04-Nov-2024

ବଲାଙ୍ଗୀର/ଦେଓଗାଁ-ବଲାଙ୍ଗୀର ଜିଲ୍ଲାରେ ଅନେକ ପର୍ଯ୍ୟଟନକ୍ଷେତ୍ର ରହିଛି । ମୁଖ୍ୟତଃ ବଡବଡ ପାହାଡ ଓ ଜଙ୍ଗଲରେ ଇକୋଟୁରିଜମର ସୁବିଧା କରାଯାଇ ପାରିବ । ସେହିକ୍ରମରେ ଦେଓଗାଁ ବ୍ଲକଅଞ୍ଚଳର ଭୀମଡୁଙ୍ଗୁରୀ ଓ ଚାନ୍ଦଲୀପାହାଡ ପର୍ଯ୍ୟଟନକ୍ଷେତ୍ରର ବିକାଶ ପାଇଁ ପ୍ରୟାସ ଜାରିରହିବ ବୋଲି ବଲାଙ୍ଗିର ଜିଲ୍ଲା ଦେଓଗାଁ ବ୍ଲକ ମୁକୁନ୍ଦପୁର ପଞ୍ଚାୟତ ଅନ୍ତର୍ଗତ ଭୀମଡୁଙ୍ଗୁରୀ ପର୍ଯ୍ୟଟନସ୍ଥଳୀରେ ଚାଲିଥିବା ୧୦ତମ ଭୀମପାହାଡ ମହୋତ୍ସବ ତୃତୀୟସଂନ୍ଧ୍ୟାରେ ମୁଖ୍ୟଅତିଥି ଭାବରେ ଯୋଗଦେଇଥିବା ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ କହିଛନ୍ତି । ମହୋତ୍ସବ କମିଟୀ ଅଧ୍ୟକ୍ଷ ଲକ୍ଷ୍ମଣ କୁମାର ମେହେରଙ୍କ ସଭାପତିତ୍ୱରେ ଅନୁଷ୍ଠିତ ସଭା ରେ ମୁଖ୍ୟ ଅତିଥିଭାବେ ବଲାଙ୍ଗିର ବିଧାୟକ କଳିକେଶ ନାରାୟଣ ସିଂଦେଓ,ସମ୍ମାନୀତ ଅତିଥି ଭାବରେ ଜିଲ୍ଲାପରିଷଦର ସଭାପତି ଦେବକୀ ସାହୁ,ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ଯୋଗଦେଇ ତତ୍କାଳିନ ନବୀନ ସରକାର ଭୀମପାହାଡକୁ ପର୍ଯ୍ୟଟନ ସ୍ଥଳୀର ମାନ୍ୟତା ଦେବା ଫଳରେ ଏହି ଅଞ୍ଚଳର ଅନେକ ବିକାଶ ଆଗେଇଛି । ଆଗକୁ ଏହି ପର୍ଯ୍ୟଟନସ୍ଥଳୀର ଆହୁରି ବିକାଶ ପାଇଁ ପ୍ରୟାସ ଜାରି ରହିବାସହ ଦେଓଗାଁ ବ୍ଲକର ଚାନ୍ଦଳି ପାହାଡକୁ ମଧ୍ୟ ପର୍ଯ୍ୟଟନ ସ୍ଥଳୀର ମାନ୍ୟତା ଦିଗରେ ଉଦ୍ୟମ ଜାରି ରହିବ ବୋଲି କହିଥିଲେ । ମହୋତ୍ସବ ଦ୍ୱାରା ଲୁକ୍କାୟିତ ପ୍ରତିଭାର ବିକାଶ ଓ ଏକତା ବଜାୟ ରହିଥାଏ ବୋଲି ମତବ୍ୟକ୍ତ କରିଥିଲେ । କମିଟୀର ସଭାପତି