02-Apr-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ପାଟଣାଗଡ ନିର୍ବାଚନମଣ୍ଡଳି ସବୁବେଳେ ବିବାଦରେ ରହିଆସିଛି । ପୂର୍ବରୁ ବିଜେଡିଶାସନ ସମୟରେ ତତକାଳିନ ବିଜେଡି ବିଧାୟକ ଜଣେ ଆଦିବାସୀବର୍ଗର କନିଷ୍ଠଯନ୍ତ୍ରୀଙ୍କୁ କାନଧରି ଉଠବସ କରାଇ ଗିରଫ ହୋଇଥିଲେ । ସେହିପରି ହରିଶଙ୍କର ପର୍ଯ୍ୟଟନସ୍ଥଳିର ନିର୍ମାଣକାମରେ ଦୁର୍ନୀତି ଅଭିଯୋଗ ଆଣି ଜଣେ ଜିଲ୍ଲାପରିଷଦ ସଦସ୍ୟ ଜଣେ କନିଷ୍ଠଯନ୍ତ୍ରୀଙ୍କ ସହ ମାଡଲାଗି ବିବାଦରେ ରହିଥିଲେ। ଏବେ ପୁଣି ଜଣେ ବିଜେପି ନେତା ତଥା ସମିତିସଭ୍ୟ କ୍ଷୁଦ୍ରଜଳସେଚନ ବିଭାଗର ଜଣେ କିନିଷ୍ଠଯନ୍ତ୍ରୀଙ୍କୁ ମରଣାନ୍ତକ ଆକ୍ରମଣ କରି ବିବାଦରେ ରହିଛନ୍ତି । ଗତ ୨୮ ତାରିଖରେ ଖପ୍ରାଖୋଲ ଏମଆଇ ବିଭାଗ ସବଡିଭିଜନର ଜଣେ କନିଷ୍ଠଯନ୍ତ୍ରୀ ଲୋହିତକୁମାର ବଳଙ୍କୁ ଏକ ଠିକାକାମର ବିଲ କରାଇବାକୁ ଯାଇ ସାହାଜପାଣି ସମିତିସଭ୍ୟ ଉପେନ୍ଦ୍ର ଭୋଇ ବନ୍ଧୁକ ଦେଖାଇବା ସହିତ ମରଣାନ୍ତକ ଆକ୍ରମଣ କରି ଲହୁଲୁହାଣ କରିଦେଇଛନ୍ତି । କିନ୍ତୁ ଘଟଣାକୁ ଆଜି ୫ଦିନ ବିତିଯାଇଥିଲେ ହେଁ ପୋଲିସ ଏତଲାଗ୍ରହଣ କରୁନଥିବାରୁ ଘଟଣାଟି ଏବେ ବିବାଦୀୟ ହୋଇପଡିଛି । କନିଷ୍ଠଯନ୍ତ୍ରୀଙ୍କୁ ମୁଣ୍ଡରେ ଆଘାତଲାଗି ୮ଟି ଷ୍ଟିଜ ପଡିଥିବା ବେଳେ ଖପ୍ରାଖୋଲ ପୋଲିସ ଏତଲା ମଧ୍ୟ ଗ୍ରହଣ କରୁନାହିଁ । ଏହି ଘଟଣାକୁ ନେଇ ଏବେ ରାଜନୀତି ଆରମ୍ଭ ହୋଇଗଲାଣି । ଘଟଣାକୁ ବିଜଡେିଦଳ ତଥା ପୂର୍ବତନ ବିଧାୟକ ସରୋଜ ମେହେର ତୀବ୍ରନିନ୍ଦା କରିବା ସହିତ ପାଟଣାଗଡ ବିଧାୟକ ତଥା ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ ଅଭିଯୁକ୍ତଙ୍କୁ ସୁରକ୍ଷାଦେଇ ମାମଲାକୁ ଚପାଇଦେବାକୁ ଉଦ୍ୟମ କରୁଛନ୍ତି ବୋଲି ଅଭିଯୋଗ କରିଛନ୍ତି । ମୁଖ୍ୟମନ୍ତ୍ରୀ ମୋହନ ମାଝୀ ପୋଲିସ ଯଦି କୌଣସି ଅଭିଯୋଗକାରୀଙ୍କୁ ଏତଲା ନରଖିଲେ ଦୃଢକାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସକୁ ଚେତାବନୀ ଦେଇଥିଲେ ହେଁ ଏହି ଘଟଣାରେ କଣ ପାଇଁ ପୋଲିସ ଏତଲା ରଖିନାହିଁ ବୋଲି ସରୋଜ ମେହେର ପ୍ରଶ୍ନ କରିଛନ୍ତି । ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଉଦ୍ଦେଶ୍ୟରେ ପୂର୍ବତନବିଧାୟକ ସରୋଜ ମେହେରଓ ତାଙ୍କ ସମର୍ଥକମାନେ ଏକ ଦାବିପତ୍ର ଖପ୍ରାଖୋଲ ଥାନାଧିକାରୀଙ୍କ ଜରିଆରେ ଆଜି ପ୍ରେରଣ କରିଛନ୍ତି । ପୂର୍ବତନ ବିଧାୟକ ସରୋଜ ମେହେର ତାଙ୍କ ଅଭିଯୋଗପତ୍ରରେ ଦର୍ଶାଇଛନ୍ତି ଯେ,ଅଭିଯୁକ୍ତ ଉପେନ୍ଦ୍ର ଭୋଇ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓଙ୍କର ଜଣେ ଖାସଲୋକ । ଉପେନ୍ଦ୍ରଙ୍କ ନାମରେ ପୂର୍ବରୁ ଅନେକ ଅପରାଧିକ ମାମଲା ରହିଛି । ଏବେ ରାଜ୍ୟରେ ବିଜେପିସରକାର ଆସିଥିବା ଓ ଖୋଦ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓଙ୍କର ଜଣେ ଖାସ ଲୋକ ହୋଇଥିବାରୁ ଉପେନ୍ଦ୍ର ଭୋଇ ବିରୁଦ୍ଧରେ ପୋଲିସ କାର୍ଯ୍ୟାନୁଷ୍ଠାନ ନେଉନାହିଁ । ଗତ ୨୮ ତାରିଖ ଦିନ ଉପେନ୍ଦ୍ର କନିଷ୍ଠଯନ୍ତ୍ରୀଙ୍କୁ ଧମକ ଦେବା ବେଳେ କନିଷ୍ଠଯନ୍ତ୍ରୀ ଶ୍ରୀ ବଳ ଖପ୍ରାଖୋଲ ଥାନାଧିକାରୀଙ୍କୁ ଫୋନକରିଥିଲେ । କିନ୍ତୁ ଥାନାଧିକାରୀ ଫୋନ ଉଠାଇ ନଥିଲେ କି କୌଣସି ସହାୟତା କରିନଥିଲେ । ତେଣୁ ବିଜେପିର ଗୁଣ୍ଡାବାହିନୀ କନିଷ୍ଠଯନ୍ତ୍ରୀ ଶ୍ରୀ ବଳଙ୍କୁ ଘରୁ ଘୋଷାଡି ଆଣି ବନ୍ଧୁକ ଦେଖାଇ ଜୀବନରେ ମାରିଦେବାର ଧମକ ଦେବା ସହିତ ମରଣାନ୍ତକ ଆକ୍ରମଣ କରିଥିଲେ । ଆକ୍ରମଣ ପରେ ପରେ କନିଷ୍ଠଯନ୍ତ୍ରୀ ଥାନାକୁ ଯାଇ ଲିଖିତ ଅଭିଯୋଗ କରିବାରୁ ଥାନାଧିକାରୀ ତାହାକୁ ଗ୍ରହଣ କରିନଥିଲେ ବୋଲି ଅଭିଯୋଗ ହୋଇଛି । କେବଳ ସେତିକି ନୁହେଁ ପୋଲିସ ପକ୍ଷପାତିତା କରି ଓଲଟା କନିଷ୍ଠଯନ୍ତ୍ରୀଙ୍କ ନାମରେ ଏକ କାଉଣ୍ଟର କେସ କରି ଭୟ ଦେଖାଉଥିବା ଅଭିଯୋଗ ହୋଇଛି । ଏପରିକି କନିଷ୍ଠଯନ୍ତ୍ରୀ ବଲାଙ୍ଗୀର ଏସପିଙ୍କୁ ଭେଟି ଅଭିଯୋଗ କରିଥିଲେ ହେଁ ପୋଲିସ କୌଣସି କାର୍ଯ୍ୟାନୁଷ୍ଠାନ ନନେଇ କନିଷ୍ଠଯନ୍ତ୍ରୀଙ୍କୁ ଭୟ ଦେଖାଇ ମାମଲାକୁ ଚପାଇଦେବାର ଉଦ୍ୟମ କରୁଛି ବୋଲି ଅଭିଯୋଗ ହୋଇଛି । ପୋଲିସ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓଙ୍କ ଚାପରେ ଅଭିଯୁକ୍ତମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଉନଥିବା ପୂର୍ବତନ ବିଧାୟକ ସରୋଜ ମେହେର ଅଭିଯୋଗ କରି ମୁଖ୍ୟମନ୍ତ୍ରୀ ହସ୍ତକ୍ଷେପ କରନ୍ତୁ ବୋଲି ଦାବି କରିଛନ୍ତି । ଉପମୁଖ୍ୟମନ୍ତ୍ରୀଙ୍କ ଛତ୍ରଛାୟାତଳେ ଅଭିଯୁକ୍ତମାନେ ଅପରାଧ ଘଟାଇଥିବା ଅଭିଯୋଗ କରାଯାଇଛି । ତେବେ ଏହି ଘଟଣା ନେଇ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓଙ୍କର କୌଣସି ପ୍ରତିକ୍ରୀୟା ମିଳିପାରିନାହିଁ ।