11-Oct-2024

ବଲାଙ୍ଗୀର/ସୋନପୁର(ମଳୟ ମିଶ୍ରଙ୍କ ରିପୋର୍ଟ): 

​ସୁବର୍ଣ୍ଣପୁର ଜିଲ୍ଲାର ଭାତହାଣ୍ଡି ହୀରାକୁଦ କେନାଲ୍ ଜଳସେଚିତ ଟେଲ୍ ଏରିଆର ଡବଲ ଧାନଚାଷ ହେଉଥିବା ଡୁଙ୍ଗୁରିପାଲି ନିୟନ୍ତ୍ରିତ ବଜାର କମିଟିରେ ବ୍ୟାପକ ଅନିୟମିତତା ଓ ଦୁର୍ନୀତି ହୋଇଥିବା ଗୁରୁତର ଅଭିଯୋଗ ପ୍ରକାଶ ପାଇଛି ।

ଗତ ଜୁଲାଇ ୩୧ ତାରିଖରେ ଅଞ୍ଚଳର ଚାଷୀଙ୍କ ପକ୍ଷରୁ ବିଭାଗୀୟ ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତଙ୍କୁ ଭେଟି ପ୍ରଦାନ କରାଯାଇଥିବା ଲିଖିତ ଅଭିଯୋଗ କ୍ରମେ ମନ୍ତ୍ରୀ ରାଜ୍ୟ ସମିତି ସମୂହ ନିବନ୍ଧକ ଭକ୍ତବନ୍ଧୁ ସାହୁଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ । ସେ ରାଜ୍ୟ ବିପଣନ ଅଧିକାରୀଙ୍କୁ ତୁରନ୍ତ ତଦନ୍ତ ନିର୍ଦ୍ଦେଶ ଦେଇଛନ୍ତି । ଏହି ଅଭିଯୋଗପତ୍ରରେ ଉକ୍ତ ଅଭିଯୋଗକାରୀ ଚାଷୀମାନେ ଏହି ଆରଏମସିରେ ପ୍ରାୟ ୮ ବର୍ଷ ଧରି ସମ୍ପାଦକ ଦାୟିତ୍ୱରେ ରହି ଆସିଥିବା ସହିତ ଏହାର ଚେୟାରମ୍ୟାନ୍ ବନାମ ଜିଲ୍ଲାପାଳ OSAM ବୋର୍ଡ଼ର ପ୍ରତ୍ୟେକ୍ଷ ଓ ପରୋକ୍ଷ ମିଳିତ ଦୁର୍ନୀତିର ଭିଜିଲାନ୍ସ ତଦନ୍ତ ନିମନ୍ତେ ମଧ୍ୟ ମନ୍ତ୍ରୀ ବା ସରକାରଙ୍କୁ ଦରଖାସ୍ତ କରିଥିଲେ l ବିଭିନ୍ନ ଗଣମାଧ୍ଯମରେ 

