19-Oct-2024

ଭରସୁଜା:(ନିରଞ୍ଜନ ତ୍ରିପାଠୀ)-ବଲାଙ୍ଗୀର ଜିଲ୍ଲା ଭରସୁଜା ଠାରେ  ଷଷ୍ଠତମ ମାଁ ଛେଲିଆପାଟ ମହୋତ୍ସବ ଉଦଯାପିତ ହୋଇଯାଇଛି। ଛେଲିଆ ପାହାଡ଼ ରେ ମାଁ ଛେଲିଆପାଟଙ୍କ ପୂଜା ଆରମ୍ଭ ହୋଇଥାଏ ।ଏହି ପୂଜା ପୁଅଜିଉଁତିଆ ଦିନରୁ ଆରମ୍ଭ ହୁଏ ଷୋହଳ ପୂଜା ଓ ଏହା ଦଶହରା ପୂର୍ଣ୍ଣିମା ଦିନରୁ ତିନି ଦିନ ଧରି ମାଁ ଛେଲିଆପାଟଙ୍କ ବଇଲ୍ ଯାତରା ହୋଇଥାଏ ତତ୍ ସଙ୍ଗେ ସଙ୍ଗେ ମାଁ ଛେଲିଆପାଟ ମହୋତ୍ସବ ପାଳନ ହୋଇଥାଏ।ମାଁ ଛେଲିଆପାଟଙ୍କ ବଇଲ୍ ଯାତରାରେ ଏକ ନିଆରା ଦେଖିବାକୁ ମିଳିଥାଏ। ଛେଳିଆ ପାହାଡ଼ ବା ଡଙ୍ଗରରୁ ମାଁ ଛେଲିଆପାଟ ଦେବୀ ବଇଲ୍ ନାଚି ନାଚି ମାଁ ଛେଲିଆପାଟ ମନ୍ଦିର ଭରସୁଜା ପର୍ଯ୍ୟନ୍ତ ଆସିଥାନ୍ତି। ଦେବୀଙ୍କଠାରେ ଝାଁକର ଘରରୁ ଦେବୀ ପାଇଁ ପୂଜା ଭାର ଆଉ ଛତର ବୈରକ ମନ୍ଦିରକେ ଆସିଥାଏ। ଝାଁକର୍ ବା ଦେହେରି ପୂଜା ସାରିବା ପରେ ଏକ ନିଆରା ଦେଖିବାକୁ ମିଳିଥାଏ। ଦେବୀ ପୂଜାରେ ଝାକର ପୂଜା କରନ୍ତି କିନ୍ତୁ ମାଁ ଛେଲିଆପାଟଙ୍କ ପୂଜା କୁଳ ପୁରୋହିତ କରନ୍ତି।ଏହି ପୂଜା ପୁରୋହିତ ଅନନ୍ତ ମିଶ୍ର କରିଥିଲେ ଓ  ମାଁ ଛେଲିଆପାଟଙ୍କ ପୂଜାରେ ସାତଟି ଜୁଗାର,ସାତଟି ଲିଆ ଲଡୁ,ବେଲ ପତ୍ର, କଳା ଦହନା, ଏବଂ ମାଁ ଛେଲିଆପାଟଙ୍କ କୁରାଢ଼ି,ସିକିଲି ଓ ଅଣ୍ଟାରେ ଘୁଲଘୁଲା ଦେଖିବାକୁ ମିଳିଥିଲା। ହଜାର ହଜାର ଭକ୍ତଙ୍କ ଭିଡ ଜମିଥାଏ।ମାଁ ଛେଲିଆପାଟ ବଇଲ୍ ଗ୍ରାମ ପରିକ୍ରମା କରିଥାନ୍ତି ଓ ସମସ୍ତଙ୍କ ଆକୁଳ ନିବେଦନ ଶୁଣିଥାନ୍ତି । ଏ ବର୍ଷ ୧୬.୧୦.୨୦୨୪ ରେ ବଇଲ୍ ଯାତରା ହୋଇଥିବା ବେଳେ ୧୭ ଓ ୧୮.୧୦.୨୦୨୪ ରେ ଷଷ୍ଠତମ ମାଁ ଛେଲିଆପାଟ ମହୋତ୍ସବ ପାଳନ ହୋଇଯାଇଅଛି। ଏହି ମହୋତ୍ସବର ଆବାହକ ପୂର୍ବତନ ଯୁବ ସରପଞ୍ଚ ତଥା ସମାଜସେବୀ ଗଣେଶ ସାହୁଙ୍କ ତତ୍ବାବଧାନରେ ଅନୁଷ୍ଠିତ ହୋଇଥିଲା।