28-Mar-2025

 ଅତାବିରା(ଆକାଶ ମିଶ୍ର):  ଅତାବିରା ବ୍ଲକ୍ ଅନ୍ତର୍ଗତ ଲହଣ୍ଡ। ଉଚ୍ଚ ବିଦ୍ୟାଳୟର ଗତ ତିନି ଦିନ ଧରି କିଶୋରୀ ବାଳିକା ଶିକ୍ଷା କାର୍ଯ୍ୟକ୍ରମ ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ସ୍ନିଗ୍ଧା ପଣ୍ଡାଙ୍କ ତତ୍ତ୍ଵାବଧାନରେ ଅନୁଷ୍ଠିତ ହୋଇ ଯାଇଛି ।  ଏଥିରେ ଯୋଗ ଶିକ୍ଷକ ଭାବେ ଶ୍ରୀ କିଶୋର ଚନ୍ଦ୍ର ପ୍ରଧାନ ଯୋଗ ଦେଇ ଶାରୀରିକ, ମାନସିକ ଏବଂ ଆତ୍ମିକ ସୁସ୍ଥତା ପାଇଁ ଯୋଗ ଓ ଧ୍ୟାନର ଆବଶ୍ୟକତା ବୁଝାଇ ଛାତ୍ରୀମାନଙ୍କୁ ତାଲିମ ପ୍ରଦାନ କରିଥିଲେ । ତାଙ୍କୁ ଏଥିରେ କ୍ରୀଡା ଶିକ୍ଷୟିତ୍ରୀ ଶ୍ରୀମତୀ ତନୁଜା ପାଢୀ ଓ ଶିକ୍ଷକ ଶ୍ରୀ ବିଶ୍ଵଦେବ ପଧାନ ସହାୟତା କରିଥିଲେ । ସେହିପରି ବାଳିକା ସ୍ୱାସ୍ଥ୍ୟ ଓ ପରିମଳ ସମ୍ପର୍କରେ ସଚେତନତା ସୃଷ୍ଟି କରିବା ପାଇଁ ଲହଣ୍ଡ। ସ୍ୱାସ୍ଥ୍ୟ କେନ୍ଦ୍ର ସହଯୋଗରେ ଏକ ପାରସ୍ପରିକ ବିଚାର ବିମର୍ଶ ଆଲୋଚନା ଚକ୍ର ଅନୁଷ୍ଠିତ ହୋଇ ଥିଲା । ଏଥିରେ ସ୍ୱାସ୍ଥ୍ୟ ସହାୟିକା ଶ୍ରୀମତୀ ଇବମିତା ପ୍ରିତୀପାଲ ସାହୁ, ସେକ୍ଟର ଅଫିସର ଶ୍ରୀ ସିନାନନ୍ଦ  ବହିଦାର, ଅଙ୍ଗନବାଡ଼ି କର୍ମୀ ଶ୍ରୀମତୀ ରିଙ୍କି ଭୋଇ,  ପ୍ରମୁଖ ଯୋଗଦେଇ କିଶୋରୀ ସ୍ୱାସ୍ଥ୍ୟ ସମସ୍ୟା ଓ ତା'ର ସମାଧାନ ଉପରେ ଆଲୋକପାତ କରିଥିଲେ । କିଶୋରମାନଙ୍କ ପାଇଁ ବିଭିନ୍ନ କ୍ୟାରିଅର, କିଶୋରମାନଙ୍କ ପାଇଁ ସୁସ୍ଥ ଏବଂ ପୁଷ୍ଟିକର ଖାଦ୍ୟ ତଥା ପରିବେଶ ସୁରକ୍ଷାରେ କିଶୋରମାନଙ୍କ ଭୂମିକା ବିଷୟବସ୍ତୁକୁ ନେଇ ଛାତ୍ରଛାତ୍ରୀଙ୍କ ଦ୍ବାରା ପ୍ରସ୍ତୁତ ବିଭିନ୍ନ ପୋଷ୍ଟର, ଚାର୍ଟ ଓ ଚିତ୍ରକଳାର ଏକ ପ୍ରଦର୍ଶନୀ ମଧ୍ୟ କରାଯାଇଥିଲା । ଏଥିରେ ଅଭିଭାବକ ଓ ଗ୍ରାମବାସୀମାନେ ଯୋଗଦେଇ ଏପରି ଏକ କାର୍ଯ୍ୟକ୍ରମର ଉଚ୍ଚ ପ୍ରଶଂସା କରିଥିଲେ । ଶେଷରେ ପୁରସ୍କାର ବିତରଣ ଓ ବିଦ୍ୟାଳୟର ଶିକ୍ଷୟିତ୍ରୀ ଶ୍ରୀମତୀ ଅନାମିକା ପାଣିଗ୍ରାହୀ ଧନ୍ୟବାଦ ଅର୍ପଣ  କରିଥିଲେ ।