11-Nov-2024

ବରଗଡ଼:(ନିରଞ୍ଜନ ତ୍ରିପାଠୀ)- ମାନସିଂହ ସାହିତ୍ୟ ସଂସଦ, ନନ୍ଦଳା,ପୁରୀଦ୍ଵାରା ଆୟୋଜିତ ୪୬ତମ ଆଭାସୀ କବିତା ଆସର ଗୁଗୁଲୁ ମିଟ ମାଧ୍ୟମରେ ବିଷ୍ଣୁପ୍ରସାଦ ଦଳେଇଙ୍କ ଅଧ୍ୟକ୍ଷତାରେ ଗତ ନଭେମ୍ବର ୧୦ ତାରିଖରେ ଅନୁଷ୍ଠିତ ହୋଇଯାଇଅଛି । ଏହି କବିତା ଆସରରେ ମୁଖ୍ୟ ଅତିଥି ଭାବେ ରାଉରକେଲାର ପ୍ରାକ୍ତନ ଅଧ୍ୟକ୍ଷା ଶ୍ରୀମତୀ ବସନ୍ତ ମଞ୍ଜରୀ ରାୟ ଯୋଗଦେଇ ଓଡ଼ିଆ କବିତା ଓ ମାନସିଂହଙ୍କ ବିଷୟରେ ଆଲୋଚନା କରିବା ସହ ଅନ୍ୟ ଉପସ୍ଥିତ ସାହିତ୍ୟ ସାଧକ ଓ ସାଧିକାମାନଙ୍କୁ ଉତ୍ସାହିତ କରିଥିଲେ । ଅନ୍ୟତମ ବରେଣ୍ୟ ଅତିଥି ରୂପେ ପ୍ରଫେସର ସରୋଜିନୀ ବରାଇ,  ସୁଦୂର ଆମେରିକାରୁ ଚନ୍ଦ୍ରା ମିଶ୍ର ଉପସ୍ଥିତ ରହି କବିତା ପାଠ କରିଥଲେ । ସଂସଦର ମୁଖ୍ୟ ଉପଦେଷ୍ଟା ଶ୍ରୀଯୁକ୍ତ ପ୍ରେମାନନ୍ଦ ବେହେରା ପ୍ରାରମ୍ଭିକ ବକ୍ତବ୍ୟ ପ୍ରଦାନ କରିଥିଲେ । ସମ୍ପାଦକ ଶ୍ରୀଯୁକ୍ତ  ଲଳିତ କୁମାର ସ୍ବାଇଁ ଆଭିମୁଖ୍ୟ ଉପସ୍ଥାପନ କରିଥିଲେ । ସମ୍ପାଦକ ଲଳିତ ସ୍ବାଇଁଙ୍କ ସଂଯୋଜନାରେ ଦେଶ ବିଦେଶରୁ ୪୦ରୁ ଉର୍ଦ୍ଧ୍ବ  ସାହିତ୍ୟ ସାଧକ ସାଧିକା ଉପସ୍ଥିତ ରହି ସ୍ବରଚିତ କବିତା ପାଠ କରିଥିଲେ । ଶେଷରେ ଅନୁଷ୍ଠାନର ସଂଯୋଜକ ବିଦ୍ୟାଧର ଦଳବେହେରା ସମସ୍ତଙ୍କୁ ଧନ୍ୟବାଦ୍ ଅର୍ପଣ କରିବା ସହ  ଆଗକୁ ସହଯୋଗ କାମନା କରିଥିଲେ । ଆସନ୍ତା କବିତା ଆସର ଡିସେମ୍ବର ଶେଷ ସପ୍ତାହରେ ମାନସିଂହଙ୍କ ଜନ୍ମପୀଠ ନନ୍ଦଳାଠାରେ ଅନୁଷ୍ଠିତ ହେବ ବୋଲି ସମ୍ପାଦକ ଲଳିତ କୁମାର ସ୍ୱାଇଁ ଘୋଷଣା କରିଥିଲେ।