19-Nov-2024

ରେଢ଼ାଖୋଲ ( ଅନିଲ ପୃଷ୍ଟି ) କେନ୍ଦ୍ର ଶିକ୍ଷା ମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ଆଜି ରେଢ଼ାଖୋଲ ଉପଖଣ୍ଡ ଡାକ୍ତରଖାନାରେ ନିଃଶୁଳ୍କ  ଡାୟାଲିସିସ ସେବାର ଉଦଘାଟନ କରିଛନ୍ତି | ୧୦ ବର୍ଷ ପୂର୍ବରୁ ଦେଶରେ ଡାୟାଲିସିସ ସେବା ଅପହଂଚ ଥିଲା କିନ୍ତୁ ଦେଶର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଙ୍କ ଦୂରଦୁଷ୍ଟି ଯୋଗୁଁ ଆଜି ଏହା ଆମେ ରେଢ଼ାଖୋଲ ଉପଖଣ୍ଡର ଜନସାଧାରଣଙ୍କୁ ନିଃଶୁଳ୍କ ଡାୟାଲିସିସ ସେବା ପ୍ରଦାନ କରିବା 

ନିମନ୍ତେ ସମର୍ଥ ହୋଇପାରିଛୁ | ସେଥିପାଇଁ କେନ୍ଦ୍ରମନ୍ତ୍ରୀ ଭାରତର ପ୍ରଧାନମନ୍ତ୍ରୀ ଏବଂ ଓଡିଶାର ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି | ଏହି ସେବା ଉଦଘାଟନ  ଫଳରେ ବହୁ ବର୍ଷ ପ୍ରତୀକ୍ଷାର ଅନ୍ତ ଘଟିଛି | ପୂର୍ବରୁ ଜନସାଧାରଣ ଏହି ସେବା ପାଇବା ପାଇଁ ଦୂର ଜାଗାକୁ ଯିବାକୁ ପଡୁଥିବା ବେଳେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିଲେ | କିନ୍ତୁ ବର୍ତ୍ତମାନ ଏହି ସେବା ରେଢ଼ାଖୋଲ ଉପଖଣ୍ଡର ଜନସାଧାରଣଙ୍କ ପାଖରେ ପହଂଚିବା ସହିତ ଏହାର ସୁଫଳ ନେଇ ପାରିବେ ବୋଲି କେନ୍ଦ୍ର ମନ୍ତ୍ରୀ କହିଛନ୍ତି | ଡାୟାଲିସିସ ସେଣ୍ଟରରେ ଚାରିଟି ଯନ୍ତ୍ର ଲାଗିଛି |  କେନ୍ଦ୍ରମନ୍ତ୍ରୀ ଆଜି  ଡାୟାଲିସିସ ସେବା ନେଉଥିବା ରୋଗୀମାନଙ୍କୁ ଫଳ ବଣ୍ଟନ ସହ  ସ୍ୱାସ୍ଥ୍ୟ ସମସ୍ୟା ପଚାରି ବୁଝିବା ସହିତ ଆଶୁ କାମନା କରିଛନ୍ତି  | କେନ୍ଦ୍ରମନ୍ତ୍ରୀ  ଆଜି ରେଢ଼ାଖୋଲ ପହଂଚି ପ୍ରଥମେ  ବସଷ୍ଟାଣ୍ଡସ୍ଥିତ ଭୀମ ଭୋଇଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରି ରେଢ଼ାଖୋଲ ଉପଖଣ୍ଡ ଡାକ୍ତରଖାନାରେ ନିଃଶୁଳ୍କ ଡାୟାଲିସିସ ସେବାର ଉଦଘାଟନ କରିଥିଲେ |ଆଜିର ଏହି କାର୍ଯ୍ୟକ୍ରମରେ ଗ୍ରାମ୍ୟ ଉନ୍ନୟନ ବିଭାଗ, ପଞ୍ଚାୟତ ପାନୀୟ ଜଳ ଯୋଗାଣ ମନ୍ତ୍ରୀ 

ରବି ନାରାୟଣ ନାୟକ,  ମତ୍ସ୍ୟ ଓ ପଶୁ ସମ୍ପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ରେଢ଼ାଖୋଲ ବିଧାୟକ ପ୍ରସନ୍ନ ଆଚାର୍ଯ୍ୟ, ରେଙ୍ଗାଲିର ପୂର୍ବତନ ବିଧାୟକ ନାଉରି ନାୟକ, ଉତ୍ତରାଞ୍ଚଳ ରାଜସ୍ବ  ଆଯୁକ୍ତ ଶ୍ରୀରାମ ସଚିନ ରାମଚନ୍ଦ୍ର ଯାଦବ, ଉତ୍ତରାଞ୍ଚଳ ପୋଲିସ ଆଇ.ଜି  ହିମାଂଶୁ ଲାଲ, ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦର, ଏସପି ମୁକେଶ ଭାମୁ, ରେଢ଼ାଖୋଲ ଉପଜିଲ୍ଲାପାଳ ରଶ୍ମିରଂଜନ ମହାନ୍ତ ସମେତ ସମ୍ପୃକ୍ତ ବିଭାଗୀୟ ଅଧିକାରୀ ମାନେ ଉପସ୍ଥିତ ଥିଲେ |