ମଧ୍ୟ ଏହା ପ୍ରକାଶ ପାଇଛି । ତଥାପି ଏହି ସଂସ୍ଥାର ଅଧ୍ୟକ୍ଷା ଥିବା ସୁବର୍ଣ୍ଣପୁର ଜିଲ୍ଲାପାଳ ବା ସରକାରଙ୍କ ପକ୍ଷରୁ ଅଦ୍ୟାବଧି ଏହାର ଉଚିତ୍ ତଦନ୍ତ ପୂର୍ବକ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାଯାଇନାହିଁ  l  କେବଳ ସୋନପୁର ଭିଜିଲାନ୍ସ ପକ୍ଷରୁ ଅଫିସରୁ କିଛି କାଗଜପତ୍ର ନେଇଥିବା ଜଣାଯାଇଥିଲେ ହେଁ ବହୁ ଗୁରୁତ୍ୱପୂର୍ଣ୍ଣ ଫାଇଲ୍ ଛାଡିଯାଇଛନ୍ତି । ଯାହାକୁ ଅଭିଯୁକ୍ତ ସମ୍ପାଦକ ଉଦିତ କୁମାର ବାବୁ ବୁଲିବୁଲି ସାମ୍ବାଦିକଙ୍କୁ ଦେଖାଇ ନିଜ ସତୀତ୍ବକୁ ପ୍ରମାଣ କରିବାର ସଫେଇ ଦେଉଥିବା ଦେଖାଯାଇଛି । ଓଲଟି ଏହି ଆରଏମସିର ସମ୍ପୃକ୍ତ ସମ୍ପାଦକ ଉଦିତ କୁମାର ବାବୁ ଖବର ପ୍ରକାଶ କରିଥିବା ଜୈନେକ ସାମ୍ବାଦିକଙ୍କୁ ଏକ ଓକିଲ ନୋଟିସ୍ ପଠାଇଥିବା ପ୍ରକାଶ । ଏହାର ଉତ୍ତରରେ ସମ୍ପୃକ୍ତ ସାମ୍ବାଦିକ ଜଣକ ପ୍ରକାଶ କରିଛନ୍ତି ଯେ, ଅଞ୍ଚଳର ଚାଷୀଙ୍କ ମତାମତ ପକ୍ଷରୁ ବିଭାଗୀୟ ମନ୍ତ୍ରୀଙ୍କ ଠାରେ କରାଯାଇଥିବା ଅଭିଯୋଗ ଓ ମନ୍ତ୍ରୀଙ୍କ ତଦନ୍ତ ନିର୍ଦ୍ଦେଶ, ସମ୍ପୃକ୍ତ ଅଭିଯୁକ୍ତ ସମ୍ପାଦକଙ୍କ ଉତ୍ତରକୁ ଭିତ୍ତିକରି ଅଞ୍ଚଳର ସ୍ବାର୍ଥଦୃଷ୍ଟିରୁ ମୁ ମୋର ସାମ୍ବାଦିକତା ର କର୍ତ୍ତବ୍ୟ ନିର୍ବାହ କରିଛି । 

ପ୍ରକାଶିତ ଅଭିଯୋଗ ଅନୁଯାୟୀ , ଏହି ଆରଏମସିର କାର୍ଯ୍ୟ ପରିସରରେ ଡୁଙ୍ଗୁରିପାଲି ସମେତ ତରଭା , ବିନିକା ଓ ସୋନପୁର ବ୍ଲକ୍ ରହିଛି । ଏଇ ସେକ୍ରେଟେରୀ ଜଣକ ସୋନପୁର ଏଆର୍ ଅଫିସ୍ ରେ ନିଯୁକ୍ତି ପାଇ କୋଅପରେଟିଭ୍ ଇନିସପେକ୍ଟର ଥିଲେ ଓ ପଦୋନ୍ନତି ପାଇ ତାଙ୍କର ପୋଷ୍ଟିଂ ସୋନପୁର ଏଆର୍ ଅଫିସ୍ ଓ ସେଠାରୁ ବଲାଙ୍ଗୀର ଏଆରସିଏସ୍ କୁ ହୋଇଥିଲେ ହେଁ ସେ  କିଭଳି କାହାଦ୍ବାରା ଡେପୁଟେସନରେ ଜିଲ୍ଲାରେ ପ୍ରାୟ ୧୪ ବର୍ଷ ଓ  ଏହି ସଂସ୍ଥାରେ ପ୍ରାୟ ୮ ବର୍ଷହେଲା ରହିଲେଣି ଏହା ତଦନ୍ତ ସାପେକ୍ଷ ବୋଲି କୁହାଯାଇଛି ।  ତେବେ ତାଙ୍କ କାର୍ଯ୍ୟକାଳରେ ଏଠାରେ ସ୍ଥାନ ମିଳି ନଥିବା ସତ୍ତ୍ୱେ  ସୋନପୁରରେ ସୁପରମାର୍କେଟ୍ ଓ ସିନେମାହଲ୍ ଇତ୍ୟାଦି ଅନାବଶ୍ୟକ ନିର୍ମାଣ, କୋଟି କୋଟି ଟଙ୍କାର ଅହେତୁକ ଯନ୍ତ୍ରପାତି କ୍ରୟ ଓ କୋଟିକୋଟି ଟଙ୍କାର ଅହେତୁକ ବ୍ୟୟ କରି ଚାଷୀମାନଙ୍କ ନିମନ୍ତେ ଉଦ୍ଦିଷ୍ଟ ଏହି ସଂସ୍ଥାର ଅଯଥା ଅର୍ଥବରବାଦ ଆଳରେ ନିଜର ସ୍ବାର୍ଥସାଧନ କରିଚାଲିଥିବା ଅଭିଯୋଗରୁ ପ୍ରକାଶ ।

