29-Dec-2024

ବଲାଙ୍ଗିର(ପ୍ରେରଣାଖବର)- ବଲାଙ୍ଗିର ଜିଲ୍ଲାରେ ସରକାରଙ୍କ ଧାନ କିଣାକୁ ନେଇ ଆସିଛି ଚାଷୀଙ୍କ ଅସନ୍ତୋଷର ପ୍ରତିବାଦ । ସରକାର ପ୍ରଥମେ ନୋଟିସ ମାଧ୍ୟମରେ ଜିଲ୍ଲାର ଅର୍ନ୍ତଗତ ବଲାଙ୍ଗିର ଉପଖଣ୍ଡର ସମସ୍ତ ଚାଷୀ ଭାଇ ଓ ଭଉଣୀ ମାନଙ୍କର ଅବଗତି ନିମନ୍ତେ ଚଳିତ ୨୦୨୪ ବର୍ଷ ଡିସେମ୍ବର ମାସ ୨ ତାରୀଖରୁ ଧାନ କ୍ରୟ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ନିଷ୍ପତି ହୋଇଥିବାର ଘୋଷଣା କରିଥିଲେ । କିନ୍ତୁ ନିର୍ଦ୍ଦାରିତ ସମୟରେ ମଣ୍ଡି ନ ଖୋଲାଯାଇ ପ୍ରାୟ ପ୍ରାୟ ୨୦ ଦିନରୁ ଉର୍ଦ୍ଧ ବିଳମ୍ବରେ ମଣ୍ଡି ଖୋଲାଗଲା ଯାହା ଦ୍ୱାରା ଚାଷୀ ଅଭାବି ବିକ୍ରିର ଶିକାର ହୋଇ ଧାନ ୧୪୦୦ ଟଙ୍କାରୁ ୧୯୦୦ ଟଙ୍କା ମଧ୍ୟରେ ବିକ୍ରି କରିବା ପାଇଁ ବାଧ୍ୟ ହୋଇ ଶୋଷିତ ହେଲା । ଏବଂ ଅଦିନିଆଁ ବର୍ଷା ଯୋଗୁଁ ଚାଷୀ ପାଖରେ ଥିବା ଧାନ କ୍ଷତି ମଧ୍ୟ ହେଲା । ଏଣୁ ଅଦିନିଆଁ ବର୍ଷାରେ କ୍ଷତି ହୋଇଥିବା ଧାନର ସରକାର ଉଚିତ କ୍ଷତି ପୁରଣ କରିବାକୁ ସଂଘ ଦାବି କରୁଛି । ଅନ୍ୟ ପକ୍ଷରେ ଓଡିଶା ରାଜ୍ୟ ସରକାରଙ୍କ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗଙ୍କ ନିଦ୍ଦେଶ କ୍ରମେ ଚଳିତ ଖରିଫ ଋତୁ (୨୦୨୪-୨୫) ବର୍ଷ ପାଇଁ ଧାନର ସର୍ବ ନିମ୍ନ ସହାୟକ ମୂଲ୍ୟ ୨୩୦୦ ଟଙ୍କା ପ୍ରତି କୁଇଟାଂଲ କିଣିବାକୁ ସ୍ଥିର ହୋଇଥିବା ଏବଂ ୮୦୦ ଟଙ୍କା ପ୍ରତି କୁଇଟାଂଲ ଇନପୁଟ ସବସିଡି ଦେଇ ସର୍ବ ମୋଟ ୩୧୦୦ ଟଙ୍କା ପ୍ରତି କୁଇଟାଂଲ କିଣି ବାକୁ ଘୋଷଣା କରିଛନ୍ତି । କିନ୍ତୁ ନିର୍ବାଚନ ସମୟରେ ସରକାର ଦେଇଥିବା ପ୍ରତିଶୃତି ଅନୁଯାଇ ଧାନର ସର୍ବ ନିମ୍ନ ସହାୟକ ମୂଲ୍ୟ ୩୧୦୦ ଟଙ୍କା ପ୍ରତି କୁଇଟାଂଲ କରିବା କଥା ହେଲେ ସରକାର ଧାନ କୁଇଟାଂଲ ପ୍ରତି ୨୩୦୦ କରିଛନ୍ତି । କିନ୍ତୁ ଏଠି ସରକାରଙ୍କୁ ଚାଷିମାନଙ୍କର ପ୍ରଶ୍ନ ରହୁଛି ଧାନର ସର୍ବନିମ୍ନ ସହାୟକ ମୂଲ୍ୟ ୩୧୦୦ ବଦଳରେ ୨୩୦୦ ଟଙ୍କା କାହିଁକି ରଖିଛନ୍ତି । ଏହା ଫଳରେ ପୂର୍ବରୁ ଧାନର ସର୍ବ ନିମ୍ନ ସହାୟକ ମୂଲ୍ୟ ୨୨୦୦ ଟଙ୍କା ପ୍ରତି କୁଇଟାଂଲ ଥିବା ବେଳେ ରଜ୍ୟ ସରକାରଙ୍କ ସିଡ କୋରପୋରେସନ ବିଭାଗ ୨୨୦୦ ଟଙ୍କାରୁ ଉର୍ଦ୍ଧ ଟଙ୍କା ବିହନ ବାବଦକୁ ଦେଉ ଥିଲା । ଯଦି ସରକାର ନିର୍ବାଚନ ସମୟରେ ଦେଇଥିବା ପ୍ରତିଶୃତି ଅନୁଯାଇ ଧାନର ମୂଲ୍ୟ ୩୧୦୦ ଟଙ୍କା ହୋଇଥିଲେ ଆଜି ବିହନ ବିକ୍ରି କରିବାରେ ଚଷୀକୁ ୩୧୦୦ ଟଙ୍କାରୁ ଉର୍ଦ୍ଧ ଟଙ୍କା ବିହନ ବାବଦକୁ ମିଳିଥାନ୍ତା । କିନ୍ତୁ ସରକାରଙ୍କ ଏହି ମିଥ୍ୟା ରାଜନୈତିକ ପ୍ରତିଶୃତି ଯୋଗୁଁ ଆଜି ଚାଷୀ ୮୦୦ ଟଙ୍କାରୁ ଉର୍ଦ୍ଧ  ବିହନ ବିକ୍ରିରେ କ୍ଷତି ସହୁଛି ।  ଆମର ଦାବି ରହୁଛି ସରକାର ନିର୍ବାଚନ ସମୟରେ ଦେଇଥିବା ପ୍ରତିଶୃତି ପାଳନ କରନ୍ତୁ ଓ ଧାନର ସର୍ବନିମ୍ନ ସହାୟକ ମୂଲ୍ୟ ୩୧୦୦ ଟଙ୍କା ଘୋଷଣା କରି ଚାଷୀଙ୍କୁ ପ୍ରଦାନ କରନ୍ତୁ । ସରକାର ବିନା କଟନି ଛଟନୀରେ ଧାନ କିଣୁଛନ୍ତି ବୋଲି ସରକାର ଭୁଆଁ ବୁଲାଇ ମିଛ କହୁଥିବା ବେଳେ ପ୍ରାୟତଃ ସମସ୍ତ ମଣ୍ଡିରେ ଖୁଲମଖୁଲା ୨କେଜି ରୁ ୫ କେଜି ପ୍ରର୍ଯ୍ୟନ୍ତ ଧାନ କାଟୁଛନ୍ତି । ଯତ୍‌ଦ୍ୱାରା ଚାଷୀର କ୍ଷତି ହେଉଛି । ସରକାର ଏହାକୁ ତୁରନ୍ତ ବନ୍ଦ କରିବା ପାଇଁ  ବିହିତ ପଦକ୍ଷେପ ଗ୍ରହଣ କରନ୍ତୁ । ମିଲର ଧାନ ସଂଗ୍ରହ କରିବା ପୂର୍ବରୁ ଚାଷୀଙ୍କୁ ଅଖା ବସ୍ତା ଯୋଗାଇ ନ ପାରିବାରୁ ଚାଷୀ ଜରି ବସ୍ତାରେ ଧାନ ସଂଗ୍ରହ କରି ରଖିଅଛି । କିନ୍ତୁ ବର୍ତମାନ କିଛି ମଣ୍ଡିରୁ ଜରି ବସ୍ତାରେ ଧାନ ଉଠୁଥିବା ବେଳେ ଅଧେରୁ ଅଧିକ ମଣ୍ଡିରେ ଜରି ବସ୍ତାରେ ଧାନ ଗ୍ରହଣ କରିବାକୁ ମିଲର ଖୁଲମଖୂଲା ମନା କରିଦେଉଛନ୍ତି ।  