ଷଷ୍ଠତମ ମାଁ ଛେଲିଆପାଟ ମହୋତ୍ସବର ଉଦଯାପନୀ ଦିବସରେ ମୁଖ୍ୟ ଅତିଥି ଭାବେ ଓଡିଶା ସରକାରଙ୍କର ମାନ୍ୟବର ସ୍ୱାସ୍ଥ୍ୟ ମନ୍ତ୍ରୀ ଡଃ ମୁକେଶ ମହାଲିଙ୍ଗ, ସମ୍ମାନୀତ ଅତିଥି ମାନ୍ୟବର ଦିଗପହଣ୍ଡି ବିଧାୟକ ତଥା ସିନେଜଗତର ଜଣେ ବରିଷ୍ଠ ଅଭିନେତା ସିର୍ଦ୍ଧାନ୍ତ ମହାପାତ୍ର, ଲଲିତ ସାହୁ ମଞ୍ଚାସୀନ ଥିବା ବେଳେ ସଭାରେ ଛେଲିଆପାଟ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ଆନନ୍ଦ ସାହୁ ସଭାପତିତ୍ବ କରିଥିଲେ ଓ ସନତ ଦଲାଇ ମଞ୍ଚ ପରିଚାଳନା କରିଥିଲେ। ସମ୍ମାନୀତ ଅତିଥି ଶ୍ରୀଯୁକ୍ତ ମହାପାତ୍ର ପଶ୍ଚିମ ଓଡିଶାର କୃଷି ଓ କଳା ସଂସ୍କୃତିକୁ ଭୂଶୟୀ ପ୍ରଶଂସା କରିଥିବା ବେଳେ ମୁଖ୍ୟ ଅତିଥି ମାନ୍ୟବର ମନ୍ତ୍ରୀ ମହାଲିଙ୍ଗ ଏ ଅଞ୍ଚଳର ବିକାଶ ତଥା ଏହି ମହୋତ୍ସବ ରାଜ୍ୟସ୍ତରୀୟ ମାନ୍ୟତା ପାଇଁ ସରକାର ପଦକ୍ଷେପ ନେବେ ବୋଲି ମତବ୍ୟକ୍ତ କରିଥିଲେ। ପରବର୍ତ୍ତୀ ସମୟରେ ମହୋତ୍ସବରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଦେଖିବାକୁ ମିଳିଥିଲା। ଏହି ମହୋତ୍ସବର  କାର୍ଯ୍ୟକ୍ରମରେ ଭରସୁଜାର ସମସ୍ତ ଗୁରୁଜନ, ଗ୍ରାମବାସୀ, ମାତୃ ମଣ୍ଡଳୀ, ଛାତ୍ରଛାତ୍ରୀ ଓ କମିଟିର ସମସ୍ତ ସଦସ୍ୟଙ୍କ ସହଯୋଗ ରହିଛି ବୋଲି  ସମାଜ ସେବୀ ପାଣ୍ଡବ ପୁଟେଲ ମତ ରଖିଥିଲେ ଓ ସାତ ବର୍ଷ ଏହି ମାଁ ଛେଲିଆପାଟ ଦେବୀଙ୍କ ବଇଲ୍ ନ ଆସିଥିବା ଯୋଗୁଁ ଅଞ୍ଚଳ ବାସୀଙ୍କ ମନରେ ଦୁଃଖ ଜାତ ହୋଇଥିଲା ବୋଲି ମତ ଦେଇଥିଲେ। ମାଁ ଛେଲିଆପାଟଙ୍କ ଅଲୌକିକ ଶକ୍ତି ଓ ଛେଲିଆ ପାହାଡ଼ ଏକ ପ୍ରାକୃତିକ ଶୋଭାମଣ୍ଡନ କରୁଥିବା ଦର୍ଶନୀୟ ସ୍ଥାନ ଓ ଆଗାମୀ ଦିନରେ ଏକ ବିଶିଷ୍ଟ ଐତିହାସିକ ସ୍ଥଳୀ ହେବ ବୋଲି ଅଧ୍ୟାପକ ସଞ୍ଜୟ ବାରିକ ପୂର୍ବାନୁମାନ କରିଛନ୍ତି।