ପ୍ରମୋଦ ବହିଦାର ସ୍ୱାଗତ ଅଭିଭାଷଣ ରଖିଥିବା ବେଳେ ଉପଦେଷ୍ଟା ସଦସ୍ୟ ଶୈଳେନ୍ଦ୍ର କୁମାର ସାହୁ ଧନ୍ୟବାଦ ଅର୍ପଣ କରିଥିଲେ । ଏ ଅବସରରେ ବଲାଙ୍ଗିରର ମାହେଶ୍ୱରୀ ସ୍ୱେଚ୍ଛାସେବୀ ସଂଗଠନ ଅଙ୍କୁଶ ପାଣ୍ଡିଆ ଓ ସାଥି, ଟିଟିଲାଗଡ ବ୍ଲକ ଖୋଲାନର ସରପଞ୍ଚ ନରେଶ ଅଗ୍ରୱାଲ ଏବଂ ନୁଆପାଲି ଧନୁଯାତ୍ରା କମିଟୀକୁ ଭୀମପାହାଡ ସମ୍ମାନରେ ସମ୍ମାନୀତ କରାଯାଇଥିଲା । ଏହାସହ ପୂର୍ବତନ ସରପଞ୍ଚ ଶ୍ରଦ୍ଧାଞ୍ଜଳୀ ସାଏ, ଚକ୍ରଧର ମଲ୍ଲିକଙ୍କୁ ସମ୍ବର୍ଦ୍ଧିତ କରାଯାଇଥିବାବେଳେ ପୂର୍ବତନ ସରପଞ୍ଚ ସ୍ୱର୍ଗତା ଲଲିତା ଭୁଏଙ୍କୁ ମରଣୋତ୍ତର ସମ୍ମାନ ପ୍ରଦାନ କରାଯାଇଥିଲା ।  ପରେ ବଲାଙ୍ଗିର କୋଶଲ ଫୋକ ଏକାଡେମୀ ଦ୍ୱାରା ଡାଲଖାଇ, ଜରାସିଂହା ସୁରଭି ଦ୍ୱାରା ଦଶାବତାର ଓ ମଲମଣ୍ଡା ବଜାଶାଲ ଆନୁଷ୍ଠାନ ଦ୍ୱାରା ପାରମ୍ପାରିକ ନୃତ୍ୟ ପ୍ରଦର୍ଶିତ ହୋଇଥିଲା ।

ଏହି ଦିନ ଅପରାହ୍ନରେ ଭୀମପାହାଡର ଅତୀତ ଓ ବର୍ତ୍ତମାନ ଶୀର୍ଷକ ଉପରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଏଥିରେ ପରିବେଶବିତ୍‌, ଶିକ୍ଷାବିତ ଓ ଛାତ୍ରଛାତ୍ରୀ ସାମିଲ ହୋଇ ମତବ୍ୟକ୍ତ କରିଥିଲେ । ପ୍ରତ୍ୟହ ରବିନ୍ଦ୍ର ସାହୁ ଓ ସାଥିଙ୍କ ଦ୍ୱାରା କଂସ ଦରବାର , ୨୪ ପ୍ରହରୀ ନାମଯଜ୍ଞ ଓ ମିନାବଜାର ମୁଖ୍ୟ ଆକର୍ଷଣ ପାଲଟିଛି । କାର୍ଯ୍ୟକ୍ରମକୁ ମହୋତ୍ସବ କମିଟୀର ସଂପାଦକ ଗୋବର୍ଦ୍ଧନ ସାହୁ,କୋଷାଧ୍ୟକ୍ଷ ଅଭିମନ୍ୟୁ ମାଝୀ,ରାକେଶ ପଧାନ ଓ ଅନ୍ୟାନ୍ୟ କର୍ମକର୍ତ୍ତା ,ଗିରିଗୋବର୍ଦ୍ଧନ ପୂଜା ପରିଚାଳନା କମିଟୀ ତଥା ସ୍ଥାନୀୟ ଅଞ୍ଚଳବାସୀ ସହଯୋଗ କରୁଛନ୍ତି ।