07-Dec-2024

ପାଟଣାଗଡ଼(ପୂର୍ଣ୍ଣ ଶଶୀ ଶେଖର ରାଓ) ବଲାଙ୍ଗିର ଜିଲ୍ଲା ଏକ ଦାଦନ ପ୍ରବଣ ଜିଲ୍ଲା ହୋଇଥିବା ବେଳେ ଏଠାରେ ସର୍ଦ୍ଦାର ସଂଖ୍ୟା ପ୍ରବଳ। ସେଥିପାଇଁ ଆଖପାଖ ବରଗଡ଼ ଓ ନୂଆପଡ଼ା ଜିଲ୍ଲା ରୁ ମଧ୍ୟ ଦାଦନ ଶ୍ରମିକ ଆଣି ଚାଲାଣ କରୁଛନ୍ତି ତତ୍ ସଙ୍ଗେ ସଙ୍ଗେ ବଲାଙ୍ଗିର ଜିଲ୍ଲାର ସର୍ବାଧିକ ଲୋକ ଚାଲାଣ ହେଉଛନ୍ତି। ସରକାର ବାହାଦୁର କୁଆଡେ ଏହି ବେଆଇନ ଦାଦନ ଶ୍ରମିକ ଚାଲାଣ ଉପରେ ରୋକ୍ ଲଗାଇବା ପାଇଁ ଟାକ୍ସଫୋର୍ସ ଗଠନ କରିଥିଲେ। ହେଲେ ଦାଦନ ଋତୁର ତୃତୀୟ ପର୍ଯ୍ୟାୟ ସରିବାକୁ ବସିଲାଣି ଟାକ୍ସଫୋର୍ସ ଦ୍ବାରା ଗୋଟିଏ ମଧ୍ୟ ଦାଦନ ଶ୍ରମିକ ଉଦ୍ଧାର ହୋଇନାହାନ୍ତି। ଏପଟେ ଶ୍ରମ ବିଭାଗ ପାଖରେ ଶତକ ସର୍ଦ୍ଦାର ଲାଇସେନ୍ସ ଓ ମୋଭ୍ ମେଣ୍ଟ ଅର୍ଡର କରି ଦାଦନ ଶ୍ରମିକ ଚାଲାଣ କରୁଥିବା ବେଳେ ସର୍ବାଧିକ ସର୍ଦ୍ଦାର ମାନେ ବେଆଇନ ଦାଦନ ଶ୍ରମିକ ଚାଲାଣ କରୁଛନ୍ତି। ଦାଦନ ଶ୍ରମିକ ଚାଲାଣ ରୋକିବାକୁ ପୋଲିସ ପ୍ରଶାସନ ର ମୁଖ୍ୟ ଭୂମିକା ରହୁଥିବା ବେଳେ ସ୍ଥାନୀୟ ପୋଲିସ କୁ ହାତକରି ବେଆଇନ ଦାଦନ ଚାଲାଣ କରୁଛନ୍ତି ସର୍ଦ୍ଦାର। ବଲାଙ୍ଗିର ଜିଲ୍ଲାର ଲାଠୋର, ତୁରେକେଲା, କଣ୍ଟାବାଞ୍ଜି,ମୁରିବାହାଲ ରେଲୱେ ଷ୍ଟେସନ ରେ ପ୍ରତିଦିନ ହଜାର ହଜାର ସଂଖ୍ୟାରେ ଦାଦନ ଚାଲାଣ କରାଯାଉଛି । ତୁରେକେଲା ପୋଲିସ ୧୧ ଥର ଦାଦନ ଶ୍ରମିକ ଉଦ୍ଧାର କରି ପ୍ରଥମ ସ୍ଥାନ ଅଧିକାର କରିଥିବା ବେଳେ ବେଲପଡା ପୋଲିସ ମଧ୍ୟ ଅନେକ ସ୍ଥାନରେ ଦାଦନ ଶ୍ରମିକ ଉଦ୍ଧାର କରି ଦ୍ବିତୀୟ ସ୍ଥାନରେ ରହିଛି। ତୃତୀୟ ସ୍ଥାନରେ ଖପ୍ରାଖୋଲ ପୋଲିସ ରହିଥିବା ବେଳେ ଆଗକୁ ଯିବା ପାଇଁ ପ୍ରୟାସ ଜାରି ରଖିଛି। କଣ୍ଟାବାଞ୍ଜି ପୋଲିସ ୬ ଥର ଧରି ନିଜର କର୍ତ୍ତବ୍ୟ ସାରିଦେଇଥିବା ବୋଲି ଅନୁମାନ କରାଯାଉଛି । ଚତୁର୍ଥ ପର୍ଯ୍ୟାୟରେ ଜଣାପଡିବ ଦାଦନ ଶ୍ରମିକ ଉଦ୍ଧାର ଉପରେ କେଉଁ ପୋଲିସ ଦ୍ବାରା କେତେ ଉଦ୍ଧାର ହେଉଛନ୍ତି।ସୂଚନା ଅନୁସାରେ ବଲାଙ୍ଗିର ଜିଲ୍ଲା ଖପ୍ରାଖୋଲ ପୋଲିସ ୫ ଜଣ ଦାଦନ ଶ୍ରମିକ ଓ ଜଣେ ଶିଶୁ କୁ ଉଦ୍ଧାର କରିଥିବା ବେଳେ ଦୁଇ ଜଣ ସର୍ଦ୍ଦାର କୁ ଗିରଫ କରିଥିବା ଜଣାପଡ଼ିଛି। ଗିରଫ ଅଭିଯୁକ୍ତମାନେ ହେଲେ ବେଲପଡା ଥାନା କୁମ୍ଭାରଖୁନ ଗାଁ ର ଦୁର୍ଯ୍ୟୋଧନ ହଂସ (୨୫) ଓ ଲାଠୋର ଥାନା ଭରୁଆମୁଣ୍ଡା ଗାଁ ର ଶତୃଘ୍ନ ନିଆଲ। ସେମାନଙ୍କ ନାଁ ରେ ଖପ୍ରାଖୋଲ ଥାନା କେଶ୍ ନମ୍ବର ୨୮୩/୨୪ ତା.୭.୧୨.୨୪ ୟୁ ଏସ ୧୪୩(୩)/୧୬୪/୩୧୮(୪)/୩(୫) ବି ଏନ୍ ଏସ ଆର୍ ଡବ୍ଳୁ ଧାରା ୨୫ ଆଇ ଏସ ଏମ୍ ଡବ୍ଳୁ ଅନୁଯାୟୀ କୋର୍ଟ ଚାଲାଣ କରାଯାଇଥିବା ଥାନାଧିକାରୀ ନରେନ୍ଦ୍ର ଛତର ସୂଚନା ଦେଇଛନ୍ତି। ଏହି ଦୁଇ ଜଣ ସର୍ଦ୍ଦର ଲାଠୋର ଥାନା ଲାଠୋର ଗାଁ ର ଜଣେ ମୁଖ୍ୟ ସର୍ଦ୍ଦାର ପାଖରେ କାମ କରନ୍ତି ବୋଲି ଶୁଣାଯାଏ। ସେହି ମୁଖ୍ୟ ସର୍ଦ୍ଦାର ଜଣକ ପାଖକୁ ପୋଲିସ ପହଞ୍ଚି ଗିରଫ କରିପାରିବେ କି ନାହିଁ ବୋଲି ଜନସାଧାରଣରେ ଚର୍ଚ୍ଚା ହେଉଛି।