ଅନୁଷ୍ଠିତ ରାଜ୍ୟସ୍ତରୀୟ ସମ୍ବିଲନିରେ ବିଡ଼ିଓ ମାନଙ୍କୁ ଯତ୍ନବାନ ହେବାକୁ ପରାମର୍ଶ ଦେଇଥିଲେ ।ହେଲେ କେତେକ ସ୍ଥାନରେ ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ବେଖାତୀର କରି ଉପୁରିଆ ଟଙ୍କା କମେଇବା ଲକ୍ଷରେ ସରକାରୀ କର୍ମଚାରୀ ଓ ମଧ୍ୟସ୍ଥି ଠିକାଦାରଙ୍କ ମଧ୍ୟରେ ଭିତିରିଆ ସମ୍ପର୍କ ସ୍ଥାପନ କରି ବିନା ଭୟରେ ଦିନ ଦ୍ବିପହରରେ ଖୁଲମଖୁଲା ଜେସିବି ମେସିନ ସହାୟତାରେ ମାଟି ପୁନରୁଦ୍ଧାର କାମ ଚାଲୁ ରହୁଥିବା ଦେଖିବାକୁ ମିଳିଛି।ଯାର ଜ୍ୱଳନ୍ତ ଉଦାହରଣ ହେଲା ବିନିକା ବ୍ଲକ ଅଞ୍ଚଳରେ ।ଏହି ବ୍ଲକର ସେଲେଡି ପଞ୍ଚାୟତ ଅଧିନସ୍ତ ତୁଲୁଣ୍ଡୁପାଲି ଗ୍ରାମରେ ଏକ ପୋଖରୀରେ ମେସିନ ଦ୍ଵାରା ମାଟି କାମ ହେଉଥିବା ଜଣାପଡିଥିଲା ।ଗତକାଲି ଶୁକ୍ରବାର ଅପରାହ୍ନରେ ପଞ୍ଚାୟତିରାଜ ତଥା ଗ୍ରାମ୍ୟ ଉନ୍ନୟନ ମନ୍ତ୍ରୀ ରବି ନାରାୟଣ ନାଏକ ସୁବର୍ଣ୍ଣପୁର ଗ୍ରସ୍ତରେ ଆସି ବିନିକା ପହଞ୍ଚିଥିଲେ । ବିନିକା ମୁଖ୍ୟ ରାସ୍ତାରେ ଆସୁଥିବା ବେଳେ ରାସ୍ତା ପାର୍ଶ୍ବ ତୁଲୁଣ୍ଡୁପାଲି ଠାରେ ଏକ ପୋଖରୀ ମାଟି କାମରେ ଜେସିବି ମେସିନ ନିୟୋଜିତ ହୋଇଥିଲା ମନ୍ତ୍ରୀ ତତକ୍ଷଣାତ୍ ଗାଡିକୁ ଅଟକାଇ କାମର ତଦାରକ କରିଥିଲେ ।ଶ୍ରମିକ ପରିବର୍ତ୍ତେ ଜେସିବି ମେଶିନରେ କାମ ହେଉଥିବା ନେଇ ମନ୍ତ୍ରୀ ଘୋର ଅସନ୍ତୋଷ ପ୍ରକଟ କରିବା ସହିତ ଅଧିକାରୀ ମାନଙ୍କୁ ତାଗିଦ କରିଥିଲେ ଏବଂ ଉପସ୍ଥିତ ସୁବର୍ଣ୍ଣପୁର ଜିଲ୍ଲାପାଳ ଅନ୍ୟା ଦାଶଙ୍କୁ କାମରେ ନିୟୋଜିତ ଜେଶିବି ମେସିନ କୁ ଜବତ କରି ପୋଲିସ ଜିମା ଦେବାକୁ ନିର୍ଦ୍ଦେଶ ଦେଇଥିଲେ।ଏହି ଘଟଣା ପରେ  ଲୁକାଛୁପା ଭାବରେ ସରକାରୀ କର୍ମଚାରୀ ଓ ଅସାଧୁ ଠିକାଦାରଙ୍କ ମଧୁଚନ୍ଦ୍ରିକାରେ ଚାଲିଥିବା ମନରେଗା ଯୋଜନାର କାମର ଅଗ୍ରଗତି ନେଇ ପ୍ରଶ୍ନବାଚୀ ସୃଷ୍ଟି କରିଥିବା ବେଳେ କାଳେ କାର୍ଯ୍ୟାନୁଷ୍ଠାନ ହେବ ସେନେଇ ମଧ୍ୟ ସରକାରୀ ଅଧିକାରୀ ଭୟଭୀତ ହୋଇ ପଡିଥିବା କେତେକଙ୍କ ଠାରୁ ଶୁଣିବାକୁ ମିଳୁଛି।ତେବେ ଆଗକୁ ବର୍ଷା ରିତୁ ଆସୁଥିବାରୁ ବେଶ ଉପୂରିଆ ଟଙ୍କା କମେଇବା ନିଶାରେ ଉଭୟ ସରକାରୀ କର୍ମଚାରୀ ଓ ମଧ୍ୟସ୍ଥି ଠିକାଦାର ଲାଗି ପଡିଛନ୍ତି ।ତେବେ ଦେଖିବାକୁ ବାକି ରହିଲା ପଞ୍ଚାୟତିରାଜ ମନ୍ତ୍ରୀଙ୍କ ନିର୍ଦ୍ଦେଶ ପରେ ମନରେଗା କାମ ସମ୍ପ୍ରତି ବିନିକା ବ୍ଲକ ଅଞ୍ଚଳରେ ମେସିନ ପରିବର୍ତ୍ତେ ଶ୍ରମିକ ମାନଙ୍କ ଦ୍ଵାରା ସମ୍ପାଦିତ ହେବ ନା ଜାଣି ଶୁଣି ସରକାରୀ କର୍ମଚାରୀ ଉକ୍ତ କାମର ତ୍ଵରାନିତ ଦିଗରେ ପଛଘୁଞ୍ଚା ଦେବେ ତାହା ସମୟ କହିବ ।