24-Apr-2025

ଟିଟିଲାଗଡ(ପ୍ରେରଣା ଖବର): ଟିଟିଲାଗଡ ସହର ମଧ୍ୟରେ ଗଞ୍ଜେଇ ଚୋରା ଚାଲାଣ କାରବାର ଦିନକୁ ଦିନ ବୃଦ୍ଧି ପାଉ ଥିବା ଦେଖିବାକୁ ମିଳିଛି। ଗମନାଗମନ ଦୃଷ୍ଟିରୁ ଉଭୟ ରେଳପଥ ତଥା ସଡ଼କପଥରେ ଟିଟିଲାଗଡ ସହର ଅନ୍ୟ ରାଜ୍ୟ ସହ ସୁଗମ ସଂଯୋଗ ରହିଥିବାରୁ ଗଞ୍ଜେଇ ମାଫିଆ ମାନେ ଏହାକୁ ସୁରକ୍ଷିତ ସ୍ଥାନ ମଣୁଥିବା ଦେଖା ଯାଇଛି।ଗୁରୁବାର ସ୍ଥାନୀୟ ଜଳାରାମ  ଲଜରୁ ବିହାର ଚାଲାଣ ହେବାକୁ ଥିବା ୨୩ କେଜି ୯୩୫ ଗ୍ରାମ ଗଞ୍ଜେଇ ସହ ଘଟଣାରେ ସଂପୃକ୍ତ ୨ ଅଭିଯୁକ୍ତ କୁ ପୁଲିସ ଗିରଫ କରିଛି। ସୂଚନା ଅନୁଯାୟୀ  ବିହାର ଖାଗରିଆ ଜିଲ୍ଲା ପର୍ବତ ଗ୍ରାମର ସୁମନ କୁମାର(୨୬) ଓ ବାଲସା ଗ୍ରାମର ରାଜୀବ କୁମାର(୨୪) ଙ୍କ ଠାରୁ ଦୁଇଟି ଏଆର ବ୍ୟାଗ୍ ରେ ଭର୍ତ୍ତି ଥିବା ୧୧ ପ୍ୟାକେଟ ଗଞ୍ଜେଇ ପୁଲିସ ଜବତ କରିଛି।ଜବତ ଗଞ୍ଜେଇ ର ଆନୁମାନିକ ମୂଲ୍ୟ ୨ ଲକ୍ଷ ୪୦ ହଜାର ଟଙ୍କା ହେବା ନେଇ ପୁଲିସ ସୂଚନା ଦେଇଛି।ଘଟଣାକୁ ନେଇ ପୁଲିସ ଥାନାରେ ଏକ ମାମଲା ରୁଜୁ କରିବା ସହ ଉଭୟ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି। ଟିଟିଲାଗଡ଼ ଥାନାଧିକାରୀ କଲ୍ୟାଣୀ ବେହେରାଙ୍କ ନେତୃତ୍ଵରେ ଏକ ଟିମ୍ ଏହି ଗଞ୍ଜେଇ  ଜବତ କରି ତଦନ୍ତ ଚଳାଇଛନ୍ତି l ତେବେ ବହୁଦିନ ପୂର୍ବରୁ ଏହି ଲଜରେ ଗଞ୍ଜେଇ କାରବାର ଚାଲିଥିବା ନେଇ ଅଭିଯୋଗ ଆସୁଥିଲା l ଲଜ୍ ଟିକୁ ଚଳାଉଥିବା ମାଲିକ ର ସମ୍ପୃକ୍ତି ନେଇ ମଧ୍ଯ ଆଲୋଚନା ହେଉଛି l ସେଦିଗରେ ମଧ୍ୟ ପୋଲିସ ତଦନ୍ତ କରିବାର ଆବଶ୍ୟକତା ରହିଛି ବୋଲି ଜନସାଧାରଣରେ ଦାବି ହେଉଛି l