19-Oct-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ଲାଠୋର ଥାନା ଅନ୍ତର୍ଗତ ଜଲପାଙ୍କେଲ ଗ୍ରାମର ଏକ ନିଖୋଜ୍ ନାବାଳକର ମୃତଦେହକୁ ପରଦିନ ସକାଳେ ନିକଟସ୍ଥ  ଝଲିଆଲିଟି ଗ୍ରାମର ବଡଡୁଙ୍ଗୁରି ଉପରୁ ଠାବ କରାଗଲା ପରେ ପରିବାର ତଥା ଗ୍ରାମବାସୀଙ୍କ ପକ୍ଷରୁ ଏହାକୁ ଏକ ବଳିକାଣ୍ଡ ବୋଲି ଦୃଢ ସନ୍ଦେହ କରାଯାଉଛି। ଏ ସମ୍ପର୍କରେ ଲାଠୋର ଥାନାରେ ଏକ ମାମଲା ଋଜୁ କରାଯାଇ ଶବବ୍ୟବଚ୍ଛେଦ ପୂର୍ବକ ଉକ୍ତ ଗ୍ରାମର ଜଣେ ସନ୍ଦିଗ୍ଧ ଓ ତା'ର ପରିବାରକୁ ଥାନା ଅଟକ ରଖି ପୁଲିସ୍ ପଚରାଉଚୁରା କରୁଛି। ଅଦ୍ୟାବଧି ଶବବ୍ୟବଚ୍ଛେଦ ରିପୋର୍ଟ ମିଳିନାହିଁ । ଏହି ରିପୋର୍ଟ ଆସିଲା ପରେ ଯାଇ ଏହା ଏକ ବଳିକାଣ୍ଡ, ସନ୍ଦିଗ୍ଧ ବ୍ୟକ୍ତିଟି ପ୍ରକୃତ ଆସାମୀ ନା  ନାହିଁ, ଜଣାପଡିବ ।

ଘଟଣାରୁ ପ୍ରକାଶ ଯେ, ଗ୍ରାମର ୫ ମ ଶ୍ରେଣୀରେ ପଢୁଥିବା ତପନ ବେମାଲଙ୍କ ସାନପୁଅ ମଣ୍ଟୁ ଓରଫ ସୋମନାଥ(୧୧) ୧୭ ତାରିଖ ଅପରାହ୍ନ ପ୍ରାୟ ୩ ଟା ବେଳୁ ଘରୁ ବାହାରି ସନ୍ଧ୍ୟା ପର୍ଯ୍ୟନ୍ତ ଘରକୁ ନ ଫେରିବାରୁ ଘରଲୋକେ ସବୁଆଡେ ଖୋଜାଖୋଜି କରି ନିରାଶ ହୋଇପଡିବା ପରେ ସେହିଦିନ ରାତିରେ ଯାଇ ସ୍ଥାନୀୟ ଲାଠୋର ଥାନାରେ ଏକ ନିଖୋଜ୍ ଏତଲା ଦେଇଥିଲେ। ପୁଲିସ୍ ମଧ୍ୟ ରାତିସାରା ଖୋଜି ସନ୍ଧାନ ପାଇ ନ ଥିଲା। କିନ୍ତୁ ପରଦିନ ସକାଳେ ପିଲାଟିର ମୃତଦେହଟି ନିକଟସ୍ଥ ଝଲିଆଲିଟି ଗ୍ରାମର ବଡଡୁଙ୍ଗୁରି ପାହାଡ ଉପରେ ପଡିଥିବା ଠାବ କରାଯାଇଥିଲା। ସେଠାରେ ପିଲାଟିର ଶବ ଉପରକୁ ମୁହଁକରି ପ୍ୟାଣ୍ଟସାର୍ଟ ପିନ୍ଧି ପାଖରେ ତା'ର ଚପଲ ରଖାଯିବା ଅବସ୍ଥାରେ ପଡିଥିବା ବେଳେ ମୁଣ୍ଡ ପଛପଟେ ଗଭୀର କ୍ଷତ ସହ ଛାତି, ପେଟରେ ସାମାନ୍ୟ ଆଘାତ ସହ କାନ ପାଖରେ ବି ରକ୍ତ ଲାଗିଥିଲେ ହେଁ ଅନ୍ୟ କେଉଁଠାରେ ହତ୍ୟା କରାଯାଇ ସେଠାରେ ଆଣି ପକାଯାଇଥିବା ଭଳି ଜଣାପଡୁଥିବା ଓ ନିକଟରେ ଏକ ଅଧାଖୋଳା ଗାତ ଥିବା ଦେଖଣାହାରୀଙ୍କ ସୂତ୍ରରୁ ପ୍ରକାଶ। କିଛିବର୍ଷ ପୂର୍ବରୁ ସେଇଠାରୁ ଉଦ୍ଧାର କରାଯାଇଥିବା ଗ୍ରାମର ଅନ୍ୟଜଣେ ପିଲାର ଗଳିତ ମୃତଦେହକୁ ମଧ୍ୟ ଉପଯୁକ୍ତ ତଦନ୍ତ କରାଯାଇ ନଥିଲେ ହେଁ ଓ ଅନ୍ୟାନ୍ୟ କାରଣରୁ ପରିବାର ଓ ଲୋକଙ୍କ ପକ୍ଷରୁ ଏହାକୁ ବଳି ଚଢାଯାଇଥିବା ଓ ପଡୋଶୀ ନୂଆପଡା ଜିଲ୍ଲାର କୋମନା ଥାନାଅନ୍ତର୍ଗତ ଚାଉଲଡିଆ ଗ୍ରାମରୁ ଏପରି ଏକାଧିକ ନରବଳି ଅଭିଯୋଗର ସନ୍ଦେହରେ ତଡାଖାଇ ଆସି ତାଙ୍କ ଗ୍ରାମରେ ରହୁଥିବା ଜଣେ ସନ୍ଦିଗ୍ଧ ବ୍ୟକ୍ତି ଉପରେ ସନ୍ଦେହ ଦୃଢୀଭୂତ ହୋଇଥିଲା। ପୁଲିସ୍ ପ୍ରଥମେ ଉକ୍ତ ସନ୍ଦିଗ୍ଧବ୍ୟକ୍ତିକୁ ଥାନାକୁ ନେଇ ରାତିରେ ଛାଡିଦେଇଥିବା କୁହାଯାଉଛି ।

