22-Jan-2025

ବରଗଡ:(ନିରଞ୍ଜନ ତ୍ରିପାଠୀ)-କୃଷି କ୍ଷେତ୍ରରେ ବ୍ୟବହୃତ ତଥା ଘରୋଇ ବିଦ୍ୟୁତ ବିଲ୍ ସମସ୍ୟାକୁ କେନ୍ଦ୍ରକରି ଆନ୍ଦୋଳନ ମୁହାଁ ବରଗଡ଼ ଜିଲ୍ଲା ସଂଯୁକ୍ତ କୃଷକ ସଙ୍ଗଠନ । ଆଜି ଜିଲ୍ଲାର ଅଗ୍ରଣୀ କୃଷକ ସଙ୍ଗଠନ ସହିଦ ମାଧୋ ସିଂ ଆଞ୍ଚଳିକ କୃଷକ ସଙ୍ଗଠନ ପକ୍ଷରୁ ଘେଁସ ଗୁରୁ ଭବନ ଠାରେ ଜିଲ୍ଲାର ବିଭିନ୍ନ କୃଷକ ସଙ୍ଗଠନ ମାନଙ୍କୁ ଏକ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ସହିଦ ମାଧୋ ସିଂ ଆଞ୍ଚଳିକ କୃଷକ ସଙ୍ଗଠନର ସଭାପତି ମୁରଲି ଭୋଇଙ୍କ ସଭାପତିତ୍ବରେ ଅନୁଷ୍ଠିତ ଏହି ବୈଠକରେ ବିଗତ ଦିନରେ ଘେଁସ ଇଲେକ୍ଟ୍ରିକାଲ ସେକ୍ସନାଲ ଅଫିସରେ ଟାଟା ପାୱାର କର୍ମଚାରୀଙ୍କ ଚାଷୀଙ୍କୁ ମରଣାନ୍ତକ ଆକ୍ରମଣ ଘଟଣା ଓ ବିଦ୍ୟୁତ ସମସ୍ୟା ନେଇ  ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବା ନେଇ କୃଷକ ସଙ୍ଗଠନ ପକ୍ଷରୁ ସୂଚନା ମିଳିଛି । ବୈଠକରେ ପ୍ରଥମ ଅଧିବେଶନରେ ଚଳିତ ଜାନୁଆରୀ ମାସ ଗତ ୧୬ ତାରିଖ ଦିନ ଘେଁସ ସ୍ଥିତ ଇଲେକ୍ଟ୍ରିକାଲ ସେକ୍ସନାଲ ଅଫିସ ଠାରେ ବି.ନୁଆଁପାଲି ଗ୍ରାମର ଚାଷୀ ସୁରେଶ ଭୋଇଙ୍କୁ ବିଜୁଳି ବିଲ୍ କୁ କେନ୍ଦ୍ର କରି ଟାଟା ପାୱାର ବିଦ୍ୟୁତ କର୍ମଚାରୀ ମାରଣାନ୍ତକ ଆକ୍ରମଣ କରିଥିବା ନେଇ ଆଲୋଚନା ହୋଇ ବୈଠକ ମଧ୍ୟରେ ଉଦବେଗ ପ୍ରକାଶ ପାଇଥିଲା । ତେବେ ଚାଷୀଙ୍କୁ ଆକ୍ରମଣ କରିଥିବା ସଂପୃକ୍ତ କର୍ମଚାରୀ ମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ସ୍ବରୁପ ଆଗାମୀ ତିନିଦିନ ମଧ୍ୟରେ ସେମାନଙ୍କୁ ଚାକିରୀରୁ ନିଳମ୍ବିତ କରାଯିବା କିମ୍ବା ଅନ୍ୟତ୍ର ବଦଳି କରାଯିବାକୁ ବୈଠକରେ ଯୋଗଦେଇଥିବା ମେଲଛାମୁଣ୍ଡା ଥାନାଧିକାରୀ ,ବରଗଡ଼ ବିଦ୍ୟୁତ ବିଭାଗୀୟ ଯନ୍ତ୍ରୀ ଓ ସୋହେଲା ତହସିଲଦାରଙ୍କ ସହିତ ଆଲୋଚନା କରିଥିଲେ । ଯଦି ଆଗାମୀ ପାଞ୍ଚଦିନ ମଧ୍ଯରେ କାର୍ଯ୍ୟାନୁଷ୍ଠାନ ନିଆନଯାଏ  ତେବେ ଜିଲ୍ଲାର କୌଣସି ବିଦ୍ୟୁତ ଉପଭୋକ୍ତା କୌଣସି ପ୍ରକାର ବିଦ୍ୟୁତ ବିଲ୍ ଦେବେନାହିଁ ଓ ରାଜରାସ୍ତାକୁ ଓହ୍ଲାଇବେ ଏବଂ ଏଥିପାଇଁ  ବିଭାଗୀୟ ପ୍ରଶାସନ ହିଁ ଦାୟୀ ରହିବେ ବୋଲି ଅଫିସର ମାନଙ୍କୁ ଚରମବାଣୀ ଶୁଣାଇଥିଲେ କୃଷକ ସଙ୍ଗଠନ । ରାଜବୋଡ଼ାସମ୍ବର କୃଷକ ସଙ୍ଗଠନ ତଥା ସଂଯୁକ୍ତ କୃଷକ ସଙ୍ଗଠନ ବରଗଡ଼ ଜିଲ୍ଲାର ଆଇନ ପରାମର୍ଶଦାତା ଅଜିତ ଶତପଥିଙ୍କ ସଭାପତିତ୍ବରେ ଅନୁଷ୍ଠିତ ଆଜିର ଏହି ଦ୍ବିତୀୟ ଅଧିବେଶନରେ ଚାଷ କ୍ଷେତ୍ରରେ ଓ ଘରେ ବ୍ୟବହୃତ ବିଜୁଳି ବିଲ୍ ସମ୍ବନ୍ଧୀୟ ଆଲୋଚନା ହୋଇଥିଲା ।  