18-Mar-2025

ତୁଷୁରା (ପଞ୍ଚାନନ ନାଏକ): ଲାର୍ଣିଂ ଲିଙ୍କ୍‌ସ ଫାଉଣ୍ଡେସନ ଆନୁକୂଲ୍ୟରେ ଗୁଡଭେଲା ବ୍ଲକ୍ ର ପ୍ରାଥମିକ ଶିକ୍ଷକ, ପ୍ରଧାନ ଶିକ୍ଷକ ଓ ସିଆର୍‌ସିସିମାନଙ୍କୁ ନେଇ ଏକଦିବସୀୟ ପ୍ରଶିକ୍ଷଣ ଶିବିର ତୁଷୁରା ଅଗ୍ରସେନ ଭବନ ଠାରେ ଅନୁଷ୍ଠିତ ହୋଇ ଯାଇଛି। ଉକ୍ତ ପ୍ରଶିକ୍ଷଣ କାର୍ଯ୍ୟକ୍ରମରେ ଗୁଡଭେଲା ବ୍ଲକ୍ ର ୭୫ଟି ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ଯୋଗଦେଇ କାର୍ଯ୍ୟକ୍ରମକୁ ସଫଳ ରୂପାୟନ କରିଥିଲେ। ଉକ୍ତ ପ୍ରଶିକ୍ଷଣକୁ ଫାଉଣ୍ଡେସନ ର  ରାଜ୍ଯ ମୁଖ୍ୟ ଶୁଭ ପ୍ରସାଦ ସାହୁ, ପ୍ରଧାନ ଶିକ୍ଷକ ହେମନ୍ତ କୁମାର ଦାଶ ସମେତ ଅନ୍ୟାନ୍ୟ ପ୍ରଧାନ ଶିକ୍ଷକ ଏବଂ ଫାଉଣ୍ଡେସନ ର କର୍ମକର୍ତ୍ତାଗଣ ଦୀପ ପ୍ରଜ୍ବଳନ ପୂର୍ବକ

ଶୁଭ ଉଦ୍ଘାଟନ କରିଥିଲେ। ଏହି ପ୍ରଶିକ୍ଷଣରେ "ରୋଡ୍ ଟୁ ସ୍କୁଲ୍" ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା। ପ୍ରଶିକ୍ଷକ ରାଧାକାନ୍ତ ମେହେର ଶିକ୍ଷକମାନଙ୍କୁ ଡିଜିଟାଲ ସାକ୍ଷରତା କୌଶଳ ଗୁଡ଼ିକ ଉପରେ ପ୍ରଶିକ୍ଷିତ କରିଥିଲେ। ଯଦ୍ବାରା ଶିକ୍ଷକମାନେ ଡିଜିଟାଲ ସାଧନ ବ୍ଯବହାର କରିବା, ସୂଚନାକୁ ସଠିକ୍ ରୂପେ ଖୋଜିବା, ସୂଚନାକୁ ପରୀକ୍ଷା କରି ଦେଖିବା ତଥା ଉକ୍ତ ସୂଚନା ଗୁଡିକୁ ପିଲାଙ୍କ ଶିଖିବା ପାଇଁ ସୃଜନାତ୍ମକ ଭାବେ ବ୍ଯବହାର କରିବା ଆଦି କୌଶଳ ବିଷୟରେ ଅବଗତ

ହୋଇଥିଲେ। ଏହି ପ୍ରଶିକ୍ଷଣ କାର୍ଯ୍ୟକ୍ରମଟିକୁ ଶିକ୍ଷକମାନେ ଖୁବ୍ ପ୍ରଶଂସା କରିଥିଲେ ଓ ଆଗାମୀ ଦିନରେ ଏଭଳି ପ୍ରଶିକ୍ଷଣ ଶିବିର ଆୟୋଜନ କରିବାକୁ ଫାଉଣ୍ଡେସନ କୁ ଅନୁରୋଧ କରିଥିଲେ। ଫାଉଣ୍ଡେସନ ତରଫରୁ ଉପସ୍ଥିତ ପ୍ରଧାନ ଶିକ୍ଷକ ମାନଙ୍କୁ ପୁଲ ଚାରା ଉପହାର ଦିଆ ଯାଇଥିଲା। ଶେଷରେ ବ୍ଲକ୍ ସଂଯୋଜକ ତାରା ପ୍ରସାଦ ପ୍ରଧାନ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମକୁ ବ୍ଲକ୍ ର ସମସ୍ତ ସମ୍ବଳ ଶିକ୍ଷକ (ଆର୍.ପି) ସହଯୋଗ କରିଥିଲେ।