14-Apr-2025

ଅତାବିରା(ଆକାଶ ମିଶ୍ର): ଅତାବିରା ଏନ୍ ଏ ସି ଅନ୍ତର୍ଗତ ଲାଦରପାଲି  ୫୩ ନମ୍ୱର୍ ଜାତୀୟ ରାଜପଥ କଡ଼ରେ ଥିବା  ଭାରତରତ୍ନ ଡଃ ଭୀମ ରାଓ ଆମ୍ବେଦକରଙ୍କ  ପ୍ରତିମୂର୍ତ୍ତି   ପରିସରରେ ଆଜି ଡଃ ଆମ୍ବେଦକରଙ୍କ ୧୩୫ତମ  ଜନ୍ମ ଜୟନ୍ତୀ ପାଳିତ ହୋଇ ଯାଇଛି । ଅତାବିରା ଏନ୍ ଏ ସି ଲକ୍ଷେ ଘର ଗଣ୍ଡା ସମାଜ ସଭାପତି ମନୋଜ ସୁନାଙ୍କ ଅଧ୍ୟକ୍ଷତାରେ ମହାସମାରୋହ ରେ ଏହି ଜନ୍ମ ଜୟନ୍ତୀ ପାଳିତ ହୋଇ ଥିବା ବେଳେ ବୟୋଜ୍ୟେଷ୍ଠ ବ୍ୟକ୍ତି ତଥା ଉପଦେଷ୍ଟା ମଣ୍ଡଳୀର ପଞ୍ଚାନନ ଦୀପ, ନରେନ୍ଦ୍ର କୁମାର ନାୟକ, କୁବେର ମହାନନ୍ଦ ଓ ଦଶ ବାଦି ଙ୍କ କରକମଳରେ ଦୀପ ପ୍ରଜ୍ବଳନ ପୂର୍ବକ ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା ।ସକାଳ ୮ ଟାରେ ସ୍ଥାନୀୟ  ବିଧାୟକ ନିହାର ମହାନନ୍ଦ ବାବା ଆମ୍ବେଦକରଙ୍କ ପ୍ରତିମୂର୍ତ୍ତୀରେ ଶ୍ରଦ୍ଧାସୁମନ ତଥା ପୁଷ୍ପମାଲ୍ୟ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ବ୍ଲକର କୋଣଅନୁକୋଣରୁ ସମାଜର ଲୋକେ ଏହି ପର୍ବରେ ସାମିଲ ହୋଇଥିଲେ।  ସନ୍ଧ୍ୟାରେ ମାଁ ମେଟାକାନି ମନ୍ଦିରରେ ମାଁ ଙ୍କ ଠାରେ ଦୀପ ପ୍ରଜ୍ବଳନ, ହୋମ ଆହୁତି ସହ ବାବା ଆମ୍ବେଦକରଙ୍କ ଜୟନ୍ତୀ  ପାଳନ ହୋଇ ଥିଲା । ସନ୍ଧ୍ୟାରେ ଗଣ୍ଡା ସମାଜର  ହଜାର ହଜାର ଲୋକଙ୍କ  ସମାବେଶରେ ପଦ୍ମଶ୍ରୀ  ଜିତେନ୍ଦ୍ରିୟ ହରିପାଲ  ମୁଖ୍ୟଅତିଥି ଭାବେ ଯୋଗ ଦେଇଥିଲେ । ତାଙ୍କୁ ଭବ୍ୟ  ସ୍ଵାଗତ କରାଯାଇ ଥିଲା। ବାବାଙ୍କ ପ୍ରତିମୂର୍ତ୍ତିରେ ଦୀପ ପ୍ରଜ୍ବଳନ ପୂର୍ବକ ପୁଷ୍ପମାଲ୍ୟ ଅର୍ପଣ ପରେ  