ବକେୟା ବିଦ୍ୟୁତ ବିଲ୍ ସମ୍ପୁର୍ଣ୍ଣ ଛାଡ଼ କରାଯିବା, ସ୍ମାର୍ଟ ମିଟର ଲଗାଯିବା ସମ୍ପୁର୍ଣ୍ଣ ବନ୍ଦ କରାଯିବା, ୩ ଶହ ୟୁନିଟ ପର୍ଯ୍ୟନ୍ତ ବିଦ୍ୟୁତ ବିଲ୍ ଛାଡ଼ କରାଯିବା, ହୀରାକୁଦ ପାଣି ଜଳସେଚନ ଆଧାରରେ ଚାଷ କ୍ଷେତ୍ରରେ ବ୍ୟବହୃତ ବିଦ୍ୟୁତ ବିଲ୍ କରାଯିବା ଓ ବିଦ୍ୟୁତ ବିଭାଗ କୁ କମ୍ପାନୀ ହାତକୁ ନଦେଇ ସରକାର ନିଜେ ପରିଚାଳନା କରିବା ଏପରି ୫ ଦଫା ସମ୍ବଳିତ ଦାବୀ ନେଇ  ଆସନ୍ତା ଫେବୃଆରୀ ମାସ ୨୮ ତାରିଖ ଦିନ ଏକ ବିରାଟ ଆନ୍ଦୋଳନ କରାଯିବା ପାଇଁ ବୈଠକରେ ନିଷ୍ପତ୍ତି ନିଆଯାଇଛି । ଆୟୋଜିତ ବୈଠକରେ ସହିଦ ମାଧୋ ସିଂ ଆଞ୍ଚଳିକ କୃଷକ ସଙ୍ଗଠନ, ସଂଯୁକ୍ତ କୃଷକ ସଙ୍ଗଠନ, ଲାଲବାହାଦୂର କୃଷକ ସଙ୍ଗଠନ ଭୁକ୍ତା, ସଂଯୁକ୍ତ କୃଷକ ସଙ୍ଗଠନ ବରପାଲି, କୃଷକ ପରିବାର ଭଟଲି, ସଂଯୁକ୍ତ କୃଷକ ସଙ୍ଗଠନ ବରଗଡ଼, ରାଜବୋଡ଼ାସମ୍ବର କୃଷକ ସଙ୍ଗଠନ ପଦ୍ମପୁର, ବାରପାହାଡ଼ କୃଷକ ସଙ୍ଗଠନ ଅମ୍ବାଭନା, ରାଜବୋଡ଼ାସମ୍ବର କୃଷକ ସଙ୍ଗଠନ ଗାଇସିଲାଟ , ବୀର ସୁରେନ୍ଦ୍ର ସାଏ କୃଷକ ସଙ୍ଗଠନ ଦଶମାଇଲ, ରାଜବୋଡ଼ାସମ୍ବର କୃଷକ ସଙ୍ଗଠନ ପାଇକମାଲ, ଆଞ୍ଚଳିକ କୃଷକ ସଙ୍ଗଠନ ମେଲଚ୍ଛାମୁଣ୍ଡା, ଜିଲ୍ଲା କୋଶଲ ସେନା ପ୍ରତିନିଧିଗଣ, ବିଶିଷ୍ଟ ଚାଷୀନେତା ରମେଶ ମହାପାତ୍ର, ଅରବିନ୍ଦ ପଣ୍ଡା, ସରୋଜ ସାହୁ, ଅଜିତ ଶତପଥୀ, ସୁବାସ ସାମନ୍ତରାୟ, ରୋହିତ ପଧାନ, ଲିଙ୍ଗରାଜ ପଧାନ, ରତିକାନ୍ତ ପଧାନ, ରବିଶଙ୍କର ପଧାନ, କାରଣ ସାହୁ, ତପନ ମିଶ୍ର, ନାରାୟଣ ପଣ୍ଡା, ନିରଞ୍ଜନ ପଧାନ, ସୁରେଶ ନିକେଣ୍ଟି, ବାବୃବାହନ ସାହୁ, ପ୍ରଭାତ ସାହୁ, କୁତାର୍ଥ ପଧାନ, ଥବିର ସାହୁ, ଶାନ୍ତନୁ ମାଝୀ, ଈଶାନ୍ତ ଭୋଇ, ଜୟ ପ୍ରକାଶ ବେହେରା ପ୍ରମୁଖଙ୍କ ସମେତ ଜିଲ୍ଲାର ୧୨ ଗୋଟି ବ୍ଲକର ଏକଶହରୁ ଊର୍ଦ୍ଧ୍ବ ଚାଷୀମାନେ ବୈଠକରେ ଯୋଗଦେଇ ଆଲୋଚନାରେ ଅଂଶ ଗ୍ରହଣ କରିଥିଲେ । ଶେଷରେ ଚାଷୀନେତା  ପ୍ରେମରାଜ ସାହୁ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।