 ଏଣୁ ଗ୍ରାମବାସୀମାନେ ତାକୁ ଗିରଫ ଦାବିକରି ଲାଠୋର- ଖପ୍ରାଖୋଲ ରାସ୍ତା ଅବରୋଧ କରିଥିଲେ। ସେଠାରେ ଲାଠୋର ଥାନାର ଜଣେ ଏଏସଆଇ ୟାଡୁ ସ୍ୟାଡୁ କହିବାରୁ ଉତ୍ତ୍ୟକ୍ତ ଲୋକମାନେ ତାଙ୍କୁ ମାଡ ମାରିଥିବା ପ୍ରକାଶ ।

ତେବେ ପୁଲିସ୍ ଭବାନୀପାଟଣାରୁ ଡଗ୍ ସ୍କ୍ବାର୍ଡ ମଗାଇ ତଦନ୍ତ କଲାବେଳେ ପୁଲିସ୍ କୁକୁରଟି ଘଟଣାସ୍ଥଳରୁ ଉକ୍ତ ସନ୍ଦିଗ୍ଧ ବ୍ୟକ୍ତିର ଘରକୁ ବାରମ୍ବାର ଯାଇଥିଲା। ଏଣୁ ପୁଲିସ୍ ଉକ୍ତ ସନ୍ଦିଗ୍ଧବ୍ୟକ୍ତିକୁ ସପରିବାର ଥାନାକୁ ନେଇ ଅଟକ ରଖି ପଚରାଉଚୁରା କରୁଛି ।

ଉଲ୍ଲେଖନୀୟ ଯେ, ୧୧ ବର୍ଷତଳେ ୨୦୧୩ ରେ ମଧ୍ୟ ଏଇ ପାହାଡ଼ ଉପରୁ ଗ୍ରାମର ସୋନୁ ରଣାଙ୍କ ପୁଅ ମଧୁ(୧୮) ର ଗଳିତ ମୃତଦେହକୁ ଉଦ୍ଧାର କରାଯାଇଥିଲା। ତେବେ କେତେକ ଏହାକୁ ବଳି ସନ୍ଦେହ କରୁଥିଲେ ହେଁ, ଚତୁରତାର ସହିତ ହତ୍ୟାକାରୀ ଏହାକୁ ଗ୍ରାମର ଜଣେ ଝିଅ ସହ ପ୍ରେମଜନିତ ଆତ୍ମହତ୍ୟା ବୋଲି ପ୍ରଚାର କରି ପ୍ରକୃତଘଟଣାକୁ ଭିନ୍ନମୋଡ ଦେଇ ଚପାଇ ଦେବାରେ ସଫଳ ହୋଇଥିବା କୁହାଯାଉଛି ।

ସେ ଯାହାହେଉ, ଏଇ ଘଟଣାରେ ଘର ଭିତରେ ଘରେ ପୂଜାପାତି କରୁଥିବା ଦେବୀ ସମ୍ମୁଖରେ  ଗୁପ୍ତଧନ ବା  ଅନ୍ୟ କୌଣସି ଅଭୀଷ୍ଟ ସିଦ୍ଧି ଉଦ୍ଦେଶ୍ୟରେ ବଳି ଦିଆଯାଇ ପରେ ରାତିରେ ପୁଲିସ୍ ଛାଡିଦେବାରୁ ଆସି ପାହାଡ ଉପରେ ପୋତି ନପାରି ଗାତ ଖୋଳିଥିଲେ ହେଁ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ସଂପ୍ରତି ଲାଠୋର ଥାନାରେ ସନ୍ଦିଗ୍ଧ ବ୍ୟକ୍ତି, ତା'ର ପତ୍ନୀ, ବୋହୁ, ଭାଇ ଓ ଅନ୍ୟଜଣେ ମେହେର ଲୋକକୁ ଅଟକ ରଖି ପଚରାଉଚୁରା ଚାଲିଛି ।