20-Jan-2025

ବଲାଙ୍ଗିର(ପ୍ରେରଣା ଖବର) ବହୁ ପ୍ରତୀକ୍ଷିତ ବଲାଙ୍ଗିର ୨୨ତମ ଲୋକଉତ୍ସବ ସ୍ଥାନୀୟ କୋଶଳ କଲାମଣ୍ଡଲ ଠାରେ ଉଦଘାଟିତ ହୋଇ ଯାଇଛି।ଓଡ଼ିଆ ସଂସ୍କୃତି ବିଭାଗ ଏବଂ ଓରମାସ ର ସହାୟତାରେ ଅନୁଷ୍ଠିତ ଦ୍ୱାବିଂଶତମ ଲୋକ ଉତ୍ସବ ଓଡ଼ିଶାର ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓଙ୍କ କରକମଳରେ ଉଦ୍ଘାଟିତ ହୋଇଯାଇଛି।ଏହି ଉଦଘାଟନୀ ଉତ୍ସବର ପ୍ରଥମ ସନ୍ଧ୍ୟାରେ ମୁଖ୍ୟ ଅତିଥି ଭାବରେ ଓଡ଼ିଶାର ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ ଯୋଗଦେଇ କଳା ଓ ସଂସ୍କୃତିର ବିକାଶ ପାଇଁ ଆମେ ସମସ୍ତେ ଏକତ୍ରିତ ହେବାକୁ ପରାମର୍ଶ ଦେଇଥିଲେ l ବରେଣ୍ୟ ଅତିଥି ଭାବରେ ବଲାଙ୍ଗିର ସାଂସଦ ଶ୍ରୀମତୀ ସଂଗୀତା ସିଂଦେଓ ଯୋଗ ଦେଇ ଲୋକ ଉତ୍ସବ କେବଳ ମନୋରଞ୍ଜନଧର୍ମୀ ନ ହୋଇ ଲୁକ୍କାୟିତ କଳା ଓ ପ୍ରତିଭାର ବିକାଶ ଦିଗରେ ସହାୟକ ହେଉ ବୋଲି କହିଥିଲେ। କଳା ଓ କଳାକାରଙ୍କର ବିକାଶ ପାଇଁ ଉଭୟ କେନ୍ଦ୍ର ଓ ରାଜ୍ଯ ସରକାର ଅନେକ ଯୋଜନା କାର୍ଯ୍ୟକାରୀ କରିଛନ୍ତି ବୋଲି  ସାଂସଦ ଶ୍ରୀମତୀ ସିଂହଦେଓ କହିଥିଲେ l ସମ୍ମାନିତ ଅତିଥି ଭାବରେ ବଲାଙ୍ଗିର ଜିଲ୍ଲାପାଳ  ଗୌରବ ଶିବାଜୀ ଇସଲୱାର୍ ଏବଂ ଆରକ୍ଷୀ ଅଧିକ୍ଷକ ଋଷିକେଶ ଖିଲାରି ଯୋଗଦାନ ଦେଇଥିବା ବେଳେ ଅଭ୍ୟର୍ଥନା କମିଟିର ସହଅଧ୍ୟକ୍ଷ ତଥା ବରେଣ୍ୟ ଅତିଥି  ଗୋପଲଜୀ ପାଣିଗ୍ରାହୀ ଯୋଗଦେଇ ବଲାଙ୍ଗୀର ର  ପରମ୍ପରା, କଳା, ସାହିତ୍ୟ,ସଂସ୍କୃତି ଉପରେ ତାଙ୍କର ବକ୍ତବ୍ୟ ପ୍ରଦାନ କରିଥିଲେ। ପ୍ରଥମ ଦିବସରେ କଳାକାର ଭାବେ ଚିତ୍ରଶିଳ୍ପୀ ବାସୁଦେବ ମେହେରଙ୍କୁ ସମ୍ମାନିତ କରିଥିବା ବେଳେ ଅତିଥି କଳାକାର ଉଗ୍ରସେନ ଷଡ଼ଙ୍ଗୀ  ମଞ୍ଚାସୀନ ଥିଲେ।ଲୋକାଉତ୍ସବ ଉପଲକ୍ଷେ ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ଅତିଥି ମାନଙ୍କ ଦ୍ଵାରା ସ୍ମରଣିକା ଉନ୍ମୋଚନ ହୋଇଥିଲା।ଜିଲ୍ଲା ସଂସ୍କୃତି ଅଧିକାରୀ ରଶ୍ମି ରଞ୍ଜନ ମିଶ୍ର ପ୍ରାରମ୍ଭିକ ଭାଷଣ ଦେଇଥିବା ବେଳେ ସ୍ମରଣିକା କମିଟିର ସହ ଅଧ୍ୟକ୍ଷ ସନ୍ଦୀପ କୁଅଁର ଅତିଥି ପରିଚୟ ପ୍ରଦାନ ସହ ମଞ୍ଚ ପରିଚାଳନା କରିଥିଲେ।

ଶେଷରେ ଅଭ୍ୟର୍ଥନା କମିଟି ର ସହ ଅଧ୍ୟକ୍ଷ ଗୋପାଲଜୀ ପାଣିଗ୍ରାହୀ ସମସ୍ତଙ୍କୁ ଧନ୍ୟବାଦ୍ ଦେଇଥିଲେ।ବିଳମ୍ବିତ ରାତ୍ରୀ ପର୍ଯ୍ୟନ୍ତ ଜିଲ୍ଲା, ରାଜ୍ୟ ତଥା ରାଜ୍ୟ ବାହାରରୁ ଆସିଥିବା ବିଭିନ୍ନ ସାଂସ୍କୃତିକ ଦଳ ଦ୍ବାରା ରଙ୍ଗାରଙ୍ଗ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।