07-Apr-2025

ତୁଷୁରା (ପଞ୍ଚାନନ ନାଏକ)- ବଲାଙ୍ଗିର ଜିଲ୍ଲାର ଚିନିକଳ ପୁନଃ କାର୍ଯ୍ୟକ୍ଷମ ଦାବୀରେ ଦେଓଗାଁ ଚିନିକଳ ସଂଘର୍ଷ ସମିତି ର ଡାକରା ରେ ବିଭିନ୍ନ ଚାଷୀ ସଂଗଠନ, ବୁଦ୍ଧିଜିବୀ ତଥା ଶ୍ରମିକ ସଂଗଠନ ମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଏକଜୁଟ ହୋଇ ଏକ ବିକ୍ଷୋଭ ସଭାରେ ରେ ସାମିଲ ହୋଇଥିଲେ । ବିଭୁଦତ୍ତ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ସଂଘର୍ଷ ସମିତିର ଅନ୍ୟତମ ନେତା ତଥା ଭିଲେଜର୍ସ ଇଣ୍ଡିଆ ପାର୍ଟିର ସଭାପତି ଡଃ ବିପିନ କୁଶଲିଆ, ପଶ୍ଚିମ ଓଡିଶା ସେବା ସଂଘର ସଭାପତି ରାଜେଶ ବଗର୍ତ୍ତି, ବଲାଙ୍ଗିର ଜିଲ୍ଲା କୃଷକ ମହାସଂଘର ସଭାପତି ଜତି ପ୍ରଧାନ, ସଂପାଦକ ଚଗଲା ପରିଚ୍ଛା, ଆଇଏନ୍‌ଟିୟୁସି ଜିଲ୍ଲା ସଭାପତି କୃଷ୍ଣ ସାହୁ, କୋସଲବାଦୀ ନେତା ତଥା ନାଗରିକ କମିଟିର ପୂର୍ବତନ ସଂପାଦକ ମନୋରଂଜନ ସାହୁ, ଚାଷି ମୁଲିଆ ସଂଘର ଜିଲ୍ଲା ସଭାପତି ପ୍ରେମାନନ୍ଦ ଭୋଇ, ଯୁବ ନେତା ସନ୍ଦିପ ବାଗ, ଆମ ଆଦମି ପାର୍ଟି ଜିଲ୍ଲା ସଭାପତି ଆଶିଷ ପାଣ୍ଡେ, ଚିନିକଳ କର୍ମଚାରୀ ସଂଘର ସଭାପତି ଅକ୍ଷୟ ପୁଟା, ଉପଦେଷ୍ଟା ସୁବଲ ରଣା, କୃଷକ ସଂଘର୍ଷ ସମିତିର ସମ୍ପାଦକ ମଧୁ ସୁଦନ କ୍ଷେତି, ସମାଜସେବି ଧନଞ୍ଜୟ କରଣ, ପିଣ୍ଟୁ ସେଠ, ଆଲୋକ ପରିଡା ଙ୍କ ସମେତ ଶତାଧିକ କୃଷକ ଉକ୍ତ ସଭାରେ ଉପସ୍ତିତ ରହି ଦେଓଗାଁ ଚିନିକଳ କୁ ତୁରନ୍ତ କାର୍ଯ୍ୟକ୍ଷମ କରିବା ପାଇଁ ରାଜ୍ୟ ସରକାରଙ୍କୁ ଅନୁରୋଧ ତଥା ଦୃଢ ଦାବୀ କରିଥିଲେ । ବିଭିନ୍ନ ସରକାରଙ୍କ ଉଦାସୀନ ମନୋଭାବ କୁ ସମାଲୋଚନା କରାଯାଇ ମୋହନ ମାଝି ସରକାରଙ୍କୁ ଯୁଦ୍ଧ କାଳିନ ଭିତ୍ତିରେ କାରଖାନାକୁ କାର୍ଯ୍ୟକ୍ଷମ କରିବା ପାଇଁ ଦାବୀ କରାଯାଇଥିଲା, ଅନ୍ୟଥା ସଂଘର୍ଷ ସମିତି ଭବିଷ୍ୟତରେ ଦୁର୍ବାର ଆନ୍ଦୋଲନ ର ଚେତାବନୀ ଦେଇଛି । ପ୍ରକାଶ ଥାଉକି ବଲାଙ୍ଗିର ଜିଲ୍ଲାର ଏକ ମାତ୍ର କୃଷିଭିତ୍ତିକ ଶିଳ୍ପ ହେଉଛି ଏହି ବନ୍ଦ ପଡିଥିବା ଚିନିକଳ । ଆଖୁ ଏକ ଅର୍ଥକାରୀ ଫସଲ ହୋଇଥିଲେ ମଧ୍ୟ ଚିନିକଳ ବନ୍ଦ ଥିବାରୁ ଚାଷି ଅଭାବି ବିକ୍ରିର ଶିକାର ହେଉଛି ଏବଂ ତତ୍ ସହିତ ପ୍ରତ୍ୟକ୍ଷ ବା ପରୋକ୍ଷ ଭାବେ ପାଖାପାଖି ୨୦ ହଜାର ଲୋକ ପ୍ରଭାବିତ ହେଉଛନ୍ତି । ସୌଭାଗ୍ୟ କ୍ରମେ ଉପ-ମୁଖ୍ୟମନ୍ତ୍ରୀ ତଥା କୃଷି ମନ୍ତ୍ରୀ କନକ ବର୍ଦ୍ଧନ ସିଂହଦେଓ ବଲାଙ୍ଗିର ଜିଲ୍ଲାରୁ ହୋଇଥିବାରୁ ଜିଲ୍ଲାର ଚାଷିମାନେ ଚିନିକଳର ପୁନଃ କାର୍ଯ୍ୟକ୍ଷମ ନେଇ ବିଶଷେ ଆଶାବାଦୀ ଅଛନ୍ତି ।ସଭା ଶେଷରେ ରାଜେଶ ବଗତର୍ତ୍ତି ସମସ୍ତ ସଂଗ୍ରାମୀ ମାନଙ୍କୁ ଧନ୍ୟବାଦ ଅର୍ପଣ କରି ସଭା ସାଂଗ କରିଥିଲେ । ଏହି ମର୍ମରେ ଏକ ଦଫା ଦାବୀ ପତ୍ର ମାନନୀୟ ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ ତଥା କୃଷି ମନ୍ତ୍ରୀଙ୍କୁ ଜିଲ୍ଲାପାଳଙ୍କ ଜରିଆରେ ପ୍ରଦାନ କରାଯାଇଥିଲା ।