13-Oct-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ବଲାଙ୍ଗୀର ବନଖଣ୍ଡର ପାଟଣାଗଡ ରେଞ୍ଜର ଲରମ୍ଭା ସେକ୍ସନରେ କାମ୍ପା ଯୋଜନାରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗରେ ଦିନେ ତଳେ ପାଟଣାଗଡ ବିଧାୟକ ତଥା ଉପମୁଖ୍ଯମନ୍ତ୍ରୀ କନକବର୍ଦ୍ଧନ ସିଂଦେଓଙ୍କ ତନାଘନା ପରେ ଭିଜିଲାନ୍ସ ଅଧିକାରୀମାନେ ଯାଇ ଫାଇଲ୍ ଓ କାଗଜପତ୍ର ନେଇଆସିଥିବା ସହ ଗତକାଲି ରାତିରେ ସମ୍ପୃକ୍ତ ଫରେଷ୍ଟରଙ୍କୁ ନିଲମ୍ବିତ କରାଯାଇଥିବା ଜଣାଯାଇଛି ।

ଏଠାରେ ଏହି ଯୋଜନାରେ ବାଉଁଶ କୁପ୍ ଓ ପ୍ଲାଣ୍ଟେସନ୍ କାମରେ ବ୍ୟାପକ ଅନିୟମିତତା ହୋଇଥିବାର ଖବରପାଇ ଶ୍ରୀ ସିଂହଦେଓ ବଲାଙ୍ଗୀର ଡିଏଫଓ ସୁଦର୍ଶନ ବେହେରାଙ୍କୁ ତାଙ୍କ ପାଟଣାଗଡ ବାସଭବନ ଖମାରକୁ ଡକାଇ ପ୍ରବଳ ବର୍ଷିଥିବା ସହ ପରଦିନ ବନ ଅଧିକାରୀଙ୍କ ସହ ଏହିକାମ କରାଯାଉଥିବା କାର୍ଯ୍ୟକ୍ଷେତ୍ରକୁ ଯାଇ ଯାଞ୍ଚ କରିଥିଲେ । ପରେ ବଲାଙ୍ଗୀର ଭିଜିଲାନ୍ସ ଯାଇ ଏହି କାମର କାଗଜପତ୍ର ନେଇ ଆସିଥିବା ଓ ସମ୍ପୃକ୍ତ ଫରେଷ୍ଟର ପ୍ରିୟବ୍ରତ ନାଏକଙ୍କୁ ଗତରାତି ୧୨ ଟା ବେଳେ କାର୍ଯ୍ୟରୁ ନିଲମ୍ବନ କରାଯାଇଥିବା ଜଣାଯାଇଛି ।   ତାଙ୍କ ସ୍ଥାନରେ ବିରଞ୍ଚି କୁମ୍ଭାର ଫରେଷ୍ଟର ଦାୟିତ୍ଵ ଗ୍ରହଣ କରିଛନ୍ତି l ତେବେ ଏହି ଯୋଜନାରେ ବ୍ୟାପକ ଦୁର୍ନୀତି ହେଉଥିବା ଅଭିଯୋଗ ଗତ ପ୍ରାୟ ମାସେ ହେଲା ଚର୍ଚ୍ଚାରେ ରହିଆସିଥିଲା । ଏଠାରେ ଆନନ୍ଦ କୁମାର ବିଶି ରେଞ୍ଜର ଭାବେ ଅବସ୍ଥାପିତ ଅଛନ୍ତି । ବଲାଙ୍ଗୀର ବନଖଣ୍ଡ ଡିଭିଜନ୍ ରେ ବିଭାଗର କାମ୍ପା ଓ ଅନ୍ୟାନ୍ୟ ଯୋଜନାର କାମରୁ ୨୫ ରୁ ୩୦ ପ୍ରତିଶତ ପିସି ନିଆଯାଉଥିବା ଓ ପିସି ନଦେବାରୁ 'ମାର୍ ମାର୍ ଭଣ୍ଡାରିଆକୁ ମାର୍' ନୀତିରେ ରେଞ୍ଜର, ଏସିଏଫ୍ ବା ଡିଏଫଓଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରା ନଯାଇ ଜଣେ ତଳିଆ କର୍ମଚାରୀଙ୍କୁ ଏପରି ରାତିଅଧିଆ ନିଲମ୍ବନ କର୍ମଚାରୀ ମହଲରେ ପ୍ରତିକ୍ରିୟା ସୃଷ୍ଟି ହୋଇଥିବା ବିଶ୍ବସ୍ତ ସୂତ୍ରରୁ ପ୍ରକାଶ ।

ଏହି ଘଟଣା ପରେ ସମସ୍ତ ବନଖଣ୍ଡରେ କିପରି ସରକାରୀ ଯୋଜନା ଚାଲିଛି, ପ୍ରଶ୍ନବାଚୀ ସୃଷ୍ଟି ହୋଇଛି । ମୁଖ୍ୟତଃ କଣ୍ଟାବାଞ୍ଜି, ଲାଠୋର, ଲୋଇସିଂହା, ଖପ୍ରାଖୋଲ ଆଦି ରେଞ୍ଜ୍ ରେ ଯାଞ୍ଚ୍ ଜରୁରୀ ବୋଲି ଜନମତ ପ୍ରକାଶ ପାଇଛି ।