23-Jan-2025

ବଲାଙ୍ଗୀର(ଦେବାଶିଷ ବହିଦାର): ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକ ଅନ୍ତର୍ଗତ ବିଲେଇସର୍ଡା ମିନି ଷ୍ଟାଡିୟମ ଠାରେ ତୃତୀୟ ବିମଲେଇ ମହୋତ୍ସବ ଉଦଘାଟିତ ହୋଇଯାଇଛି । ମହୋତ୍ସବ ର ସଭାପତି ଭରତଭୂଷଣ ପ୍ରଧାନଙ୍କ ସଭାପତିତ୍ବରେ ଅନୁଷ୍ଠିତ ଉଦଘାଟନୀ ସଭାରେ  ମୁଖ୍ୟଅତିଥି ଭାବେ ପୁଇଁତଳା ବ୍ଲକ ଚେୟାରମ୍ୟାନ ସରୋଜ ପ୍ରଧାନ ଯୋଗଦେଇ ନିଜ ବକ୍ତବ୍ଯରେ ଆମ ଲୋକକଳା ଆମ ଗୌରବ ଓ ପ୍ରତ୍ଯେକ ଜାତିକୁ ତାର ଲୋକକଳା ଗୌରବାନ୍ବିତ କରିଥାଏ ଏବଂ ସଂସ୍କୃତିର

ପରିଭାଷାକୁ ଦ୍ଵିଗୁଣିତ କରିଥାଏ ବୋଲି କହିବା ସହ ଏକତା ବଜାୟ ରହିଲେ ସଫଳତା ମିଳେ ବୋଲି କହିଥିଲେ । ମୁଖ୍ୟବକ୍ତା ଭାବେ ଶିକ୍ଷାବିତ ରାଜକିଶୋର ପଣ୍ଡା ଯୋଗଦେଇ ମହୋତ୍ସବର ଆୟୋଜକ ମାନଙ୍କ ଉଦ୍ୟମକୁ ପ୍ରଶଂସା କରିବା ସହ ସ୍ଥାନୀୟ କଳାକାର ମାନଙ୍କ ପାଇଁ ଏ ମହୋତ୍ସବ ନିଜର କଳାକୁ ଦେଖେଇବାର ପ୍ରକୃଷ୍ଟ ମଂଚ ବୋଲି କହିବା ସହ ସ୍ଥାନୀୟ ଅଂଚଳର ଶିକ୍ଷାର ବିକାଶ ଦିଗରେ ବିଲେଇସର୍ଡାର ବରପୁତ୍ର ରାଧାଶ୍ୟାମ ଗୁରୁଙ୍କ ଅବଦାନ ଅତୁଳନୀୟ ବୋଲି କହିଥିଲେ । ସମ୍ମାନୀତ ଅତିଥି ଭାବେ ବିଲେଇସର୍ଡା ସରପଞ୍ଚ ସୁଶାନ୍ତ ଛତ୍ରିଆ ନିଜ ବକ୍ତବ୍ଯରେ  ଲୋକକଳା ଲୋକ ସଂସ୍କୃତିର ଜୀବନ୍ତ ବାର୍ତ୍ତାବହ ଓ ଏହାର ଭୂମୀକା ଖୁବ ଗୁରୁତ୍ଵପୂର୍ଣ୍ଣ ବୋଲି କହିଥିଲେ। ଜବାହାରଲାଲ ସରକାରୀ ଉଚ୍ଚବିଦ୍ୟାଳୟର ଛାତ୍ରୀ ଆଦ୍ୟାଶା,ଲିପ୍ସା,ମୌସୁମୀ,ସୁନେନା, ସେବତୀ,ଆଦ୍ଯାସାଙ୍କ ଦ୍ବାରା ପ୍ରାରମ୍ଭିକ ସ୍ବାଗତ ସଙ୍ଗୀତ ଓ ସନ୍ଥ ଦିବ୍ଯଜୀବନ ଗୁରୁକୁଳର ଛାତ୍ରୀମାନଙ୍କ ଦ୍ବାରା ସ୍ବାଗତ ନୃତ୍ଯ ପରିବେଷଣ ହୋଇଥିଲା। ଜ୍ୟୋତିପ୍ରକାଶ ସାହୁ କାର୍ଯ୍ଯକ୍ରମ ର ସଂଯୋଜନା କରିଥିବା ବେଳେ ଧନ୍ୟବାଦ ଅର୍ପଣ କରିଥିଲେ ଶିକ୍ଷକ କିଶୋର ବିଶ୍ବାଳ । ସଭାପରେ କଂସ ଦରବାର ବସିଥିଲା।

ଗୋପାଳ ଦାସ କଂସ ଭୂମୀକାରେ ଅଭିନୟ କରିଥିଲେ। କଂସ ଦରବାର ରେ ଜ୍ୟୋତିଧାରା କଳା ପରିଷଦ ବେଲବାହାଲିର ର କୁନି କଳାକାର ମାନଙ୍କ ଦ୍ବାରା ଦଳଗତ ନୃତ୍ଯ ,ରାଜନନ୍ଦିନୀ ପଟ୍ଟନାୟକଙ୍କ ଏକକ ନୃତ୍ଯ, ଓମ୍ ବାଗ ଓ ତୃପ୍ତୀ ପ୍ରଧାନଙ୍କ ଦଳଗତ ନୃତ୍ଯ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା । ଆସନ୍ତା ୨୬ତାରିଖ ପର୍ଯ୍ୟନ୍ତ ଏହି ମହୋତ୍ସବରେ ଜିଲ୍ଲା ତଥା ଜିଲ୍ଲା ବାହାରୁ ଅନେକ କଳାକାର ନିଜର କଳା ପ୍ରଦର୍ଶନ କରିବେ ବୋଲି  ବିମଲେଇ ମହୋତ୍ସବ ଆଯୋଜନ କମିଟୀ ତରଫରୁ ସୂଚନା ପ୍ରଦାନ କରାଯାଇଛି ।