ଏବଂ ଫଟା ଅଖା ବସ୍ତା ମିଲର ଯୋଗାଉଛନ୍ତି । ଯାହା ଦ୍ୱାରା ଚାଷୀ ପ୍ରତି କୁଇଟାଂଲରେ ୩ ରୁ ୪ କେଜି ଧାନର କ୍ଷତି ସହୁଛି । ଏଣୁ ଜରି ବସ୍ତାରେ ଥିବା ଧାନ ମଧ୍ୟ ମିଲର ଗ୍ରହଣ କରିବାକୁ  ଚାଷୀ ସଂଗଠନ ଦାବି କରୁଛି । ଗତ ବର୍ଷ ଅପେକ୍ଷା ଚଳିତ ବର୍ଷ ଚାଷୀଙ୍କୁ କମ ପରିମାଣର ଟୋକନ ଦିଆଯାଉଛି । ଯତ୍ ଦ୍ୱାରା ଚାଷୀ ଆଦାୟ କରୁଛି ପାଖାପାଖି ୨୫ କୁଇଟାଂଲ ପ୍ରତି ଏକର । କିନ୍ତୁ ବିକ୍ରି କରିବା ପାଇଁ କେଉଁଠି ୧୩ କୁଇଟାଂଲ ର ସୁଯୋଗ ରହିଥିବା ବେଳେ ଆଉ କେଉଁଠି ୧୯ କୁଇଟାଂଲ ର ସୁଯୋଗ ରହିଛି । ଯାହା ଫଳରେ ପ୍ରତ୍ୟେକ ଚାଷୀଙ୍କର କ୍ଷତି ହୋଇ ଅଭାବି ବିକ୍ରିର ଶିକାର ହେଉଛି । ଏଣୁ ସରକାର ଚାଷୀମାନଙ୍କ ପାଖରେ ମହଯୁଦ ଥିବା ସମସ୍ତ ଧାନ କ୍ରୟ କରିବାର ବ୍ୟବସ୍ଥା କରନ୍ତୁ । ହାତୀ, ବାରାହା, ମାଙ୍କଡ ପ୍ରମୁଖ ଜଙ୍ଗଲ ଜୀବ ଯନ୍ତୁଙ୍କ ଯୋଗୁଁ ହେଉଥିବା ଚାଷୀର କ୍ଷୟକ୍ଷତିର ଆକଳନ କରି ଚାଷୀକୁ ତାର ଉଚିତ କ୍ଷତି ପୁରଣ ଯୋଗାଇ ଦେବା ସଙ୍ଗେସଙ୍ଗେ ପ୍ରତିସେଧକ  ମୁଳକ ସୁରକ୍ଷାର ବ୍ୟବସ୍ଥା କରିବା ପାଇଁ କୋଶଲୀ କିଶାନ ସଭାର ଉପଦେଷ୍ଟା ତଥା ବରିଷ୍ଠ ଚାଷୀ ନେତା ଆକାଶ ମିଶ୍ର ଆଜିର ସାମ୍ବାଦିକ ସମ୍ମିଳନୀ ଆୟୋଯିତ କରି ସରକାରଙ୍କ ପାଖରେ ଦାବି ଜଣାଇଛନ୍ତି ଓ ସରକାର ଅତିଶିଘ୍ର ଏହି ସବୁ ସମସ୍ୟାର ସମାଧନ କରନ୍ତୁ ନଚେତ ସମସ୍ତ ଚାଷୀ ସଂଗଠନ ଓ ସମସ୍ତ ଚାଷୀମାନଙ୍କୁ ନେଇ ଆଗାମି ଦିନରେ ରାଜ୍ୟ ବ୍ୟାପି ଆନ୍ଦୋଳନ କୁ ଓହ୍ଲାଇବ ବୋଲି ଆଜିର ସମ୍ବାଦିକ ସମ୍ମିଳନୀରେ ସରକାରଙ୍କୁ ଚେତାବନି ଦେଇଛନ୍ତି ଯଦି କିଛି ଅଘଟଣ ଘଟେ ତାରି ପାଇଁ ସରକାର ଦାଇ ରହିବେ ବୋଲି ଚାଷୀ ନେତା ଶ୍ରୀ ମିଶ୍ର କହିଛନ୍ତି । କୋଶଲୀ କିଶାନ ସଭାର ସଭାପତି ପ୍ରସାନ୍ତ  ଭୋଇ, କାର୍ଯ୍ୟକାରୀ ସଭାପତି କୌସ୍ତୁବ ସାହୁ, ବରିଷ୍ଠ ଚାଷୀ ରବିନ୍ଦ୍ର ମିଶ୍ର, ରାଧାକାନ୍ତ ନାୟକ, କଙ୍ଗାଲି ଚରଣ ସାହୁଙ୍କ ସମେତ ପ୍ରମୁଖ ଚାଷୀ ନେତା ମାନେ ଆଜିର ଏହି ସମ୍ବାଦିକ ସମ୍ମିଳନୀରେ ଉପସ୍ଥିତ ରହି ଚାଷିର ବିଭୀନ୍ନ ଅସୁବିଧାର ସମ୍ମୁଖିନ ହେଉଥିବାର ଅଭିଯୋଗ କରିଥିଲେ ।