03-May-2025

ବରଗଡ଼:(ନିରଞ୍ଜନ ତ୍ରିପାଠୀ)-ନାରୀ ପୁରୁଷ ମୁଦ୍ରାର ଦୁଇ ପାର୍ଶ୍ୱ ପରି। ପୁରୁଷ ପରି ନାରୀର ସ୍ଵାଧୀନତା ଏକାନ୍ତ ଜରୁରୀ।ତେଣୁ ଦୂରଦ୍ରଷ୍ଟା କବି ଶେଠ ଵିଂଶ ଶତାବ୍ଦୀର ଅର୍ଦ୍ଧ ଶତାବ୍ଦୀରୁ ଏହା ଉପରେ ସେ ସ୍ଵର ଉଠାଇଥିଲେ। ସୁତରାଂ ନାରୀ ସ୍ଵାଧୀନତାର ବାର୍ତ୍ତାଵହ ଥିଲେ ସାହିତ୍ୟପ୍ରାଣ କଵି ଖଗେଶ୍ବର ଶେଠ। ଵରଗଡ ଜିଲ୍ଲା ବିଜେପୁର ଖଗେଶ୍ବର ସାହିତ୍ୟ କଳା ପରିଷଦ ପକ୍ଷରୁ ଆୟୋଜିତ କବି ଖଗେଶ୍ବର ଶେଠ ଜୟନ୍ତୀ ସମାରୋହରେ ଅତିଥିଗଣ ଏହି ମତପ୍ରକାଶ କରିଥିଲେ।ଜାରିଂ ପଞ୍ଚାୟତ ଅନ୍ତର୍ଗତ ପୂର୍ଣ୍ଣା ଗ୍ରାମରେ ଆୟୋଜିତ ଏହି ସାରସ୍ବତ ସମାରୋହକୁ ପ୍ରଫେସର ଡକ୍ଟର ପ୍ରଦୀପ କୁମାର ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ। ସାମାଜିକକର୍ମୀ ପଙ୍କଜିନୀ ଦନ୍ତାଙ୍କ ଆବାହକତ୍ଵ ତଥା ପରିଷଦର ସଭାପତି ମୋହନ ସିଂଙ୍କ ଅଧ୍ୟକ୍ଷତାରେ ସ୍ତମ୍ଭକାର ତଥା ଅଧ୍ୟାପକ ସୁଶାନ୍ତ କୁମାର ମିଶ୍ର ମୁଖ୍ୟବକ୍ତା, ଜିଲ୍ଲା ପରିଷଦ ସଭ୍ୟ ସୁଶାନ୍ତ ଗଡତିଆ, ସରପଞ୍ଚ ପ୍ରତିନିଧି କର୍ଣ୍ଣ ଵିଭାର, ସାମାଜିକକର୍ମୀ ଯୋଗେନ୍ଦ୍ର ପଧାନ ପ୍ରମୁଖ ସମ୍ମାନୀୟ ଅତିଥି ଭାବେ ଯୋଗଦେଇ କବିଙ୍କୁ ଶ୍ରଦ୍ଧା ସୁମନ ଅର୍ପଣ କରିଥିଲେ।ଛାତ୍ରୀ ଦୀପ୍ତିମୟୀ ଗୁରୁ କବିଙ୍କ ନିବେଦନ କଵିତା ଆବୃତ୍ତି କରି ସମସ୍ତଙ୍କୁ ମନ୍ତ୍ରମୁଗ୍ଧ କରିଥିଲେ। ଉପସଭାପତି ହୃଦମଣି ସାହୁ ସ୍ଵାଗତ ଭାଷଣ ଓ ଅତିଥି ପରିଚୟ, ସଂପାଦକ ରାଜେଶ୍ଵର ବେହେରା ଉଦ୍ଦେଶ୍ୟ ଜ୍ଞାପନ କରିଥିଲେ। ଦ୍ଵିତୀୟ ଅଧିବେଶନରେ ଆୟୋଜିତ ସମ୍ବଲପୁରୀ କଵିତା ଆସରରେ ଜଗତଜ୍ଜୀବନ ରାମ ଡନସନା, ଯୁବରାଜ ଦୀପ, ଯୋଗେଶ୍ୱର ତାଣ୍ଡି, ଜଗନ୍ନାଥ କୁମାର,ଵିମଳ ଡନସନାଙ୍କ ସମେତ ଵହୁ କଵି ସାମିଲ୍ ହୋଇଥିଲେ।ପରେ କୁନି କଳାକାରମାନଙ୍କ ଦ୍ଵାରା ମନୋରମ ସମ୍ବଲପୁରୀ ନୃତ୍ୟ ପରିବେଷିତ ହୋଇଥିଲା। ସହ ସଂପାଦକ ମକରଧ୍ବଜ ସାହୁ ସମାରୋହକୁ ସଂଯୋଜନା କରିଥିଲେ।କବି ତୁଳସୀରାମ ମେହେର ଧନ୍ୟବାଦ ଅର୍ପଣ କରିଥିଲେ।