ସୋନପୁର ସହରର ଧୋବାବାହାଲିରେ ଭିଜିଲାନ୍ସ ଡିଏସପିଙ୍କ ଅଫିସ୍ ନିକଟସ୍ଥ ନିଜର ଏକ ଭବ୍ୟ ଅଟ୍ଟାଳିକାରେ ରହୁଥିବା ଅଭିଯୁକ୍ତ ସମ୍ପାଦକ ଉଦିତ କୁମାର ବାବୁଙ୍କୁ ଏ ସମ୍ପର୍କରେ ପଚାରିବାରୁ ସେ ଏହିସବୁ ଅଭିଯୋଗକୁ ମିଥ୍ୟା , ଭିତ୍ତିହୀନ ଓ ତାଙ୍କୁ ବଦନାମ କରିବାକୁ ଅଫିସ୍ ର ଜଣେ ଆକାଉଣ୍ଟାଣ୍ଟ୍ ତାଙ୍କ ପରେ ଏଇ ପଦରେ ପଦୋନ୍ନତି ପାଇ ରହିବାକୁ ଚକ୍ରାନ୍ତ ବୋଲି ଆରୋପ କରିଛନ୍ତି ।  ସବୁକାମ ଓ କିଣାକିଣି ଇ- ଟେଣ୍ଡର ଓ  କମିଟି ତଥା ଉପରିସ୍ଥ ଅଧିକାରୀଙ୍କ ଅନୁମୋଦନ କ୍ରମେ ହୋଇଥିବା ସଫେଇ ଦେଇଛନ୍ତି । 

ଲୋକେ ତାଙ୍କର ଏତାଦୃଶ କୈଫିୟତ୍ କୁ ଗ୍ରହଣ କରୁ ନାହାଁନ୍ତି ।  ସବୁ ଅସାଧୁ ଓ ଦୁର୍ନୀତିଗ୍ରସ୍ତ ଅଧିକାରୀମାନେ ଏଇଭଳି ଗଳାବାଟ ରଖିଥା'ନ୍ତି ଓ ପ୍ରକୃତ ନିରପେକ୍ଷ ତଦନ୍ତ ହେଲେ , ସବୁ ଧରାପଡିବ ବୋଲି ମତପ୍ରକାଶ ପାଉଛି । ଅଧିକନ୍ତୁ ଏହି ସଂସ୍ଥାର ଅଧ୍ୟକ୍ଷ ବା ଜିଲ୍ଲାପାଳମାନେ ତାଙ୍କୁ ଘଣ୍ଟଘୋଡାଇ ଆସୁଥିବା ଅଭିଯୋଗ କରାଯାଉଥିବା ସହିତ  ଏଭଳି ପ୍ରଶାସକ ମାନେ ସୁବର୍ଣ୍ଣପୁରର ଦୁର୍ଭାଗ୍ୟ ବୋଲି ଲୋକେ କ୍ଷୋଭ ପ୍ରକାଶ କରିଛନ୍ତି । ପ୍ରକାଶ ଥାଉ କି , ଆଗାମୀଦିନରେ ଏହାର ଆହୁରି ବିସ୍ଫୋରକ ତଥ୍ୟର ଖୁଲାସା କରାଯିବ ।