ଆୟୋଜିତ  ସଭାରେ  ମୁଖ୍ୟ ଅତିଥି ଶ୍ରୀଯୁକ୍ତ ହରିପାଲ, ସମ୍ମାନିତ ଅତିଥି ଭାବରେ ସମାଜସେବୀ ତଥା ଅବସରପ୍ରାପ୍ତ ବ୍ୟାଙ୍କ୍ କର୍ମଚାରୀ  ନରେନ୍ଦ୍ର  ନାଏକ ,  ସରୋଜ ସୁନା , ଶମ୍ଭୁ ଦୀପ  ମଞ୍ଚାସୀନ ଥିଲେ । ଜୀବର୍ଦ୍ଧନ ହାତୀ ମଞ୍ଚ ପରିଚାଳନା କରିଥିଲେ। ପଦ୍ମଶ୍ରୀ  ହରିପାଲ ଗଣ୍ଡାସମାଜ ଭିତରେ ଏକତା ଓ ଅଖଣ୍ଡତା ରକ୍ଷା କରିବା ସହ ପରସ୍ପର ପ୍ରତି ଭାଇଚାରାର ବାର୍ତ୍ତା ବାଣ୍ଟିବା ବୋଲି ଉଦବୋଧନ 

ଦେଇଥିଲେ । ବାବା ଆମ୍ବେଦକର ଭାରତୀୟ ସମ୍ବିଧାନର ଜନକ ଭାବେ ନୁହେଁ ସମଗ୍ର ବିଶ୍ଵରେ ମାନବବାଦର ପ୍ରଚାର କରିବାରେ  ତାଙ୍କର ଅନନ୍ୟ ଭୂମିକା ରହିଥିଲା। ତେଣୁ ତାଙ୍କର ନୀତିଆଦର୍ଶକୁ ପାଥେୟ କରି ସମାଜର ଉନ୍ନତି ପାଇଁ  କାର୍ଯ୍ୟ କରିବା ଆମର ପରମ କର୍ତ୍ତବ୍ୟ ବୋଲି  ମଞ୍ଚାସୀନ ଅତିଥି ମାନେ କହିଥିଲେ । ଏହି କାର୍ଯ୍ୟକ୍ରମକୁ  ସମ୍ପାଦକ  ବିଜୟ କୁମାର ବାଦି,ଯୁଗ୍ମ ସମ୍ପାଦକ ପ୍ରଦୀପ ମଲ୍ଲିକ,  ଉପ ସଭାପତି ଶେଷଦେବ ବାଦି, କୋଷାଧ୍ୟକ୍ଷ ଜୟ ମଙ୍ଗଳ ଭୋଷାଗର, ଗୋବିନ୍ଦ ମହାନନ୍ଦ, ହେମନ୍ତ ହରିପାଲ, ଅନିରୁଦ୍ଧ ବାଦି, ବିଜୟ ବାରିକ, ଶେଷ ବାଦି, ପୂର୍ଣ୍ଣ କାଳସେ, ଆର୍ତ୍ତ କାଳସା, ବୃଷଭାନୁ ହିଆଳ ଓ ରମେଶ ପଞ୍ଚବିହା ପ୍ରମୁଖ ସକ୍ରିୟ ସହଯୋଗ କରି ଥିଲେ ।ସାଂସ୍କୃତିକ କାର୍ଯ୍ୟକ୍ରମରେ ପଦ୍ମଶ୍ରୀଙ୍କ ରଙ୍ଗବତୀ ଗୀତର ତାଳେତାଳେ ଝୁମି ଉଠିଥିଲେ ଦର୍ଶକ । ଏହା ବ୍ୟତୀତ କଳା ସଂସ୍କୃତି ଅତାବିରା ଅନୁଷ୍ଠାନ ଓ ଲକ୍ଷେ ଗଣ୍ଡା ସମାଜ ସାଥୀ କଳାକାର ମାନଙ୍କ ଦ୍ବାରା ବିଭିନ୍ନ ପ୍ରକାର ନୃତ୍ୟ ପରିବେଷିତ ହୋଇଥିଲା ।