30-Nov-2024

ବଲାଙ୍ଗୀର, ରାସ୍ତା ଦୁର୍ଘଟଣାରେ ଆଇନଜୀବୀ ତଥା ବଲାଙ୍ଗୀର ମୁନିସିପାଲିଟି ର ପୂର୍ବତନ କାଉନସିଲର ଶେଷଦେବ ପାଣିଗ୍ରାହୀ ଙ୍କ ଆକସ୍ମିକ ପରଲୋକ ହୋଇ ଯାଇଛି l ଗତକାଲି ସନ୍ଧ୍ୟା ସାଢ଼େ ୮ଟା ସମୟରେ ରେ ଶ୍ରୀ ପାଣିଗ୍ରାହୀ କୌଣସି ଏକ କାମରେ ଗାନ୍ଧୀନଗର ପଡାରୁ ନିଜ ଘରକୁ ଫେରୁଥିବା ବେଳେ ଗାନ୍ଧୀନଗର ପଡା  ଗାନ୍ଧୀ ପ୍ରତିମୂର୍ତ୍ତୀ ପାଖ ବୁଲାଣିରେ ଏକ ବୁଲା କୁକୁରକୁ ବଞ୍ଚାଇବାକୁ ଯାଇ ସାମନା ପଟୁ ଆସୁଥିବା ଏକ ବାଇକ୍ ସହ ମୁହାଁମୁହିଁ ଧକ୍କା ହୋଇଥିଲେ l ଦୁର୍ଘଟଣାରେ ଶେଷଦେବଙ୍କ ଛାତି ଓ ମୁଣ୍ଡରେ ଗଭୀର ଆଘାତ ଲାଗିଥିଲା  l ଦୁର୍ଘଟଣା ପରେ ଗୁରୁତର ଅବସ୍ଥାରେ ଶ୍ରୀ ପାଣିଗ୍ରାହୀଙ୍କୁ ବରଗଡ଼ ବିକାଶ ହସ୍ପିଟାଲରେ ଭର୍ତି କରାଯାଇଥିଲା l ତେବେ ଚିକିତ୍ସାଧୀନ ଅବସ୍ଥାରେ ଶ୍ରୀ ପାଣିଗ୍ରାହୀଙ୍କ ପରଲୋକ ହୋଇଯାଇଛି l ମୃତ୍ୟୁ ସମୟରେ ଶ୍ରୀ ପାଣିଗ୍ରାହୀଙ୍କୁ ୫୫ବର୍ଷ ହେଉଥିଲା l ବଲାଙ୍ଗୀର ରାଧାରାଣୀପଡା ବାସିନ୍ଦା ଶ୍ରୀ ପାଣିଗ୍ରାହୀଙ୍କ ପରିବାରରେ ତାଙ୍କର ଧର୍ମପତ୍ନୀ, ଗୋଟିଏ ପୁଅ ଓ ଗୋଟିଏ ଝିଅ 

ରହିଛନ୍ତି l ଶ୍ରୀ ପାଣିଗ୍ରାହୀ ଜଣେ ମେଳାପୀ, ସୁସଂଗଠକ ଓ କର୍ମତତପର ମଣିଷ ଭାବରେ ସମସ୍ତଙ୍କ ପ୍ରିୟଭାଜନ ହୋଇ ପାରିଥିଲେ l ତାଙ୍କ ଅକାଳ ବିୟୋଗରେ ରାଧାରାଣୀପଡାରେ ଶୋକର ଛାୟା ଖେଳିଯାଇଛି l ବଲାଙ୍ଗୀର ଜିଲ୍ଲା ଓକିଲ ସଂଘ ପକ୍ଷରୁ ଅନୁଷ୍ଠିତ ଏକ ଶୋକସଭାରେ ଶ୍ରୀ ପାଣିଗ୍ରାହୀଙ୍କ ଆକସ୍ମିକ ବିୟୋଗରେ ଏହି  ଅମର ଆତ୍ମାର ସତଗତି ପାଇଁ ଦୁଇ ମିନିଟ୍ ନୀରବ ପ୍ରାର୍ଥନା କରାଯାଇଥିଲା l ସଂଘର ସଭାପତି ଅମରେଶ ତ୍ରିପାଠୀ,ସମ୍ପାଦକ ପ୍ରମୋଦ ବହିଦାର, ରତନ ମହାରଣା, ଦେବାଶିଷ ବିଶ୍ଵାଳ ରାଧାକାନ୍ତ ମହାକୁଡ, ଜିତେନ୍ଦ୍ର ପୁରୋହିତ, ଡ଼ୋଲାମଣୀ ପ୍ରଧାନ,ଭକ୍ତ ନାଏକ,ଗଜେନ୍ଦ୍ର ବାଗ ଓ ଅନ୍ୟ ସହକର୍ମୀ ମାନେ ସ୍ଵର୍ଗତ ପାଣିଗ୍ରାହୀଙ୍କ ସ୍ମୃତିଚାରଣ କରିଥିଲେ l