18-Jan-2021

 (ପ୍ରେରଣା ଖବର ବ୍ୟୁରୋ) : ଚୀନ୍‌ର ୱୁହାନ ସ୍ଥିତ ଏକ ଗବେଷଣା ପ୍ରତିଷ୍ଠାନ ‘ୱୁହାନ ଇନଷ୍ଟିଚ୍ୟୁଟ୍‌ ଅଫ ଭାଇାରୋଲୋଜି’ ଗତ ବର୍ଷେ ହେଲା ଚର୍ଚ୍ଚାରେ ରହିଆସୁଛି । ଏଠାରୁ ହିଁ କରୋନା ଭାଇରସ ଲିକ୍‌ ହୋଇଥିବା କିଛି ମହଲରୁ ଦାବି କରାଯାଉଛି । ଏବେ ଆଉ ଏକ ରିପୋର୍ଟ ଆସିଛି ଯେଉଁଥିରେ ଦର୍ଶାଯାଇଛି କି ଉକ୍ତ ପ୍ରତିଷ୍ଠାନର ଜଣେ ଗବେଷକ ଏକ ଗୁମ୍ଫା ଭିତରେ ପଶି ବାଦୁଡ଼ିଙ୍କୁ ଧରିବା ପାଇଁ ଉଦ୍ୟମ କରୁଥିଲାବେଳେ ବାଦୁଡି ତାଙ୍କୁ କାମୁଡ଼ି ଦେଇଥିଲା । ସେଇ ଗବେଷକ ନିଜେ ଏହା ସ୍ୱୀକାର କରିଛନ୍ତି । ସେ କହିଛନ୍ତି କି ବାଦୁଡିକୁ ଧରିବାକୁ ଉଦ୍ୟମ କଲାବେଳେ ସିଏ ତାଙ୍କ ହାତକୁ ଏମିତି କାମୁଡ଼ି ଦେଇଥିଲା ଯେ ତାଙ୍କ ରବର ଗ୍ଲୋଭସ ଦେଇ କେହି ମୋଟା ଛୁଞ୍ଚି ଫୋଡି ଦେଲା ଭଳି ତାଙ୍କୁ ମନେହେଲା!! ସେହିପରି ୨୦୧୭ରେ ଚୀନ୍‌ର ଏକ ସରକାରୀ ଟିଭିରେ ପ୍ରସାରିତ ଏକ ଭିଡିଓରେ ଏହି ପ୍ରତିଷ୍ଠାନର ଗବେଷକମାନେ ବିନା ମାସ୍କ ଓ ଗ୍ଲୋଭସରେ ବାଦୁଡ଼ିଙ୍କୁ ଧରୁଥିବାର ଦେଖାଯାଉଛି । ଏହା ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ପ୍ରଚଳିତ ନିୟମର ବିରୁଦ୍ଧାଚରଣ କରୁଛି । ଏସବୁ ତଥ୍ୟ ଆସିବା ପରେ କରୋନା ସଂକ୍ରମଣ ପଛରେ ଉକ୍ତ ପ୍ରତିଷ୍ଠାନର ଭୂମିକା ଜାଣିବା ପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନର ତଦନ୍ତକାରୀ ଟିମ୍‌ ଉପରେ ଚାପ ବୃଦ୍ଧିପାଇବ !