31-Jan-2025

ଲୋଇସିଂହା, (ବିନୋଦ ଦୀପ) ଲୋଇସିଂହା ଥାନା ପୋଲିସ ପକ୍ଷରୁ ଗୁରୁବାର ଟ୍ରାଫିକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅବସରରେ ଏକ ଟ୍ରାଫିକ ସଚେତନତା ଶୋଭାଯାତ୍ରା ଲୋଇସିଂହା ଥାନା ପୋଲିସ ମୁଖ୍ୟାଳୟରୁ ବାହାରିଥିଲା। ଲୋଇସିଂହା ଥାନାଧିକାରିଣୀ ଶ୍ରୀମତୀ ଯାଜ୍ଞସେନୀ ନାୟକ ଏହାର ଶୁଭାରମ୍ଭ କରିବା ସହିତ ଶୋଭାଯାତ୍ରାରେ ସାମିଲ ହୋଇଥିଲେ। ଏହି ଅବସରରେ ରାସ୍ତାରେ ଯାଉଥିବା ସମୟରେ ଯେଉଁ ବାଇକ ଚାଳକମାନେ ହେଲମେଟ୍‌ ପିନ୍ଧିଥିଲେ ଥାନାଧିକାରିଣୀ ଶ୍ରୀମତୀ ନାୟକ ସେମାନଙ୍କୁ ଚକୋଲେଟ ଦେଇ ଉତ୍ସାହିତ କରିଥିଲେ। ଅନ୍ୟପଟେ ଯେଉଁମାନେ ହେଲ୍‌ମେଟ୍‌ ପିନ୍ଧି ନ ଥିଲେ, ସେମାନଙ୍କୁ ଟ୍ରାଫିକ ସଚେତନତା ଲିଫ୍‌ଲେଟ ପ୍ରଦାନ କରି ଟ୍ରାଫିକ ଆଇନ ପାଳନକରି ଗାଡ଼ି ଚଳାଇବାକୁ  ଥାନାଧିକାରିଣୀ ଶ୍ରୀମତୀ ନାୟକ ପରାମର୍ଶ ଦେଇଥିଲେ। ଏହି ଶୋଭାଯାତ୍ରା ଲୋଇସିଂହା ଥାନା ଅଂଚଳ ର ବିଭିନ୍ନ ଗ୍ରାମ ରେ  ପହଞ୍ଚି ସେଠାରେ ଲୋକଙ୍କୁ ଟ୍ରାଫିକ ଆଇନ ବ୍ୟବସ୍ଥା ଉପରେ ସଚେତନ କରାଯାଇଥିଲା l କାର୍ଯ୍ୟକ୍ରମରେ ଥାନା ର ସମସ୍ତ ପୋଲିସ କର୍ମଚାରୀ  ଅଂଶଗ୍ରହଣ କରିଥିଲେ l