23-May-2025

ତୁଷୁରା(ପଞ୍ଚାନନ ନାଏକ) ବଲାଙ୍ଗୀରର ଏକ ପଛୁଆ ବ୍ଲକ ତଥା ନିରୀହ ଆଦିବାସୀମାନଙ୍କ ଅଞ୍ଚଳ ଭାବେ ଗୁଡଭେଲା ବ୍ଲକ ପରିଚିତ। ଏହି ବ୍ଲକର ତହସିଲ ଅଫିସ ତୁଷୁରାରେ ରହିଥିବା ବେଳେ ତୁଷୁରା ତହସିଲଦାର ଆର୍ତ୍ତତ୍ରାଣ ଥାର୍ଟିଙ୍କ ଦୁର୍ନୀତି ଚରମ ସୀମାରେ ପହଞ୍ଚି ଥିବା ନେଇ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଅଭିଯୋଗ କଲେ ବରିଷ୍ଠ ଆଇନଜୀବୀ ଅର୍ତ୍ତତ୍ରାଣ ପୁରୋହିତ। ଏପରିକି ବର୍ତ୍ତମାନ ଦୁର୍ନୀତି ଚରମ ସୀମାରେ ପହଞ୍ଚି ଥିଲେ ମଧ୍ୟ ଭୟରେ ନିରୀହ ଜନତା ଭାଗ୍ୟକୁ ଆଦରି ଚୁପ୍ ରହୁଛନ୍ତି। କିଛି ବର୍ଷ ଆଗରୁ ତୁଷୁରା ତହସିଲ ଅଫିସ ଠାରେ ଦୁର୍ନୀତି ଏବଂ ପିସି କରାବାର ବଢିଥିବାରୁ ଜିଲ୍ଲାପାଳଙ୍କ ଠାରେ ଅଭିଯୋଗ ହୋଇଥିଲା। ଏହା ପରେ ବଲାଙ୍ଗୀର ଜିଲ୍ଲାପାଳ କଠୋର ପଦକ୍ଷେପ ନେବାରୁ ପି. ସି କାରାବାର ବନ୍ଦ ରହିଥିଲା । ଏବେ ତହସିଲଦାର ଭାବେ ଆର୍ତ୍ତତ୍ରାଣ ଥାର୍ଟି ଯୋଗଦାନ କରିବା ପରେ ପୁଣି ଦୁର୍ନୀତି ସହିତ ପିସି କାରବାର ବଢ଼ିଚାଲିଛି। ଖଣିଲୁଟ, ବାଲି ଲୁଟ ସହିତ ପିସି ନ ଦେଲେ ଜମି ରେଜିଷ୍ଟ୍ରେସନ ହେଉନଥିବା ବେଳେ ଜବରଦଖଲ ଉଛେଦରେ ମଧ୍ୟ ଗରିବ ମାନଙ୍କୁ ହଟାଉଥିବା ବେଳେ ଧନୀ ମାନଙ୍କୁ କୋହଳ କରୁଥିବା ଅଭିଯୋଗ ହେଉଛି। ସେହିପରି ଧାନଘରା ର ତେଲ ନଦୀ ପାଖରେ ଖଣିକୁ ଟଙ୍କା ନେଇ ମାଫିଆ ମାନଙ୍କ ହାତରେ ଟେକି ଦେଉଥିବା ନଜିର ରହିଛି । ଏହି ସବୁ ବିଷୟ ଲୋକଲୋଚନରେ ଆସିବା ପରେ ତହସିଲଦାର ନିଜର ଭୁଲ ଲୁଚାଇବା ପାଇଁ ବେଆଇନ ଭାବେ ଅଳ୍ପ ପରିମାଣର ରାଜସ୍ବ ଆଦାୟ କରି ନିରବ ସାଜିଛନ୍ତି। ଏପରିକି ତହସିଲଦାର ମହାଶୟ ଉପନିବନ୍ଧକ ଭାବେ ଅତିରିକ୍ତ ଦାୟିତ୍ବ ଥିବାରୁ ଜମି ରେଜିଷ୍ଟ୍ରେସନ କରିବାକୁ ଆସୁଥିବା ଲୋକମାନଙ୍କ ଠାରୁ ଦଳାଲ ମାଧ୍ୟମରେ ମୋଟା ଅଙ୍କର ଟଙ୍କା ଆଦାୟ କରୁଥିବା ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ଅଫିସ ବହୁ କିରାଣି ୧୨ରୁ ୧୫ ବର୍ଷ ହେଲାଣି ଏହି ଅଫିସରେ ନିଜ ଆଡ୍ଡା ଜମାଇ ରହିଯାଉଥିବାରୁ ଏପରି ସମସ୍ୟା ହେଉ ଥିବା ଶ୍ରା ପୁରୋହିତ ନିଜ ଅଭିଯୋଗ ପତ୍ରରେ ଦର୍ଶାଇଛନ୍ତି । ଏନେଇ ତୁଷୁରା ତହସିଲଦାର ଆର୍ତ୍ତତ୍ରାଣ ଥାର୍ଟିଙ୍କୁ ପଚାରିବାରୁ ଅଭିଯୋଗ ଅସ୍ବୀକାର କରିଥିଲେ। ଏଠାରେ ସୂଚନାଯୋଗ୍ଯ ଯେ, ତୁଷୁରା ତହସିଲଦାରଙ୍କୁ ଉପନିବନ୍ଧକ ଓ ତୁଷୁରା ଏନଏସିର ଅତିରିକ୍ତ ଦାୟିତ୍ବ ଦିଆଯାଇ ଥିବାରୁ ମଧ୍ଯ ଏପରି ସମସ୍ୟା ଉପୁଜିଥିବା ନେଇ ସାଧାରଣରେ ମତପ୍ରକାଶ ପାଉଛି। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଦୃଷ୍ଟି ଦେଇ ବିହିତ ପଦକ୍ଷେପ ନେବାକୁ ସାଧାରଣରେ ଦାବୀ ହେଉଛି ।