09-Jan-2021

ଖଣ୍ଡପଡା,(ପ୍ରଦୀପ କୁମାର ପଣ୍ଡା)-ଖଣ୍ଡପଡା ବ୍ଳକ ଅଧିନ ସଂରକ୍ଷିତ ଜଙ୍ଗଲ ଜମିରୁ ପଥର ମାଫିଆମାନେ ବେଆଇନ ଭାବେ ବ୍ଳାଷ୍ଟିଂ କରି ପଥର ଓ ମେଂଟାଲ ଟ୍ରାକ୍ଟର ଯୋଗେ ଆଖପାଖ  ଅଂଚଳକୁ ଚୋରାରେ ଚାଲାଣ କରୁଥିବା ନେଇ ଅଂଚଳବାସୀ ବାରମ୍ବାର ପ୍ରଶାସନ ନିକଟରେ ଅଭିଯୋଗ କରି ଆସୁଥିଲେ । ଲଘୁ ଖଣିଜ ସଂପଦର ଅବାଧ ଚୋରା ଚାଲାଣ ଯୋଗୁଁ ସରକାର ରାଜସ୍ୱ ହରାଉଥିବା ବେଳେ ବେଆଇନଭାବେ ଡ଼ିନାମାଇଟ ଲଗାଇ ପଥର ବ୍ଳାଷ୍ଟିଂ ଯୋଗୁଁ ଜଙ୍ଗଲ ସଂପଦ କ୍ଷୟ ହେବା ସହ  ବନ୍ୟଜନ୍ତୁମାନଙ୍କ ପ୍ରତି ଏହା ବିପଦର କାରଣ ପାଲଟିଛି । ତେବେ ସଂରକ୍ଷିତ ଜଙ୍ଗଲରୁ ପଥର ଚୋରା ଚାଲାଣ ହେଉଥିବା ବେଳେ ସ୍ଥାନୀୟ ବାସିନ୍ଦାଙ୍କଠାରୁ ସୂଚନା ପାଇ ନୟାଗଡ ବନଖଣ୍ଡ ଅଧିକାରୀ ଏଚଡି ଧନରାଜ ଖଣ୍ଡପଡା ବ୍ଳକର ସିଂଘାପଡା ପଂଚାୟତ ଅଧିନ ବରଗଣ୍ଡ ଗ୍ରାମ ନିକଟରେ ଅଚାନକ ଚଢାଉ କରି ମେଟାଲ ବୋଝେଇ ହୋଇଥିବା ୨ଟି ଟ୍ରାକ୍ଟରକୁ ଜବତ କରିଥିବା ଜଣାଯାଇଛି । ଜବତ ଟ୍ରାକ୍ଟର ଦୁଇଟି ଖଳିସାହି ଅଂଚଳର ଜଣେ ପ୍ରଭାବଶାଳୀ ବ୍ୟକ୍ତିଙ୍କର ବୋଲି ଜଣାପଡିଛି । ପରିବେଶ ଆଇନକୁ ଉଂଲଘନ କରି ସଂରକ୍ଷିତ ଜଙ୍ଗଲରୁ ଟ୍ରାକ୍ଟର ୨ଟି ଚୋରାରେ ପଥର ଚାଲାଣ କରୁଥିବା ଜଣାପଡିଛି ।