08-Oct-2024

ବରଗଡ:(ନିରଞ୍ଜନ ତ୍ରିପାଠୀ)-ବରଗଡ଼ ଜିଲ୍ଲା ବିଜେପୁର ସହରରେ ସାର୍ବଜନୀନ ପବିତ୍ର ନବରାତ୍ର ଦୁର୍ଗାପୂଜା ମହାସମାରୋହରେ ପାଳିତ ହେଉଥିବା ବେଳେ, ଆଜି ପଞ୍ଚମ ଦିବସରେ  ମାଁ କାତ୍ୟାୟନୀ ବେଶରେ ସ୍ଥାନୀୟ ଦୁର୍ଗା ମଣ୍ଡପ ଠାରେ ପୂଜା ପାଉଛନ୍ତି। ପ୍ରତିଦିନ ରିତୀନିତି ସହକାରେ ଅଙ୍କୁର ରୋପଣ, ଦ୍ୱାରପାଳ ପୂଜା, ଚଣ୍ଡିପାଠ,ହୋମ ଅନୁଷ୍ଠିତ ହେଉଥିବା ବେଳେ ଘଣ୍ଠ ଶଙ୍ଖ, ପୁରୋହିତଙ୍କ ବେଦମନ୍ତ୍ର ପାଠ, ହୁଳହୁଳି ହରିବୋଲ ସହ ଧୂପଦୀପ, ସୁଗନ୍ଧିତ ଗୁଗଲର ମହମହ ବାସ୍ନାରେ ଏକ ଅପୂର୍ବ ଭାବମୟ ପରିବେଶ ସୃଷ୍ଟି ହୋଇଛି। ଆଜି ମାଁ କାତ୍ୟାୟନୀ ବେଶରେ ପୂଜା ପାଉଛନ୍ତି। ବିଜେପୁର ନିର୍ବାଚନ ମଣ୍ଡଳୀର ବିଧାୟକ ତଥା ଜମିଦାର ସନତ କୁମାର ଗଡତୀୟା କର୍ତ୍ତା ଦାୟିତ୍ୱ ତୁଲାଇଥିବା ବେଳେ,ରାଜ ପୁରୋହିତ କିଶୋର ଚନ୍ଦ୍ର ପୂଜାରୀ ଚଣ୍ଡିପାଠ କରୁଛନ୍ତି। ପୁସ୍ତକାଚାର୍ଯ୍ୟ ସୁରେନ୍ଦ୍ର ମହାପାତ୍ର, କିଶୋର ଚନ୍ଦ୍ର ମହାପାତ୍ର ପ୍ରମୁଖ ପୂଜା କର୍ମ ସମ୍ପାଦନ କରୁଛନ୍ତି।

ବିଭିନ୍ନ ପୈାରାଣିକ ତଥ୍ୟ ଅନୁସାରେ କାତ୍ୟାୟନୀ ହେଉଛନ୍ତି ଦେବୀ ଆଦି ପରାଶକ୍ତି ।ପୁରାଣରେ ତାଙ୍କୁ ଶ୍ରୀକୃଷ୍ଣଙ୍କର ଭଉଣୀ ବୋଲି ଉଲ୍ଲେଖ କରା ଯାଇଛି।ସ୍କନ୍ଧ ପୁରାଣ ଏବଂ ଯଜୁର୍ବେଦରେ  ମହିଷାସୁର କୁ ମାରିବା ପାଇଁ ମାଁ ଏଇ ଅବତାରରେ ଅବତୀର୍ଣ୍ଣ ହୋଇଥିଲେ। ମାର୍କଣ୍ଡେୟ ପୁରାଣ ତଥ୍ୟ ଅନୁସାରେ ଦେବୀଙ୍କୁ ତନ୍ତ୍ର ସାଧନା ଏବଂ ପତଞ୍ଜଳୀ ଋଷିଙ୍କର ମହଭାଷ୍ୟ ଅନୁଯାୟୀ ଯୋଗ ସାଧନାର ଆଦିଦେବୀ ବୋଲି କୁହା ଯାଇଛି ।ପ୍ରତ୍ୟେକ ସାଂଧ୍ୟ ରଜନୀରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପୂଜା ମଣ୍ଡପ ପରିସରରେ ଅନୁଷ୍ଠିତ ହେଉଛି। ଆଜିକାର କାର୍ଯ୍ୟକ୍ରମରେ ସୁଗମ ଭଜନ ସଂଧ୍ୟା, ବରଗଡ଼ ଓ ନର୍ତ୍ତକୀ ଡେନ୍ସ ଏକାଡେମୀ ଭୁବନେଶ୍ବରର କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ପୂଜା କମିଟିର ସମ୍ପାଦକ ଶ୍ରୀଯୁକ୍ତ ଜନାର୍ଦ୍ଦନ ପାଣିଗ୍ରାହୀ ସୂଚନା ପ୍ରଦାନ କରିଛନ୍ତି।