14-Nov-2024

ବରଗଡ଼:(ନିରଞ୍ଜନ ତ୍ରିପାଠୀ)-ଶୁକ୍ରବାର ସରକାରୀ ଉଚ୍ଚ ବିଦ୍ୟାଳୟ ବିଜେପୁରରେ ଶିଶୁ ଦିବସ ସମାରୋହ ଓ ବାର୍ଷିକ ଉତ୍ସବ ବହୁ ଉତ୍ସାହ ଉଦ୍ଦୀପନାରେ ପାଳିତ ହୋଇଯାଇଛି। ଏହି ଦିବସ ଉପଲକ୍ଷେ ବିଭିନ୍ନ କାର୍ଯ୍ୟକ୍ରମ ସକାଳ ୭ ଟା ସମୟରୁ ଆରମ୍ଭ ହୋଇ ସନ୍ଧ୍ଯା ୬ ଟା ପର୍ଯ୍ୟନ୍ତ ଚାଲିଥିଲା। ଛାତ୍ରଛାତ୍ରୀମାନେ ବିଦ୍ୟାଳୟକୁ ପ୍ରବେଶ କରିବା ସମୟରେ ଶିକ୍ଷକ ଶିକ୍ଷୟିତ୍ରୀମାନେ ସେମାନଙ୍କ ମଥାରେ ଚନ୍ଦନ, ସିନ୍ଦୁର ଲଗାଇ ଥିଲେ। ଜବାହରଲାଲ ନେହେରୁଙ୍କ ଅତି ପ୍ରିୟ ଗୋଲାପ ଫୁଲ ଦେଇ ଛାତ୍ରଛାତ୍ରୀମାନଙ୍କୁ ସ୍ଵାଗତ କରାଯାଇଥିଲା।ପ୍ରଧାନ ଶିକ୍ଷକ ଅନ୍ୟ ଶିକ୍ଷକଶିକ୍ଷୟିତ୍ରୀମାନଙ୍କୁ ମଧ୍ଯ ସ୍ବାଗତ କରିଥିଲେ।ପରେ ପ୍ରଧାନ ଶିକ୍ଷକ ଶ୍ରୀ ଯୁକ୍ତ ମନୋଜ ବେହେରାଙ୍କ ଅଧ୍ୟକ୍ଷତାରେ ଏକ ସଭା ଅନୁଷ୍ଠିତ ହୋଇଥିଲା। ଏଥିରେ ବିଜେପୁର ଗୋଷ୍ଠୀ ଶିକ୍ଷା ଅଧିକାରୀ ନାରାୟଣ ଭୁଏ,ବିଜେପୁର ବରିଷ୍ଠ ନାଗରିକ ମଞ୍ଚ ର ସଭାପତି ନବ କୁମାର ସାହୁ, ବିଶିଷ୍ଟ ଶିକ୍ଷାବିତ ସ୍ବାଧୀନ କୁମାର ସାହୁ,ବିଦ୍ୟାଳୟର ପୂର୍ବତନ ଛାତ୍ର  ତଥା ଅବସରପ୍ରାପ୍ତ ଗୋଷ୍ଠୀ ଶିକ୍ଷା ଅଧିକାରୀ ଶ୍ରୀଯୁକ୍ତ ଘନଶ୍ୟାମ ସାହୁ,ଡାକ୍ତର ତହସିଲ ସାହୁ,ବିଦ୍ୟାଳୟର ମୋ ସ୍କୁଲ ଅଭିଯାନର ସଭାପତି ଶ୍ରୀଯୁକ୍ତ ମନୋଜ କୁମାର ପଣ୍ଡା ଅତିଥି ଭାବରେ ଯୋଗଦେଇଥିଲେ। ଛାତ୍ରୀମାନେ ସ୍ବାଗତ ସଙ୍ଗୀତ ପରିବେଷଣ କରିଥିଲେ।

