22-Dec-2024

ବଲାଙ୍ଗୀର(ପ୍ରେରଣା ଖବର): ସଂପ୍ରତି ପରିବର୍ତ୍ତିତ ବିଶ୍ୱପରିବେଶ ସମସ୍ତଙ୍କ ବିପଦ ସୃଷ୍ଟି କରିଛି । ପରିବେଶ ପ୍ରଦୂଷଣରୁ ବିଶ୍ୱର ତାପମାତ୍ରା ବୃଦ୍ଧି ପାଉଛି । ଗ୍ରୀନହାଉସ ଇଫେକ୍ଟକୁ ରୋକିବାକୁ ବିଭିନ୍ନ ସମୟରେ ଆଲୋଚନା ହେଉଛି କିନ୍ତୁ ତାହା କାର୍ଯ୍ୟକାରୀ ହେଉନି । ବିଶ୍ୱର ଉନ୍ନତ ଦେଶମାନେ ଏଥିରେ ବାଧକ ସାଜିଛନ୍ତି । କିନ୍ତୁ ଆମେ ନିଜେ ନିଜେ ଉଦ୍ୟମ କରି ପରିବେଶକୁ ସୁରକ୍ଷା କରିପାରିବା । ଦେଶରେ ବିକାଶ ସାଙ୍ଗକୁ ପରିବେଶ ସୁରକ୍ଷା ପାଇଁ ମଧ୍ୟ ଯତ୍ନବାନ ହେବାକୁ ପଡିବ । ତେଣୁ ସମସ୍ତେ ବ୍ୟାପକ ବୃକ୍ଷରୋପଣ କରିବାକୁ ପିପିଏକାଡେମୀ ହାଇସ୍କୁଲର ହୀରକଜୟନ୍ତୀ ଉତ୍ସବର ଦ୍ୱିତୀୟଦିନରେ “ବିକାଶ ବନାମ ବିନାଶ” ଶୀର୍ଷକ ଆଲୋଚନାରେ ମୁଖ୍ୟବକ୍ତା ଭାବରେ ଯୋଗଦେଇଥିବା ବରିଷ୍ଠ ସାମ୍ବାଦିକ ଅରବିନ୍ଦ ଦାସ ମତବ୍ୟକ୍ତ କରିଛନ୍ତି । ସେ କହିଛନ୍ତି ଯେ,ଆମେରିକା ପରିବେଶ ସମ୍ଭନ୍ଧିୟ ପ୍ୟାରିସ ଚୁକ୍ତିକୁ ମାନିବାକୁ ମନାକରୁଛି । ଆହୁରି ଅନେକ ଦେଶ ପରିବେଶ ପ୍ରଦୂଷଣ ପାଇଁ ଦାୟୀ ଥିଲେ ମଧ୍ୟ ପରିବେଶ ସୁରକ୍ଷା ପାଇଁ କିଛି ମଧ୍ୟ ପଦକ୍ଷେପ ନେଉନାହାଁନ୍ତି । ଯାହାକି ବିଶ୍ୱକୁ ବିପଦ ଅଡକୁ ଠେଲିଦେଉଛି । ବର୍ଷର ଖୁବକମ ଦିନ ଶୀତ ହେଉଛି । ବର୍ଷା ମଧ୍ୟ କମିଯାଉଛି ଓ ଗ୍ରୀଷ୍ମଋତୁ ବଢିଯାଉଛି । ବିଶ୍ୱରେ ୧.୩% ତାପମାତ୍ରା କମାଇବାକୁ ପ୍ୟାରିସଚୁକ୍ତିରେ ଟାର୍ଗେଟ ଥିଲା କିନ୍ତୁ ତାହା ପୂରଣ ହେଉନାହିଁ । ତେଣୁ ଲୋକଙ୍କ ସଚେତନ କରାଯାଇ ବ୍ୟାପକ ବୃକ୍ଷରୋପଣ କରାଯାଉ ଓ ଛାତ୍ରଛାତ୍ରୀଙ୍କୁ ସ୍କୁଲଜୀବନରୁ ଏଥିପ୍ରତି ଆକୃଷ୍ଟ କରିବାକୁ ସ୍କୁଲପାଠ୍ୟକ୍ରମରେ ସାମିଲ କରିବାକୁ ଶ୍ରୀ ଦାସ ଆହ୍ୱାନ ଦେଇଥିଲେ । ସ୍କୁଲର ପୁରାତନ ଛାତ୍ର ଯୋଗେଶ୍ୱର