11-Oct-2024

ତୁଷୁରା (ପଞ୍ଚାନନ ନାଏକ) ବଲାଙ୍ଗୀର ଜିଲା ତୁଷୁରା ସହର ସ୍ଥିତ ଅଧୀଷ୍ଠାତ୍ରୀ ଦେବୀ ମା’ସମଲେଶ୍ଵରୀଙ୍କ ୬୭ତମ ଶାରଦୀୟ ପର୍ବ ସ୍ଥାନୀୟ ମାଁ ସମଲେଶ୍ଵରୀ ପୀଠରେ ମହାସମାରୋହରେ ଚାଲିଛି | ଗୁରୁବାର ମହାଷ୍ଟମୀ ତିଥି  ସକାଳ ପ୍ରାୟ ୯ଟା ୩୦ମିନିଟରେ ମାଁ ବରୁଆଙ୍କ ଶରୀରରେ ଆବିର୍ଭାବ ହୋଇ ନଗରବାସୀଙ୍କ ସୁଖଦୁଃଖ ବୁଝିବା ପାଇଁ ନଗର ଭ୍ରମଣରେ ବାହାରିଥିଲେ। ଏହି ସମୟରେ ପ୍ରଥମେ ମାଁ ଜଣେ ହରିଜନ ସମ୍ପ୍ରଦାୟ ବ୍ୟକ୍ତିଙ୍କଠାରୁ ପୂଜା ପାଇଥିଲେ। ଉକ୍ତ ବ୍ୟକ୍ତିଙ୍କ ଢୋଲରେ ମାଁ ଚଢି ଏକ ପୁରୁଣା ବୃକ୍ଷ ପର୍ଯ୍ୟନ୍ତ ଆସିଥିଲେ। ମା’ ନଗର ଭ୍ରମଣ ବାହାରିଲେ ତାଙ୍କ ସହ ଦେହୁରୀ, ବାଦ, ଘଣ୍ଟ ଆଦି ରହିଥିଲା। ଏହି ସମୟ ପ୍ରତ୍ୟେକ ବ୍ୟକ୍ତି ନିଜ ଘର ସମ୍ମୁଖକୁ ଲିପା ପୋଛା କରି ମାଁଙ୍କ ଆଗମନକୁ ଅପେକ୍ଷା କରିଥିଲେ । ମାଁଙ୍କୁ ଫୁଲ, ସିନ୍ଦୂର, ନଡିଆ, ଦୀପ ଆଦି ଦେଇ ପୂଜା ଅର୍ଚ୍ଚନା କରିଥିଲେ। ଦିନକ ସହରର ସମସ୍ତ ଘରେ ଘରେ ମାଁ ପୂଜା ପାଇ ପୀଠକୁ ଫେରିଥାନ୍ତି । ଶୁକ୍ରବାର ପୀଠରେ ଶୁଭ ଲଗ୍ନରେ ଶାରଦୀୟ ପୂଜାର ପୂର୍ଣ୍ଣାହୁତି ହେବାର କାର୍ଯ୍ୟକ୍ରମ ରହିଥିବା ଆଯୋଜକ କମିଟିରୁ ପ୍ରକାଶ।