ମଞ୍ଚାସୀନ ଅତିଥିଗଣ  ଶିଶୁ ଦିବସ ଉପରେ ନିଜ ନିଜର ମତାମତ ରଖି ଛାତ୍ରଛାତ୍ରୀମାନଙ୍କୁ ସୁ-ନାଗରିକ ହେବା ପାଇଁ ମାର୍ଗ ଦର୍ଶନ ଦେଇଥିଲେ ଏବଂ ବିଦ୍ୟାଳୟ ତଥା ଛାତ୍ରଛାତ୍ରୀମାନଙ୍କର ଉଜ୍ଜ୍ବଳ ଭବିଷ୍ୟତ କାମନା କରିଥିଲେ। ଶିକ୍ଷକ ଶ୍ରୀଯୁକ୍ତ ରବି ଶଙ୍କର ଗୁରୁ ସଭାକୁ ପରିଚାଳନା କରିଥିଲେ । ଶିକ୍ଷକ ନିର୍ମଳ ସାହୁ  ଧନ୍ୟବାଦ ଅର୍ପଣ କରିଥିଲେ। ଏହା ପରେ ଛାତ୍ରଛାତ୍ରୀମାନଙ୍କୁ ବିଦ୍ୟାଳୟ ତଥା ବରିଷ୍ଠ ନାଗରିକ ମଞ୍ଚ  ତରଫରୁ ଉପହାର ପ୍ରଦାନ କରାଯାଇଥିଲା।  ଏହା ପରେ ସମସ୍ତ ଛାତ୍ରଛାତ୍ରୀମାନଙ୍କୁ ଭୁରି ଭୋଜନରେ ଆପ୍ଯାୟିତ କରାଯାଇଥିଲା । ଭୋଜନ ପରେ  ଛାତ୍ରଛାତ୍ରୀମାନଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରା ଯାଇଥିଲା।

ଏହି କାର୍ଯ୍ୟକ୍ରମଟିକୁ ସମସ୍ତେ ମନଭରି ଉପଭୋଗ କରିଥିଲେ।ଶିକ୍ଷକ ଶ୍ରୀଯୁକ୍ତ ନିର୍ମଳ ସାହୁଙ୍କ ଦ୍ବାରା ରଚିତ ତଥା ଶିକ୍ଷକ ଶ୍ରୀଯୁକ୍ତ ରବିଶଙ୍କର ଗୁରୁଙ୍କ ଦ୍ବାରା ନିର୍ଦ୍ଦେଶିତ ନାଟକ 'ଉକିଆ' ଛାତ୍ରଛାତ୍ରୀମାନଙ୍କ ଦ୍ବାରା ପ୍ରଦର୍ଶିତ ହୋଇଥିଲା।ଏହା ନିଶା ନିବାରଣ କରିବା ପାଇଁ ଏକ ସଚେତନତା ଧର୍ମୀ ନାଟକ ଥିଲା। ଏହା ସମସ୍ତଙ୍କ ମନକୁ ଛୁଇଁ ପାରିଥିଲା।ଛାତ୍ରଛାତ୍ରୀମାନଙ୍କ ଦ୍ବାରା ସଂଗୀତ, ନୃତ୍ଯ ପରିବେଷଣ କରାଯାଇଥିଲା।ସାଂସ୍କୃତିକ କାର୍ଯ୍ୟକ୍ରମ ପରେ ଛାତ୍ରଛାତ୍ରୀମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା।ଦିନ ତମାମ ଚାଲି  ଥିବା ବିଭିନ୍ନ କାର୍ଯ୍ୟକ୍ରମ ରେ ବିଦ୍ୟାଳୟର ଶିକ୍ଷକ ଜୟନ୍ତ ପଧାନ, ଶଙ୍କର ପଟେଲ, ପୁରନ୍ଦର ବେହେରା,ନିର୍ମଳ ସାହୁ, ଜିତେନ୍ଦ୍ର ପଧାନ ,ସୁବ୍ରତ ପଧାନ, ରାହୁଲ ମହାନନ୍ଦିଆ, ରୂପକ ପଧାନ, ଭବାନି ଶଙ୍କର ସାହୁ, ହେମସାଗର ସାହୁ,ଉପେନ୍ଦ୍ର ଖମାରୀ,ବୁଦ୍ଧଦେବ ଦାସ, ନିରଞ୍ଜନ ରଣା, ଶିକ୍ଷୟିତ୍ରୀ ରଶ୍ମୀରେଖା ମେହେର, ବନ୍ଦନା ପଧାନ  ଫିରୋଜା ବାନୁ ସହଯୋଗ କରିଥିଲେ।