ସାହୁଙ୍କ ସଭାପତିତ୍ୱ ଓ ମନୋରଂଜନ ସାହୁଙ୍କ ସଂଯୋଜନାରେ ଅନୁଷ୍ଠିତ ଦିନବେଳାର କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ରାଜ୍ୟସଭା ସାଂସଦ ନିରଂଜନ ବିଶି,ସମ୍ମାନୀତ ଅତିଥି ଭାବରେ ଭୀମସାରର ପୂର୍ବତନ ଅଧ୍ୟକ୍ଷ ପ୍ରଫେସର ଡ.ଅଶ୍ୱିନୀ ପୂଜାହାରୀ,ପୁରାତନ ଛାତ୍ର ଶରତଚନ୍ଦ୍ର ପଣ୍ଡା ଓ ମୁଖ୍ୟବକ୍ତା ଭାବରେ ବରିଷ୍ଠ ସାମ୍ବାଦିକ ଅରବିନ୍ଦ ଦାସ ଯୋଗଦେଇଥିଲେ । ମୁଖ୍ୟଅତିଥି ତାଙ୍କ ବକ୍ତବ୍ୟରେ ପୁରାତନ ଦିନର ଶିକ୍ଷାବ୍ୟବସ୍ଥା ସାଙ୍ଗରେ ବର୍ତ୍ତମାନ ଚାଲିଥିବା 

ଶିକ୍ଷାବ୍ୟବସ୍ଥା ଉପରେ ତୁଳନା କରିଥିଲେ। ପରିବେଶ ଉପରେ ଆଲୋଚନା କରି ଶ୍ରୀ ବିଶି କହିଲେ ଯେ,ଆଜି ଜଙ୍ଗଲ କ୍ଷୟ ହେବା ସାଙ୍ଗକୁ କୃଷିକ୍ଷେତ୍ରରେ ମଧ୍ୟ ବ୍ୟାପକ ରାସାୟନିକ ସାର,କୀଟନାଶକ ବ୍ୟବହାର ପରିବେଶକୁ କ୍ଷତିପହଞ୍ଚାଉଛି । ପୂର୍ବରୁ ଛାତ୍ରମାନେ ବୈପ୍ଲବିକ ଚିନ୍ତାଧାରାର ରହୁଥିଲେ । କିନ୍ତୁ ଆଜି ପରିବେଶ ଆସନ୍ତୁଳନ ହେଉଥିବା ଓ ପ୍ରଦୂଷଣ ବଢୁଥିବା ବେଳେ କେହି ମଧ୍ୟ ପ୍ରତିକ୍ରୀୟା ପ୍ରକାଶ କରୁନାହାଁନ୍ତି । ଆଗକୁ ସ୍ଥିତି ଅସମ୍ଭାଳ ହେବା ପୂର୍ବରୁ ଆମେ ପ୍ରତିକ୍ରୀୟା ଶୀଳ ହେବାକୁ ପଡିବ ବୋଲି ସାଂସଦ ଶ୍ରୀ ବିଶି ମତ ଦେଇଥିଲେ । ସମ୍ମାନୀତ ଅତିଥି ଡ.ପୂଜାରୀ ତାଙ୍କ ବକ୍ତବ୍ୟରେ କହିଲେ ଯେ,ସ୍କୁଲର ଶ୍ରେଷ୍ଠତା ତାର ଛାତ୍ରଛାତ୍ରୀଙ୍କ ଉପରେ ନିର୍ଭର କରିଥାଏ । ଯେଉଁ ସ୍କୁଲର ଛାତ୍ରଛାତ୍ରୀ ନିଜକୁ ଯେତେ ଉନ୍ନତ କରିପାରିବେ ସେମାନଙ୍କ ସ୍କୁଲର ମର୍ଯ୍ୟାଦା ସେତେ ପରିମାଣରେ ବଢିଥାଏ ବୋଲି ଡ.ପୂଝାରୀ କହିଥିଲେ । ଏହି ଅବସରରେ ସ୍କୁଲର ପୂର୍ବତନ ଶିକ୍ଷକ, କର୍ମଚାରୀମାନଙ୍କୁ ସମ୍ମାନୀତ କରାଯାଇଥିଲା । ଶେଷରେ ଶରତଚନ୍ଦ୍ର ପଣ୍ଡା ସମସ୍ତଙ୍କ ଧନ୍ୟବାଦ ଅର୍ପଣ କରିଥିଲେ ।