10-Nov-2024

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ପାଇକମାଲ ବ୍ଲକ ଅନ୍ତର୍ଗତ ହିରାପୁର ଦେଇ ଟେମରୀ କୁ ଯୋଗାଯୋଗ କରୁଥିବା ରାସ୍ତା ଆର.ଡି ବିଭାଗୀୟ ରାସ୍ତା ଅଟେ।ଗତ କିଛି ମାସ ତଳେ ପ୍ରବଳ ବର୍ଷା ପାଣିରେ ଅନେକ କଲଭଟ୍ ସହ ରାସ୍ତା ଧୋଇ ହୋଇ ଯିବା ଫଳରେ ଯିବା ଆସିବାରେ ଅନେକ ବାଧା ଉପୁଜି ଥିଲା।ପାଇକମାଲ ବ୍ଲକ ଅଧିନସ୍ଥ ଫ୍ରେଜରପୁର ରେ ଥିବା ଏକମାତ୍ର ଓଡ଼ିଶା ଆଦର୍ଶ ବିଦ୍ୟାଳୟର ବିଦ୍ୟାର୍ଥୀ ମାନେ ସେ ସମୟରେ ନାହିଁ ନଥିବା ଅସୁବିଧାର ସମ୍ମୁଖିନ ହେବା ସହ ଲକ୍ଷ୍ମୀବସରେ ଯାତାୟାତ ସମ୍ଭବ ହୋଇ ପାରିନଥିଲା।ସେ ଯାହାବି ହେଉ ନୂତନ ଭାବେ ଓଡ଼ିଶା ସରକାର ଆସିବା ଏବଂ ତୁରନ୍ତ ରାସ୍ତା ନିର୍ମାଣର ଟେଣ୍ଡର ସୃଷ୍ଟି କରି ରାସ୍ତା ନିର୍ମାଣ କାମ ଖୁବ୍ ଯୋରସୋରରେ ଚାଲିଥିବା ବେଳେ,ଛେଲିଆମାଲ ରେ ନିର୍ମାଣ ହେଉଥିବା ଛୋଟିଆ ବ୍ରିଜ ପାଇଁ ଲୋକଙ୍କ ଯାତାୟତରେ ବ୍ୟାହତ ସୃଷ୍ଟି ହେବାକୁ ହୃଦୟଙ୍ଗମ କରି ଆମ ପ୍ରତିନିଧି ନିଯୁକ୍ତି ପ୍ରାପ୍ତ ଠିକାଦାରଙ୍କ ସହ ଯୋଗାଯୋଗ କରି ଥିଲେ। ହେଲେ ଯାଗା ଅଭାବ କାରଣରୁ ଛେଲିଆମାଲ ଠାରେ ବାଇପାସ୍ ରାସ୍ତା (ଅସ୍ଥାୟୀ) କରାଯାଇ ପାରିନାହିଁ,ଟେମରୀରୁ ଝାରମୁଣ୍ଡା ବାଟଦେଇ ଏକ ବାଇପାସ୍ ରାସ୍ତା ଦିଆଯାଇଛି ବୋଲି କହିଥିଲେ।ହେଲେ ସେପଟେ ହିରାପୁର, ଫ୍ରେଜରପୁର,ଛେଲିଆମାଲ ରେ ଜନସାଧାରଣ ଯିବା ଆସୁବାକୁ ନେଇ ଆପଣ କେମିତି ଭୁଲି ଗଲେ ବୋଲି ଜନସାଧାରଣ ଠିକାଦାରଙ୍କୁ ପ୍ରଶ୍ନ କରନ୍ତି। ଏଠାରେ ଉଲ୍ଲେଖଯୋଗ୍ୟ ଯେ,ଦିର୍ଘ ୧୨ ଦିନ ହେଲା ଏଇ ରାସ୍ତା ଦେଇ ଲକ୍ଷ୍ମୀ ବସ ଯାତାୟତ କରି ପାରୁନାହିଁ।ଯାହା ଫଳରେ ଫ୍ରେଜରପୁର ସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀମାନେ ବହୁ ହଇରାଣ ହରକତ ହେବା ସହ ଅଜଥା ଖର୍ଚ୍ଚାନ୍ତରେ ଚଢା ଦର ଦେଇ ବିଭିନ୍ନ ଯାନବାହାନରେ ଏପଟ ସେପଟ ଦେଇ ସ୍କୁଲ କୁ ଆସିବାକୁ ବାଧ୍ୟ ହେଉଛନ୍ତି।୧୩ କୋଟି ବ୍ୟୟରେ ଉକ୍ତ ରାସ୍ତା ନିର୍ମାଣ ଚାଲିଛି ବୋଲି ଜଣାଯାଏ।